جۇك تاسيتىن ۇشاق تۇرعىن ءۇيدىڭ ۇستىنە قۇلادى

استانا. KAZINFORM - ليتۆا استاناسى ۆيلنيۋستە جۇك تاسيتىن ۇشاق ەكى قاباتتى تۇرعىن ءۇيدىڭ ۇستىنە قۇلادى. اپات سالدارىنان ءبىر ادام قازا تاۋىپ، تاعى ءبىر ادام اۋرۋحاناعا جەتكىزىلدى. بۇل تۋرالى Delphi باسىلىمى حابارلادى.

الدىن الا مالىمەت بويىنشا، DHL كومپانياسىنا تيەسىلى ۇشاقتا ءتورت ادام - ەكى ۇشقىش جانە ەكى جولاۋشى وتىرعان. ال وقىس وقيعا جەرگىلىكتى ۋاقىت بويىنشا 5:31 دە بولعان.

اپاتتى جاعدايدىڭ سەبەبى ءالى انىقتالعان جوق. تەك ءبىر ۇشقىشتىڭ امان قالعانى، ول كابينادان شىعارىلىپ، مەديتسينا قىزمەتكەرلەرىنە تاپسىرىلعانى حابارلاندى.

LRT تەلەارناسىنىڭ مالىمەتىنشە، ۇشاق لەيپتسيگتەن كوتەرىلىپ، ۆيلنيۋس اۋەجايىنىڭ ماڭىندا قۇلاعان. الايدا وقيعا اۋەجايدىڭ جۇمىسىنا اسەر ەتكەن جوق. ازىرگە ۇشاقتا قانداي جۇك بولعانى بەلگىسىز.

- اتالعان اپاتتى جاعداي بويىنشا تەرگەۋ جۇمىستارى ءجۇرىپ جاتىر. وقيعانىڭ ءمان-جايى جاقىن ارادا انىقتالادى، - دەلىنگەن حابارلامادا.

ايتا كەتەيىك، بۇعان دەيىن برازيليادا اۆتوبۋس اپاتقا ۇشىراپ، كەم دەگەندە 17 ادام قازا تاپقانىن جازعان ەدىك.