جەدەل جاردەمنىڭ قايدا كەلە جاتقانىن ەندى تەلەفوننان باقىلاۋعا بولادى

جەدەل جاردەم شاقىرعان ادام بريگادانىڭ قايدا كەلە جاتقانىن ءبىلۋ ءۇشىن ديسپەتچەرگە قايتا-قايتا حابارلاسۋعا ءماجبۇر بولاتىن جاعدايلار كەزدەسەدى. ەندى بۇل ماسەلەنى تەحنولوگيا ارقىلى شەشۋ كوزدەلگەن. جاڭا جۇيە بويىنشا شاقىرتۋ قابىلدانعان سوڭ ازاماتتىڭ تەلەفونىنا SMS حابارلاما جىبەرىلىپ، وندا ياندەكس كارتاسىنا سىلتەمە بەرىلەدى. سول ارقىلى ناۋقاس نەمەسە ناقاستىڭ جاقىندارى بريگادانىڭ قوزعالىسىن باقىلاي الادى.

دەنساۋلىق ساقتاۋ مينيسترلىگىنە قاراستى ۇلتتىق شۇعىل مەديتسينانى ۇيلەستىرۋ ورتالىعى باسقارما ءتوراعاسىنىڭ ورىنباسارى اسحات يشانعالي ۇلىنىڭ ايتۋىنشا، جوبا ازىرگە سىناق رەجيمىندە جۇمىس ىستەپ تۇر.

- بۇل باستاما العاش رەت ەنگىزىلىپ وتىرعاندىقتان، ونى ءبىر قالا مەن ءبىر وبلىستا سىناپ جاتىرمىز. ەگەر جۇيە تيىمدىلىگىن كورسەتىپ، جۇمىسىمىزعا وڭ اسەرىن تيگىزسە، باسقا وڭىرلەرگە دە ەنگىزۋ ماسەلەسى قارالادى. ول ءۇشىن قارجىلاندىرۋ جاعى دا شەشىلىپ، ءتيىستى قاراجات كەلەسى جىلعى بيۋدجەتكە ەنگىزىلۋى كەرەك، - دەدى ول Jibek Joly تەلەارناسىنىڭ «بۇگىن. LIVە» باعدارلاماسىندا.

جەدەل جاردەم شاقىرتۋعا قانشا ۋاقىتتا جەتۋى كەرەك؟

جەدەل مەديتسينالىق كومەككە تۇسكەن وتىنىشتەر شۇعىلدىق دەڭگەيىنە قاراي ءتورت ساناتقا بولىنەدى. ءار ساناتقا بريگادانىڭ جەتۋ مەرزىمى بەلگىلەنگەن.

ءبىرىنشى ساناتتاعى شاقىرتۋعا بريگادا 10 مينۋت ىشىندە جەتۋى كەرەك. ەكىنشى ساناتقا 15 مينۋت، ءۇشىنشى ساناتقا 30 مينۋت، ءتورتىنشى ساناتقا 60 مينۋتقا دەيىن ۋاقىت بەرىلەدى.

الايدا بەلگىلەنگەن مەرزىمدە جەتۋگە جول جاعدايى، اۋا رايى جانە شاقىرتۋدىڭ كۇرت كوبەيۋى اسەر ەتۋى مۇمكىن. اسىرەسە ءىرى قالالاردا قاربالاس ۋاقىتتا، ال كۇز بەن كوكتەمدە تۇماۋ ورشىگەن كەزەڭدە جۇكتەمە ارتادى.

اسحات يشانعالي ۇلىنىڭ سوزىنشە، جەدەل جاردەم ستانتسيالارى سۇرانىس كوبەيگەن كەزدە قوسىمشا بريگادالار شىعارادى. سوعان قاراماستان، كەي ۋاقىتتا بارلىق شاقىرتۋعا جەدەل جەتۋ قيىنعا سوعادى.

- جىلىنا سەگىز ميلليوننان استام قوڭىراۋ تۇسەدى. قازاقستان بويىنشا تاۋلىگىنە 1600 دەن استام موبيلدى بريگادا جۇمىسقا شىعادى. اسىرەسە تۇماۋ ورشىگەن كەزدە شاقىرتۋ سانى ەكى-ءۇش ەسە كوبەيىپ كەتۋى مۇمكىن. مۇندايدا قوسىمشا بريگادالار جۇمىلدىرىلادى، - دەدى ول.

قانداي جاعدايدا موبيلدى بريگادا جىبەرىلەدى؟

شاقىرتۋ ساناتى ناۋقاستىڭ جاعدايىنا قاراي انىقتالادى. ومىرىنە تىكەلەي قاۋىپ تونگەن جاعدايدا رەانيماتسيالىق بريگادا جىبەرىلەدى. ونىڭ قۇرامىندا شۇعىل كومەك كورسەتۋگە قاجەتتى ماماندار بولىپ، ءتيىستى مەديتسينالىق جابدىقتارمەن قامتاماسىز ەتىلەدى.

ال جاعدايى سالىستىرمالى تۇردە تۇراقتى ناۋقاستارعا كەلگەن بريگادا العاشقى مەديتسينالىق كومەك كورسەتىپ، ءارى قاراي قايدا جۇگىنۋ كەرەگىن انىقتايدى. قاجەت بولعان جاعدايدا ناۋقاستى ستاتسيونارعا جەتكىزۋ ماسەلەسى شەشىلەدى. ەگەر اۋرۋحاناعا جاتقىزۋ قاجەت بولماسا، ەمحانادا امبۋلاتوريالىق ەم الۋ جونىندە ۇسىنىم بەرىلەدى.

جەدەل جاردەم كولىكتەرى نەگە ءجيى جاڭارتىلمايدى؟

جەدەل مەديتسينالىق كومەك قىزمەتىندەگى تاعى ءبىر ماسەلە - كولىكتەردىڭ توزۋى. بۇل ماشينالار اپتاسىنا جەتى كۇن، تاۋلىگىنە 24 ساعاتقا دەيىن جۇمىس ىستەيتىندىكتەن، وزگە قىزمەتتىك كولىكتەرگە قاراعاندا جىلدام توزادى.

ورتالىق وكىلىنىڭ ايتۋىنشا، جەدەل جاردەم كولىكتەرى شامامەن 6 جىل پايدالانىلعاننان كەيىن اينالىمنان شىعارىلادى. ولاردىڭ ورنىنا جاڭاسىن الۋ جەرگىلىكتى اتقارۋشى ورگانداردىڭ قاتىسۋىمەن كەزەڭ-كەزەڭىمەن جۇزەگە اسىرىلادى.

بيىلعى توعىز ايدا وڭىرلەرگە 300 گە جۋىق كولىك بەرىلگەن. قاجەتتىلىك ءار ايماقتا ءارتۇرلى بولعاندىقتان، كەي وڭىرلەرگە ونداعان كولىكتەن جەتكىزىلگەن. كولىك پاركىن جاڭارتۋ الداعى جىلدارى دا جالعاسادى.

مەديتسينا قىزمەتكەرلەرىنىڭ قاۋىپسىزدىگى قالاي قورعالادى؟

- جەدەل جاردەم قىزمەتكەرلەرى ناۋقاسقا ءبىرىنشى بولىپ جەتەتىن ماماندار بولعاندىقتان، كەيدە اشۋلى تۋىستاردىڭ قىسىمىنا، بالاعات سوزدەرىنە نەمەسە شابۋىلىنا تاپ بولادى. بۇل ماسەلەنى تەك وقيعا بولعاننان كەيىن جاۋاپقا تارتۋمەن شەكتەۋگە بولمايدى، - دەيدى اسحات يشانعالي ۇلى.

ونىڭ پىكىرىنشە، مەديتسينا قىزمەتكەرلەرىنىڭ قۇقىقتىق قورعالۋىن كۇشەيتىپ، ولارعا كۇش كورسەتۋ مەن قىسىم جاساۋعا جول بەرمەيتىن تەتىكتەر قاجەت.

- جەدەل جاردەم قىزمەتكەرلەرى قۇقىقتىق جاعىنان جەتكىلىكتى قورعالعان دەپ ايتا المايمىز. كوبىنە وقيعا بولعاننان كەيىن عانا سوتقا جۇگىنۋ ماسەلەسى تۋىندايدى. ال مۇنداي جاعدايلاردىڭ الدىن الۋ جولدارى مەن مامانداردىڭ مارتەبەسىن كۇشەيتۋ ماڭىزدى. بۇل تەك جەدەل جاردەمگە ەمەس، بارلىق مەديتسينا قىزمەتكەرىنە قاتىستى ماسەلە، - دەدى ول.

ايتا كەتەيىك، بۇعان دەيىن، الماتىدا جەدەل جاردەم قىزمەتكەرلەرىن پىشاقپەن قورقىتقان ەكى ەر ادام ۇستالعانىن جازعان ەدىك