جەكە تۇلعالاردىڭ 2024-جىلعى كولىك سالىعىن تولەۋ مەرزىمى قاشان اياقتالادى
استانا. KAZINFORM - مەملەكەتتىك كىرىستەر كوميتەتى جەكە تۇلعالاردىڭ 2024-جىلعا ارنالعان كولىك سالىعىن تولەۋ مەرزىمى 2025-جىلدىڭ 1-ساۋىرىندە اياقتالاتىنىن ەسكە سالدى.
ق ر ق م مەملەكەتتىك كىرىستەر كوميتەتىنىڭ باسپا ءسوز قىزمەتىنىڭ حابارلاۋىنشا، 2024-جىلعا ارنالعان سالىقتى ەسەپتەۋ كەزىندە 2024-جىلى قولدانىستا بولعان 3692 تەڭگە كولەمىندەگى ايلىق ەسەپتىك كورسەتكىش قولدانىلادى.
كولىك قۇرالدارى سالىعى سوماسىن kgd.gov.kz ۆەب-پورتالىنداعى كالكۋلياتوردىڭ جانە «ە-Salyq Azamat» موبيلدى قوسىمشاسىنىڭ كومەگىمەن دەربەس ەسەپتەۋگە بولادى.
بۇل رەتتە سالىق ورگاندارى ەسەپ ايىرىسۋ بالانسىن انىقتاۋ ءۇشىن جىل سايىن ءتيىستى جىلعا جەكە تۇلعالاردىڭ كولىك قۇرالدارىنا سالىناتىن سالىقتى ەسەپتەيدى.
ەسەپتەلگەن سالىق سومالارى تۋرالى اقپارات 2025-جىلعى 11-ناۋرىزدان 31-ناۋرىزعا دەيىن ەكىنشى دەڭگەيلى بانكتەردىڭ موبيلدى قوسىمشالارىن پايدالانۋشىلارعا PUSH حابارلاماسى تۇرىندە جىبەرىلەدى.
سونداي-اق، سالىق سوماسى تۋرالى اقپارات kgd.gov.kz ۆەب- پورتالىنداعى «جەكە تۇلعالار ءۇشىن الداعى تولەمدەر» قىزمەتىندە، سونداي-اق «ە-Salyq Azamat» جانە ەكىنشى دەڭگەيلى بانكتەردىڭ موبيلدى قوسىمشالارىندا ورنالاستىرىلادى.
وسىعان دەيىن ەسكى كولىك سالىعى %50 عا تومەندەيتىنى تۋرالى جازدىق.
