جەكەمەنشىك مەكتەپتەردە ءبىلىم الاتىن بالالار دا ىستىق تاماقپەن قامتىلادى
استانا. KAZINFORM - جەكەمەنشىك مەكتەپتەردە ءبىلىم الاتىن بالالار دا ىستىق تاماقپەن قامتىلاتىن بولادى. بۇل تۋرالى ءماجىلىس دەپۋتاتتارىنىڭ ساۋالىنا پرەمەر-ءمينيستردىڭ ورىنباسارى تامارا دۇيسەنوۆانىڭ جاۋابىندا ايتىلعان.
«مەنشىك نىسانىنا قاراماستان ءبىلىم بەرۋ ۇيىمدارىندا ءبىلىم الۋ كەزەڭىندە بالالاردىڭ جەكەلەگەن ساناتتارىنىڭ ءبىلىم الۋشىلارى مەن تاربيەلەنۋشىلەرىنە قولداۋ الۋعا كومەك كورسەتۋدى، ونىڭ ىشىندە باستاۋىش سىنىپ وقۋشىلارىنا جانە حالىقتىڭ الەۋمەتتىك وسال ساناتتارىنا تەگىن تاماقتاندىرۋدى ۇيىمداستىرۋدى كوزدەيتىن تۇزەتۋلەر قازاقستان رەسپۋبليكاسىنىڭ ۇكىمەتى باستاماشىلىق جاساعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءبىلىم بەرۋ جانە بالا قۇقىقتارىن قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا ەنگىزىلگەن. زاڭ جوباسى رەسپۋبليكالىق بيۋدجەت كوميسسياسى وتىرىسىندا قولداۋ تاپتى جانە 11 مەملەكەتتىك ورگانمەن جانە 20 جەرگىلىكتى اتقارۋشى ورگانمەن كەلىسىلدى. قازىرگى ۋاقىتتا زاڭ جوبالارى پارلامەنت ماجىلىسىندە قارالۋدا»، - دەدى ۇكىمەت باسشىسىنىڭ ورىنباسارى جاۋابىندا.
ۆيتسە-پرەمەردىڭ اتاپ وتۋىنشە، قازاقستان زاڭناماسىنا سايكەس، مەملەكەتتىك باقىلاۋ ءبىلىم بەرۋ ۇيىمدارىنىڭ مەنشىك نىسانىنا قاراماستان بارۋ ارقىلى پروفيلاكتيكالىق باقىلاۋ، مەملەكەتتىك اتتەستاتتاۋ، بىلىكتىلىك تالاپتارىنا سايكەستىگىن تەكسەرۋ جانە جوسپاردان تىس تەكسەرۋ ارقىلى جۇرگىزىلەدى. ونىڭ ۇستىنە ءاربىر جەكەمەنشىك ۇيىم مەملەكەتتىك ءبىلىم بەرۋ ۇيىمى سياقتى، بەس جىلدا ءبىر رەت مەملەكەتتىك اتتەستاتتاۋ راسىمىنەن وتەدى. بۇل ءراسىم ءبىلىم بەرۋ قىزمەتىنىڭ مەملەكەتتىك جالپىعا مىندەتتى ءبىلىم بەرۋ ستاندارتىنىڭ تالاپتارىنا سايكەستىگىن باقىلاۋعا باعىتتالعان.
«سونىمەن قاتار ءبىلىم بەرۋ قىزمەتتەرىنىڭ ساپاسىن جاقسارتۋ ءۇشىن ءبىلىم بەرۋ ۇيىمدارىنا قويىلاتىن بىلىكتىلىك تالاپتارىنا كەمىندە 90 پايىز شتاتتىق پەداگوگتەردىڭ، ينتەرنەتتىڭ ەڭ تومەنگى جىلدامدىعىنىڭ بولۋى، ءتيىستى پەداگوگيكالىق بەيىن بويىنشا جانە مەنەدجمەنت سالاسىنداعى باسشىلارعا ارنالعان كۋرستاردان وتكەن باسشى مەن پەداگوگتەردىڭ بىلىكتىلىك تالاپتارىنا سايكەستىگى بولىگىندە وزگەرىستەر مەن تولىقتىرۋلار ەنگىزىلدى»، - دەدى تامارا دۇيسەنوۆا.
اۆتور
مارلان جيەمباي
