جەكە كۋالىكتى شۇعىل جاساتۋ باعاسى ارزاندايدى

 ىشكى ىستەر مينيسترلىگى جەكە كۋالىكتى جەدەل تارتىپپەن بەرۋ قۇنىن تومەندەتۋدى جوسپارلاپ وتىر، دەپ حابارلايدى Kazinform. 

اشىق ن ق ا پورتالىندا جاريالانعان بۇيرىق- جوباسىندا جازىلعانداي، ەندى استانا، الماتى، شىمكەنت قالالارىندا جانە وبلىس ورتالىقتارىندا باعا مىناداي بولماق:

- قۇجات 1 جۇمىس كۇنىندە دايىندالاتىن بولسا - 3372,45 تەڭگە (قازىر 4983 تەڭگە)؛

- كۋالىك 3 جۇمىس كۇنىندە دايىندالاتىن بولسا - 1770,88 تەڭگە (قازىر 2752 تەڭگە)؛

ال وبلىستاردىڭ اۋداندارى مەن قالالارىندا قۇجات تەك 7 جۇمىس كۇنى ىشىندە دايىن بولادى. ونىڭ قۇنى 677 تەڭگە 95 تيىن مولشەرىندە (قازىر 1116 تەڭگە) بەكىتىلدى.

«تۇزەتۋلەر مەملەكەتتىك مونوپولياعا جاتاتىن ىشكى ىستەر مينيسترلىگىنىڭ «اقپاراتتىق-وندىرىستىك ورتالىعى» قىزمەتتەرىنىڭ باعاسىن تومەندەتۋ جاعىنا قاراي، باسەكەلەستىكتى قورعاۋ جانە دامىتۋ اگەنتتىگىنىڭ تۇزەتۋلەرىنە بايلانىستى ەنگىزىلەدى»، - دەپ تۇسىندىرمە بەرىلگەن بۇيرىق- جوباسىنا.

قۇجات 30-قازانعا دەيىن كوپشىلىك تالقىلاۋدا بولادى.