جەكە كاسىپكەرلىكتى توقتاتۋدىڭ وڭاي جولى بار - مينيسترلىك

Фото: primeminister.kz
Фото: primeminister.kz

استانا. KAZINFORM - سوڭعى ۋاقىتتا جەكە كاسىپكەرلىك اشىپ الىپ، كەيىن ونى جابۋ كەزىندە تۇسىنبەۋشىلىككە تاپ بولاتىندار كوپ. بۇل رەتتە، ق ر قارجى مينيسترلىگى مەملەكەتتىك كىرىستەر كوميتەتى مەملەكەتتىك كورسەتىلەتىن قىزمەت باسقارماسىنىڭ باسشىسى دۋمان قانسەيىتوۆ جەكە كاسىپكەرلىكتى توقتاتۋ ءتارتىبى تۋرالى ايتىپ بەردى.

ول جەكەلەگەن ساناتتار بويىنشا جەكە كاسىپكەرلىكتى وڭايلاتىلعان تارتىپپەن توقتاتۋعا مۇمكىندىك بار ەكەنىن اتاپ ءوتتى.

«ول ءۇشىن ق ق س تولەۋشى رەتىندە ەسەپتە تۇرماۋى كەرەك. قالا بەردى، بىرلەسكەن كاسىپكەرلىك نىسانىندا قىزمەتتى جۇزەگە اسىرمايتىندار، جەكەلەگەن قىزمەت تۇرلەرىن جۇزەگە اسىرمايتىندار، تاۋەكەلدەردى باعالاۋ جۇيەسى ءىس-شارالارىنىڭ ناتيجەلەرى بويىنشا ىرىكتەمەلى سالىقتىق تەكسەرۋلەر تىزىمىندە جوق ازاماتتار، تاۋەكەل دارەجەسىن باعالاۋ نەگىزىندە ەرەكشە ءتارتىپ بويىنشا جۇرگىزىلەتىن سالىقتىق تەكسەرۋلەردىڭ جارتىجىلدىق كەستەسىندە جوق جەكە كاسىپكەرلىك يەلەرى، سالىق، الەۋمەتتىك تولەمدەر بويىنشا بەرەشەگى جوق ازاماتتار، تاۋەكەلدەردى باسقارۋ جۇيەسى بويىنشا تاۋەكەلدەردىڭ جوعارى دەڭگەيى جوق تۇلعالار جەكە كاسىپكەرلىكتى وڭايلاتىلعان تارتىپپەن توقتاتۋعا مۇمكىندىك الا الادى»، - دەدى ول.

مۇنداي تالاپتارعا ساي كەلسە، جەكە كاسىپكەرلىك يەسى ءوزىنىڭ ورنالاسقان جەرى بويىنشا سالىق ورگانىنا ءبىر مەزگىلدە قىزمەتىن توقتاتۋ تۋرالى سالىقتىق ءوتىنىشتى، تاراتۋ سالىق ەسەپتىلىگىن جانە باقىلاۋ-كاسسا ماشينالارىن ەسەپتەن شىعارۋ تۋرالى سالىقتىق ءوتىنىشتى (ەگەر بار بولسا) تاپسىرۋ قاجەت.

سالىق ورگانى سالىق مىندەتتەمەسى ورىندالعان كۇننەن باستاپ 3 جۇمىس كۇنىنەن كەشىكتىرمەي جەكە كاسىپكەرلىكتى تىركەۋ ەسەبىنەن شىعارادى. تىركەۋ ەسەبىنەن شىعارۋ تۋرالى اقپاراتتى ۋاكىلەتتى ورگاننىڭ ينتەرنەت-رەسۋرسىندا ورنالاستىرادى. سونداي-اق سالىق تولەۋشى ءوزىنىڭ جەكە كابينەتىنەن دە وزگەرىستەردى تەكسەرە الادى.

سوڭعى جاڭالىقتار