دجەكي چان «دوسپەحي بوگا» فيلمىن قازاقستاندا تۇسىرۋگە نە سەبەپ بولعانىن ايتتى

«دوسپەحي بوگا: ۋلتيماتۋم» فيلمىنىڭ قازاقستانداعى ءتۇسىرىلىمى اياقتالدى. بىرنەشە اي بويى ماڭعىستاۋ جانە الماتى وبلىستارىندا جۇمىس ىستەگەن دجەكي چان استاناعا كەلىپ، باسپا ءسوز ءماسليحاتىنا قاتىستى.

اكتەردىڭ ايتۋىنشا، ءفيلمدى قازاقستاندا ءتۇسىرۋ تۋرالى ۇسىنىس بىرنەشە جىل بۇرىن قىتايدا ەرلان قارينمەن كەزدەسكەن كەزدە ايتىلعان.

- ەسىمدە، بۇل 2017 نەمەسە 2018-جىل بولۋى كەرەك. ەرلان قارين مىرزا قىتايعا كەلدى. ءبىز وتىرىپ، شاي ءىشىپ، كەشكى اس ىشتىك. ول مەنەن: «دجەكي، نەگە قازاقستاندا فيلم تۇسىرمەسكە؟» دەپ سۇرادى. مەن: «بىلمەيمىن، لايىقتى وقيعا جوق. قازاقستاننىڭ مادەنيەتىمەن دە اسا تانىس ەمەسپىن»، - دەپ جاۋاپ بەردىم. سوندا ول: «ۋايىمداما، بۇل جۇمىستى اتقاراتىن ادامداردى تابامىن. قازاقستانعا كەلىپ، فيلم ءتۇسىر»، - دەدى. مەن: «جاقسى»، - دەدىم، - دەپ ەسكە الدى اكتەر.

دجەكي چان باستاپقىدا بۇل ۇسىنىستىڭ جۇزەگە اساتىنىنا سەنبەگەنىن ايتتى.

- شىنىمدى ايتسام، ادامدار ماعان جيى: «مەنىڭ ەلىمە كەلىپ، فيلم ءتۇسىر»، «بىزدە بىردەڭە ءتۇسىر» دەيدى. ءبىراق كەيىن ەشتەڭە بولماي قالادى. الايدا شامامەن ءبىر جىلدان كەيىن نەمەسە بىرنەشە ايدان سوڭ ەرلان قارين مىرزا مەنى استاناعا شاقىردى. ول كەزدە كۇن سۋىق، قار جاۋىپ تۇردى. ءبىز وتىرىپ سويلەستىك. ول ماعان كوماندانىڭ جاساقتالعانىن جانە جۇمىستى باستاپ كەتكەنىن ايتتى، - دەدى ول.

اكتەر سول كەزدە قازاقستاندىق كوماندانىڭ سەناريمەن جۇمىس ىستەپ، رەجيسسەردى دە تاڭداپ قويعانىنا تاڭعالعان.

- كەيىن اقتاۋعا باردىم. سول جەردە ءتۇسىرىلىم ورىندارىن جانە فيلمنىڭ قالاي كورىنەتىنىن تالقىلادىق. ءسويتىپ، جوبا شىنىمەن جۇزەگە استى. ادەتتە مۇنداي جاعداي بولا بەرمەيدى. مەن، نەگىزىنەن، ءوزىم باقىلاۋىمداعى جوبالارعا عانا تولىق سەنىمدى بولا الامىن. ال بۇل جولى ءبارى ويداعىداي جۇزەگە استى. مىنە، كەشە فيلم بويىنشا بارلىق جۇمىسىمىزدى اياقتادىق! - دەدى اكتەر.

باسپا ءسوز ءماسليحاتىندا ءتۇسىرىلىم جۇمىستارىنىڭ جاقىن ارادا شاڭحايدا جالعاساتىنى دا بەلگىلى بولدى.

ەسكە سالايىق، شىلدە ايىندا دجەكي چان «دوسپەحي بوگا: ۋلتيماتۋم» فيلمىنىڭ تۇسىرىلىمىنە قاتىسۋ ءۇشىن قازاقستانعا كەلگەن ەدى. ءتۇسىرىلىم الماتى قالاسىندا، سونداي-اق الماتى جانە ماڭعىستاۋ وبلىستارىندا ءوتتى.

فيلمدى 2027-جىلى پروكاتقا شىعارۋ جوسپارلانعان.

دجەكي چان قازاقستانعا قايتا ورالعىسى كەلەتىنىن جانە كەلەسى جوباسى تۋرالى ويلانا باستاعانىن دا ايتتى.