جۇكتى ارتىق تيەگەن كولىكتەر تولىقتاي اۆتوماتتاندىرىلعان تارتىپتە انىقتالادى

استانا. قازاقپارات – 4-جەلتوقساننان ەلورداعا نەگىزگى كىرەبەرىس جولداردا جۇك كولىكتەرىن اۆتوماتتاندىرىلعان تارتىپتە ولشەۋ جۇيەسى «سەرگەك» قاعيداتى بويىنشا جۇمىس ىستەيدى.

بۇل تۋرالى كولىك مينيسترلىگى اۆتوموبيل كولىگى جانە كولىكتىك باقىلاۋ كوميتەتىنىڭ احۋالدىق ورتالىعى باسشىسىنىڭ مىندەتىن اتقارۋشى سۇلتان مۇساعالييەۆ ايتتى.

«بۇل تەستىلەۋدەن وتكىزىلىپ جاتقان جوبا ەمەس. اكىمشىلىك قۇقىق بۇزۋشىلىق تۋرالى كودەكسىندە جۇكتى شامادان تىس تيەگەن كولىكتەرگە قاتىستى ارناي باپ بار. بۇعان دەيىن اۆتوماتتاندىرىلعان ولشەۋ جۇيەسى ارقىلى باقىلاۋدىڭ ءتاسىلى ىسكە قوسىلعان ەدى. اتاپ ايتقاندا، ءقازىر جارتىلاي اۆتوماتتاندىرىلعان جۇيە جۇمىس ىستەپ تۇر. بۇل رەتتە مامان سالماق ەرەجەسىن بۇزعانداردى انىقتاپ، ءتيىستى نۇسقامانى جۇك تاسىمالداۋشىلارعا جولداپ جاتىر. ال 4-جەلتوقساننان وسى نۇسقامالار تولىقتاي اۆتوماتتاندىرىلعان تارتىپتە باعىتتالادى. ارتىق سالماق تيەگەندەر «سەرگەك» قاعيداتى بويىنشا انىقتالىپ، ايىپپۇل جولدانادى، جۇيە اۆتوماتتى تۇردە جۇمىس ىستەيدى. ادامي فاكتور بولمايدى. وسى ورايدا جاقسى ءۇردىستى بايقاپ وتىرمىز، ياعني ولار جۇكتى رۇقسات ەتىلگەن دەڭگەيدە تيەپ جاتىر»، - دەدى س. مۇساعاليەۆ ەلوردادا تىلشىلەر سۇراعىنا جاۋاپ بەرە وتىرىپ.

ونىڭ ايتۋىنشا، ەلوردا اۋماعىندا قازىر 7 ولشەۋ جۇيەسى ورناتىلعان جانە ونىڭ بەسەۋى قوسىلدى. بيىل 6-قىركۇيەكتەن باستاپ كولىك سالاسىنداعى باقىلاۋ ينسپەكتسياسى 235 ميلليون تەڭگەگە 632 كولىك بويىنشا ۇيعارىمدى جولدادى. سونىمەن قاتار تاعى 70 كە جۋىق ۇيعارىم كولىك يەلەرىنە باعىتتالادى.

«جالپى، بازادا اۋىر سالماقتى كولىكتەر بويىنشا 13 مىڭ ەرەجە بۇزۋ جيناقتالعان. ءبىراق ونىڭ 12 مىڭنان استامى اۆتوكولىكتەردىڭ مەملەكەتتىك نومىرلەرىنىڭ انىقتالماۋىنا بايلانىستى ءسال كىدىرىپ تۇر. سوندىقتان تەك 632 سىنە ايىپپۇل سالىندى. جۇك كولىكتەرىنىڭ جۇرگىزۋشىلەرى اتالعان ولشەۋ جۇيەسىنە جاقىنداعان كەزدە مەملەكەتتىك نومىرلەرىن بۇركەپ جاۋىپ تاستاۋى نەمەسە ولشەۋ ستانتسياسىنان اينالىپ ءوتۋى ارەكەتتەرىن جاساپ جاتىر»، - دەدى ۆەدومستۆو وكىلى.

اتاپ ايتقاندا، بۇگىن استانا قالاسى كاسىپكەرلەردىڭ قۇقىقتارىن قورعاۋ جانە سىبايلاس جەمقورلىققا قارسى ءىس-قيمىل جونىندەگى كەڭەسىنىڭ وتىرىسىندا جۇك تاسىمالداۋشىلار اتالعان جۇيە ارقىلى كەيبىر ايىپپۇلدار نەگىزسىز كەلىپ جاتقانىن ايتتى.

ءوز كەزەگىندە استانا قالاسى كولىك جانە جول-كولىك ينفراقۇرىلىمىن دامىتۋ باسقارماسىنىڭ وكىلدەرى اۆتوماتتاندىرىلعان ولشەۋ جۇيەسىندەگى قۇرىلعىلار ءتيىستى سەرتيفيكاتتاۋدان وتكەنىن ءمالىم ەتتى.

بۇدان بۇرىن حابارلانعانداي، بيىل قىركۇيەك ايىندا استانا قالاسىنا نەگىزگى كىرەبەرىس جولداردا اۆتوماتتاندىرىلعان ولشەۋ جۇيەسى ىسكە قوسىلدى.