جەكە سوت ورىنداۋشىلارى 27 مۇگەدەكتىڭ شوتىن زاڭسىز بۇعاتتاپ، جاردەماقىسىنان ايىرعان

борыш
فوتو: pexels.com

استانا. KAZINFORM - ەلوردادا جەكە سوت ورىنداۋشىلار مۇگەدەكتەردىڭ تولەمدەرىن زاڭسىز بۇعاتتاپ، ولاردى جاردەماقىلارىنان ايىرعان، دەپ حابارلايدى استانا قالاسى پروكۋراتۋراسىنىڭ باسپا ءسوز قىزمەتى.

استانا قالاسىنىڭ پروكۋراتۋراسى جەكە سوت ورىنداۋشىلارى مۇگەدەك رەتىندە الەۋمەتتىك جاردەماقى الۋشى 27 بورىشكەردىڭ بانك شوتتارىنا تىيىم سالعانىن انىقتادى.

قازاقستان رەسپۋبليكاسىنىڭ «تولەمدەر جانە تولەم جۇيەلەرى تۋرالى» زاڭىنا سايكەس، مەملەكەتتىك بيۋدجەتتەن جانە (نەمەسە) مەملەكەتتىك الەۋمەتتىك ساقتاندىرۋ قورىنان تولەنەتىن جاردەماقىلار مەن الەۋمەتتىك تولەمدەردى ەسەپكە الۋعا ارنالعان بانك شوتتارىنا تىيىم سالۋعا بولمايدى.

پروكۋرورلىق قاداعالاۋ اكتىسى نەگىزىندە جارتى ميلليون تەڭگە قاراجات قايتارىلىپ، بانك شوتتارى قايتا اشىلىپ، 27 تۇلعانىڭ 1,2 ميلليون  تەڭگە قاراجاتقا قول جەتكىزۋىنە مۇمكىندىك جاسالدى.

قازىرگى ۋاقىتتا قالا پروكۋراتۋراسى ۋاكىلەتتى ورگانمەن بىرلەسىپ، نورماتيۆتىك قۇقىقتىق اكتىلەرگە ءتيىستى وزگەرىستەر ەنگىزۋ ماسەلەسىن قاراستىرۋدا.

سوڭعى جاڭالىقتار