جەدەل جاردەم مەن دارىگەرگە جۇدىرىق الا جۇگىرگەندەرگە جازا قاتاڭدايدى

استانا. KAZINFORM - سوڭعى 5 جىلدا قىزمەتتىك بورىشىن ورىنداۋ بارىسىندا 158 مەديتسينا قىزمەتكەرى زارداپ شەككەن. بۇل تۋرالى سەنات دەپۋتاتتارىنىڭ ساۋالىنا پرەمەر-ءمينيستردىڭ ورىنباسارى تامارا دۇيسەنوۆانىڭ جاۋابىندا ايتىلعان.

«جەرگىلىكتى اتقارۋشى ورگان دەرەگىنشە، 2019-2023 -جىلدارى ارالىعىندا قىزمەتتىك بورىشىن ورىنداۋ بارىسىندا 158 مەديتسينا قىزمەتكەرى (2019 -جىلى - 5، 2020 -جىلى - 5، 2021 -جىلى - 10، 2022 -جىلى - 46، 2023 -جىلى - 80) زارداپ شەكتى. مەديتسينا قىزمەتكەرلەرىنە كۇش كورسەتىلگەن جاعدايدا قازاقستان رەسپۋبليكاسىنىڭ قولدانىستاعى زاڭناماسىنىڭ جالپى ەرەجەلەرى قولدانىلادى»، - دەدى ۇكىمەت باسشىسىنىڭ ورىنباسارى جاۋابىندا.

ونىڭ اتاپ وتۋىنشە، مەديتسينا قىزمەتكەرلەرىن قورعاۋدى كۇشەيتۋ، سونداي-اق ولاردىڭ كاسىبي مىندەتتەرىن قۇرمەتتەۋ ماقساتىندا دەنساۋلىق ساقتاۋ مينيسترلىگى مەديتسينالىق قىزمەتكەرلەرگە قىزمەتتىك بورىشىن ورىنداۋ بارىسىندا ولارعا كۇش كورسەتىلگەنى ءۇشىن قىلمىستىق جاۋاپكەرشىلىك بولىگىندە قىلمىستىق كودەكسكە تۇزەتۋلەر ەنگىزۋگە باستاماشىلىق جاسادى.

«دايىندالعان زاڭنامالىق تۇزەتۋلەر باس پروكۋراتۋرا جانىنداعى ۆەدومستۆوارالىق جۇمىس توبىنىڭ (ۇقك، ىشكى ىستەر، دەنساۋلىق ساقتاۋ، ادىلەت، قورعانىس مينيسترلىگى، توتەنشە جاعدايلار مينيسترلىكتەرىنىڭ قاتىسۋىمەن) وتىرىسىندا تالقىلاۋعا بەلگىلەنگەن تارتىپتە ۇسىنىلادى»، - دەدى تامارا دۇيسەنوۆا.

ەسكە سالساق، 27-قاڭتاردا ەر ادام شاقىرۋعا كەلگەن دارىگەرلەر بريگاداسىنىڭ جۇرگىزۋشىسىمەن سوزگە كەلىپ قالعان.

سودان سوڭ اشۋلانىپ، جۇدىرىق الا جۇگىرگەن.

كۇدىكتى كەيىن وبلىس ورتالىعىنان 200 شاقىرىم قاشىقتىقتا ورنالاسقان قىستاقتا جاسىرىنعان جەرىنەن ۇستالدى.

اۆتور

مارلان جيەمباي