جەدەل جاردەم كولىكتەرىنىڭ تاپشىلىعى: جاعدايى كۇردەلى وڭىرلەر انىقتالدى
استانا. KAZINFORM - جەدەل مەديتسينالىق جاردەم قىزمەتىنىڭ قاجەتتى جابدىقتارمەن تولىق قامتاماسىز ەتىلۋى - بريگادانىڭ ناۋقاستارعا بارىنشا شۇعىل جەتۋىنە بىردەن-ءبىر اسەر ەتەتىن فاكتور. قازىر ءبىرقاتار وڭىردە وسى قىزمەتكە تيەسىلى كولىكتەردىڭ تاپشىلىعى بار. ماسەلەن، وسى جازدا ەلوردالىق جەدەل جاردەم ستانتسياسىنىڭ دارىگەرلەرى پاتسيەنتتەرگە تاكسيمەن باراتىنى جاريا بولدى. استانا قالاسى قوعامدىق دەنساۋلىق ساقتاۋ باسقارماسىنىڭ مالىمەتىنشە، كۇتۋ ۋاقىتىن قىسقارتۋ ماقساتىندا ستانتسيا كولىكتى جالعا الۋ شارتىن جاساسقان. بۇل شارا جەدەلدىكتىڭ 3، 4-ساناتى بويىنشا شاقىرتۋلارعا شىعۋ ءۇشىن قاراستىرىلعان.
«ەل بويىنشا 379 بريگادا جەتىسپەيدى دەگەن اقپارات بار»
ماسەلەنى شەشۋ ماقساتىندا پارلامەنت ماجىلىسىندە ارنايى كەڭەس ءوتتى. دەپۋتات اسحات ايماعامبەتوۆ قازىر سانيتارلىق كولىكپەن قامتاماسىز ەتۋ اكىمدىكتەرگە جۇكتەلگەنىن ناقتىلادى.
«بۇل سالاداعى عيمارات، كولىك ماسەلەسى زاڭ بويىنشا اكىمدىكتەردىڭ جاۋاپكەرشىلىگى سانالادى. دەنساۋلىق ساقتاۋ مينيسترلىگىنەن تاريفتەر، جالاقى، ادىستەمە، جالپى باسقارۋ باعىتى تالاپ ەتىلەدى. بۇگىندە جەدەل جاردەمگە قاتىستى جاعداي وتە قيىن. نورماتيۆ بويىنشا 10 تۇرعىنعا 1 بريگادا قىزمەت ەتۋى ءتيىس. الايدا قازىر رەسپۋبليكا بويىنشا بريگادالاردىڭ جاساقتالۋى 73 پايىز دەڭگەيىندە. جالپى، ەل بويىنشا 379 بريگادا جەتىسپەيدى دەگەن اقپارات بار. سانيتارلىق كولىكتەردىڭ توزۋى 58 پايىزعا جەتكەن. تاريفكە توقتالساق، ونىڭ دەڭگەيى تىم تومەن، سوندىقتان جالاقى دا وتە تومەن، كولىكتەر دە ەسكىرگەن. سولتۇستىك وڭىرلەرگە ديزەل وتىنىمەن جۇرەتىن H350 (Hyundai) اۆتوكولىكتەرى ساتىپ الىنعان. قاتتى ايازدى كۇندەرى بۇل كولىكتەردى وتالدىرۋ قيىنعا تۇسەتىنى تۇسىنىكتى. اتاپ ايتقاندا، الىنىپ جاتقان جەدەل جاردەم كولىكتەرىنە قاتىستى سۇراق كوپ»، - دەدى ا. ايماعامبەتوۆ.
«الداعى 5 جىلدا شامامەن 89 ميلليارد تەڭگە ينۆەستيسيا كەرەك»
دەنساۋلىق ساقتاۋ ۆيتسە-ءمينيسترى ەرجان نۇرلىبايەۆتىڭ ايتۋىنشا، ەلىمىزدەگى جەدەل مەديتسينالىق قىزمەت قۇرىلىمىندا 20 وبلىستىق دەربەس ستانتسيا، 330 قوسالقى ستانتسيا ءبولىمى، ونىڭ ىشىندە 98 قالالىق قوسالقى ستانسيا جانە 232 اۋداندىق بولىمشە جۇمىس ىستەپ تۇر. ءبىر اۋىسىمدا شاقىرتۋلارعا 1500-گە جۋىق جەدەل جاردەم بريگاداسى قىزمەت كورسەتەدى. بالانستا ءتۇرلى ساناتتاعى 2359 جەدەل جاردەم كولىگى بار. ونىڭ 1472 سى قالادا، 887 سى اۋىلدىق جەرلەردە قىزمەت كورسەتىپ ءجۇر. سانيتارلىق كولىكتىڭ توزۋى - شامامەن %59، ال %18 ى ەسەپتەن شىعارۋعا جاتادى.
سونىمەن قاتار ول «103» جەلىسىنە شاقىرتۋ تۇسكەننەن كەيىن ناۋقاسقا جەدەل جاردەمنىڭ جەتۋ ۋاقىتىنا توقتالدى. جەدەلدىكتىڭ ءبىرىنشى ساناتى اياسىندا 9 مينۋت، 2-سانات - 12 مينۋت، 3-سانات - 17,8 مينۋت، ال ءتورتىنشى سانات - 25 مينۋت شاماسىندا. بۇل دەرەكتەر بيىلعى 9 ايداعى قورىتىندى بويىنشا جاسالىپ وتىر.
«جەدەل مەديتسينالىق جاردەم بريگادالارىنىڭ ورتاشا تاۋلىكتىك جۇكتەمەسىنە توقتالساق، ولار 12 شاقىرتۋعا بارادى. وسى جىلعى 9 ايدىڭ قورىتىندىسى بويىنشا ەلىمىزدە شاقىرتۋلار سانى 3 پايىزعا ارتىپ، 6 ميلليون 400 مىڭعا جەتتى. سونىمەن قاتار، جەدەل جاردەمنىڭ كەشىگۋ جاعدايلارى بىلتىرعى 9 ايمەن سالىستىرعاندا 1 پايىزعا كوبەيىپ، 290 مىڭعا جۋىقتادى. بىلتىر 9-ايدا 213 مىڭ كەشىگۋ دەرەگى تىركەلگەن»، - دەدى ە. نۇرلىبايەۆ.
ونىڭ سوزىنە قاراعاندا، ەلىمىز بويىنشا جەدەل مەديتسينالىق كومەك بريگادالارىنىڭ جاساقتالۋ دەڭگەيى - 73 پايىز. نورماتيۆ بويىنشا ءبىر بريگادا 10 مىڭ تۇرعىنعا ەسەپتەلگەن. بۇل رەتتە، جاساقتالۋدىڭ تومەن دەڭگەيى:
قىزىلوردا وبلىسى (59 پايىز)
سولتۇستىك قازاقستان وبلىسى (57 پايىز)
اقتوبە وبلىسى (55)
استانادا (39,5 پايىز) بايقالدى.
«جەدەل مەديتسينالىق كومەككە تيەسىلى عيماراتتاردىڭ 80 پايىزى ەسكىرگەن. ولاردى پايدالانۋدىڭ ورتاشا كورسەتكىشى 50 جىل شاماسىندا. بۇدان بولەك، جەدەل جاردەم قىزمەتىندەگى سانيتارلىق اۆتوكولىك جاعدايىنا توقتالساق، باتىس قازاقستان، پاۆلودار، اباي، قوستاناي، شىعىس قازاقستان، سولتۇستىك قازاقستان، جەتىسۋ، تۇركىستان جانە استانا، الماتى، شىمكەنت قالالارىندا مەديتسينالىق كولىكتەردىڭ توزۋ دەڭگەيى جوعارى. ولاردىڭ كەيبىرىندە توزۋ دەڭگەيى 80 پايىزعا جاقىن»، - دەدى ۆيتسە-مينيستر.
تىركەۋدە تۇرعان جەدەل جاردەم كولىكتەرىنىڭ تەك 81 پايىزى عانا كۇندەلىكتى قىزمەت كورسەتىپ ءجۇر. استانادا جاعداي كۇردەلى، مۇندا جەدەل جاردەم كولىكتەرىنىڭ 41 پايىزى عانا شاقىرتۋعا شىعا الادى. ال اقتوبە وبلىسىندا كولىكتەردىڭ %65، اتىراۋ وبلىسىندا - %69، ماعىستاۋ وبلىسىندا - %75، تۇركىستان وبلىسىندا 76 پايىزى ءجۇرىپ تۇر. ول دەنساۋلىق ساقتاۋ مينيسترلىگى قارجى مينيسترلىگىنە كولىكتەردىڭ توزۋى نورمالارىن قايتا قاراۋدى تالاپ ەتەتىن حات جولداعانىن ايتتى. قالالىق سانيتارلىق كولىكتەر ءۇشىن 4 جىل، اۋىلدارعا 5 جىل مەرزىمدى قاراستىرۋ ۇسىنىلدى.
«2024 -جىلعا ەلىمىز بويىنشا 400 دەن استام جەدەل جاردەم كولىگىن الۋ كەرەك. ال كەلەسى جىلى 540 اۆتوكولىكتى قامتاماسىز ەتكەن ءجون. الداعى 5 جىلدا جاڭا سانيتارلىق كولىكپەن تولىقتاي قامتاماسىز ەتۋ ءۇشىن شامامەن 89 ميلليارد تەڭگە ينۆەستيسيا كەرەك»، - دەدى ەرجان نۇرلىبايەۆ.
دەنساۋلىق ساقتاۋ مينيسترلىگى مالىمەتىنشە، ەلورداداعى كولىكتەردىڭ توزۋى 83 پايىز دەڭگەيىندە جانە 25 پايىزىن ەسەپتەن شىعارۋ كەرەك. قازىر قالاداعى اۆتوپاركتە 146 سانيتارلىق كولىك بار. بۇل تۇرعىدا استانا قالاسى اكىمىنىڭ ورىنباسارى ەرىك مەيىرحانوۆ وسى 146 كولىكتىڭ تەك 63 ى جەدەل جاردەم جەلىسىندە جۇرگەنىن، 22 سى جوندەۋگە قويىلعانىن، ال قالعان 61 ىن قالپىنا كەلتىرۋ مۇمكىن ەمەس ەكەنىن ايتتى.
«سوندىقتان بيىل تامىز ايىندا ليزينگكە 35 تەحنيكانى الۋ تۋرالى كەلىسىمشارت جاسالدى. سونىمەن قاتار، تاعى 12 سى قالالىق جەدەل مەديتسينالىق كومەك ستانتسياسى قاراجاتى ەسەبىنەن ساتىپ الىنادى. بۇل كولىكتەر قاراشا ايىندا جەتكىزىلەدى. 2025 -جىلى قالالىق ستانتسيا قوسىمشا 12 كولىك الادى»، - دەدى ە. مەيىرحانوۆ.
«جەدەل جاردەم كولىگى ءبىر جىلدا شامامەن 120 مىڭ ك م ءجۇرىپ تاستايدى»
ءماجىلىس دەپۋتاتى جۇلدىز سۇلەيمەنوۆانىڭ پايىمداۋىنشا، كوپ جاعدايدا ءوڭىر اكىمدىكتەرى قاراجاتتى ينفراقۇرىلىمعا، جول قۇرىلىسىنا بولۋگە تىرىسادى دا، ال جەدەل جاردەم قىزمەتىنە نازار اۋدارمايدى. دەپۋتات بۇل سالادا كۇردەلى جاعداي بايقالىپ تۇرعانىن ايتادى، ياعني قازىر جەدەل جاردەم قىزمەتىنىڭ وزىنە جەدەل كومەك كەرەك سياقتى. الايدا جەرگىلىكتى اتقارۋشى ورگانداردىڭ بۇل باعىتتاعى جۇمىسى كوڭىل كونشىتپەيتىنىن تىلگە تيەك ەتتى.
دەپۋتات اسحات ايماعامبەتوۆ تە وڭىرلەردە بۇل سالاعا ءتيىستى دەڭگەيدە نازار اۋدارماي وتىرعانىن العا تارتتى.
«سانيتارلىق كولىكتەردى قامتاماسىز ەتۋ - زاڭ بويىنشا اكىمدىكتەردىڭ مىندەتى. تاعى ءبىر ماسەلە ەسكىرگەندەرىن تىزىمنەن شىعارۋعا قاتىستى. قازىر جەدەل جاردەم قىزمەتىندەگى كولىك 7 جىل بالانستا تۇرۋ كەرەك دەگەن تۇسىنىك بار. بۇل كولىكتەر ءبىر جىلدا ورتاشا ەسەپپەن 120 مىڭ شاقىرىم ءجۇرىپ تاستايدى. وسىنى ەسكەرسەك، كولىكتەر 3 جىلدا شاشىلىپ قالادى، 7 جىلعا قالاي جەتكىزەدى؟ سوندىقتان، بۇل ماسەلەنى شۇعىل شەشۋ كەرەك، 3-4 جىل مەرزىمدى قاراستىرعان ءجون. جالپى، پاندەميا كەزىندە بۇل كولىكتەر وتە كوپ ءجۇردى. اسىرەسە، اۋىلدارعا قاتىنايتىن جەدەل جاردەم كولىكتەرى توزىپ قالدى»، - دەدى ا. ايماعامبەتوۆ.
ونىڭ ايتۋىنشا، بۇل ماسەلەنى شەشۋ ءۇشىن پارلامەنت دەپۋتاتتارى ءوڭىر ماسليحاتتارىمەن تىعىز قارىم-قاتىناستا جۇمىس ىستەيدى.
«جاعداي وتە كۇردەلى. كولىكتەردىڭ 60 پايىزعا جۋىعى توزعانىن، 18 پايىزىن ەسەپتەن شىعارۋ كەرەك ەكەنىن ەسكەرسەك، بۇل سالاعا ەرەكشە ءمان بەرۋ كەرەك. قازىر كەيبىر وڭىرلەردىڭ اكىمدىكتەرىندە وسى ىسكە جاۋاپتى ادامداردىڭ ناقتى جوسپارى جوق ەكەنىنە كوزىمىز جەتتى. سونىمەن قاتار، بۇل وڭىرلەردەگى ءماسليحات دەپۋتاتتارى وسى ماسەلەنى نەگە كوتەرمەي جاتىر؟! جەدەل جاردەم كولىگىن الار كەزدە، وڭىرلەر سول اۋماقتاعى كليماتتىق جاعدايدى ەسكەرۋى شارت. وسىعان سايكەس ساپالى اۆتوكولىكتەر كەرەك»، - دەدى اسحات ايماعامبەتوۆ.
اۆتور
رۋسلان عابباسوۆ
