جۇكتىلىك پەن بوسانۋ تولەمدەرىنىڭ كولەمى كەيىنگى 5 جىلدا 5 ەسە ارتقان
استانا. KAZINFORM - قولدانىستاعى زاڭنامادا جۇكتىلىك پەن بوسانۋعا بايلانىستى بەرىلەتىن الەۋمەتتىك تولەمدەردىڭ جوعارعى شەگى بەلگىلەنبەگەن. الەۋمەتتىك كودەكسكە وسى ماسەلەنى جاڭاشا رەتتەيتىن وزگەرتۋلەر ەنۋى مۇمكىن. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىندەگىلەر Kazinform ساۋالىنا جولداعان جاۋاپتا ايتتى.
- قازىرگى كەزەڭدە قولدانىستاعى زاڭناما نورمالارىندا جۇكتىلىك پەن بوسانۋ بويىنشا تولەمدەردىڭ جوعارعى شەگى بەلگىلەنبەگەن. قازىرگى تاڭدا الەۋمەتتىك كودەكسكە الەۋمەتتىك تولەمدەردى، ونىڭ ىشىندە جۇكتىلىك پەن بوسانۋ بويىنشا الەۋمەتتىك تولەمدەردى تاعايىنداۋدىڭ پارامەترلىك وزگەرىستەرىن بولجايتىن وزگەرىستەر مەن تولىقتىرۋلار ەنگىزۋ جونىندە ءتيىستى ۇسىنىستار ازىرلەنىپ جولداندى. الەۋمەتتىك ساقتاندىرۋ جۇيەسى ادامنىڭ جوعالتقان كىرىسىنىڭ بىر بولىگىن وتەۋگە باعدارلانعانىن اتاپ وتكەن ءجون، - دەپ جازىلعان رەسمي مالىمەتتە.
ۆەدومستۆونىڭ دەرەگىنە سەنسەك، كەيىنگى بەس جىلدا بالا كۇتىمىنە بايلانىستى الەۋمەتتىك تولەم راسىمدەۋشىلەردىڭ سانى 1,2 ەسە كوبەيسە، تولەنگەن سومانىڭ جالپى كولەمى 5 ەسەگە جۋىق وسكەن.
- 2019 -جىلى 191,4 مىڭ ادام جۇكتىلىگى جانە بوسانۋى بويىنشا 77,5 ميلليارد تەڭگە سوماعا الەۋمەتتىك تولەم الدى. ال 2024 -جىلى 245,7 مىڭ ادام 385,6 ميلليارد تەڭگە الەۋمەتتىك تولەم الدى، - دەپ جازىلعان مينيسترلىك مالىمەتىندە.
ايتا كەتسەك، 2024 -جىلدىڭ قورىتىندىسى بويىنشا شامامەن 1,4 ميلليون قازاقستاندىق جالپى سوماسى 958,3 ميلليارد تەڭگەگە بەس الەۋمەتتىك تاۋەكەل بويىنشا مەملەكەتتىك الەۋمەتتىك ساقتاندىرۋ قورىنان الەۋمەتتىك تولەم الدى.
سونداي-اق، بىلتىر كۇزدە انتيكور شىعىس قازاقستان وبلىسىندا 780 ايەلدىڭ دەكرەتتىك تولەمدى ارتتىرۋ ۇشىن جەكە كاسىپكەر رەتىندە تىركەلگەنىن انىقتاعان بولاتىن.
جۋىردا ەڭبەك جانە حالىقتى الەۋمەتتىك قورعاۋ مينيسترلىگىنىڭ كەڭەيتىلگەن القا ماجىلىسىندە ۆەدومستۆو باسشىسى سۆەتلانا جاقىپوۆا جۇكتىلىك جانە بوسانۋعا قاتىستى اسىرا تولەم العان 113 ادامعا قاتىستى قىلمىستىق ءىس قوزعالعانىن ايتتى.
اۆتور
ەسىمجان ناقتىباي
