جازعى وليمپيا ويىندارىنداعى قازاقستان قۇراماسىنىڭ جەتىستىكتەرى مەن كەمشىلىكتەرى

استانا. قازاقپارات – 26-شىلدە مەن 11-تامىز ارالىعىندا فرانسيا استاناسى پاريجدە XXXIII جازعى وليمپيا ويىندارى ءوتتى. بۇل ءىس- شاراعا 206 ەلدەن كەلگەن 10,5 مىڭنان استام سپورتشى قاتىستى.

وسى وليمپيا ويىندارىنا قازاقستان رەسپۋبليكاسىنىڭ اتىنان 80 سپورتشى قاتىستى، ولار 25 سپورت تۇرىنەن 92 جولداما جەڭىپ الدى.

«ولاردىڭ ىشىندە جەڭىل اتلەتيكا، ءجۇزۋ، ۆەلوشوسسە، ساداق اتۋ، سپورتتىق ورمەلەۋ، گرەك-ريم كۇرەسى، ەركىن كۇرەس، سپورتتىق گيمناستيكا، ستەند اتۋ، مىلتىقپەن اتۋ، قازىرگى بەسسايىس، برەيكينگ، بوكس، ۆەلوترەك، ۇستەل تەننيسى، سەمسەرلەسۋ، بايداركا جانە كانوەمەن ەسۋ، اكادەميالىق ەسۋ، تاەكۆوندو، كوركەم گيمناستيكا، تەننيس، دزيۋدو، ترياتلون، بادمينتون جانە باتۋت گيمناستيكاسى بار.

وليمپيادا قارساڭىندا بريتاندىق Inside the Games جۋرنالى ورتالىق ازيا ەلدەرى ءۇشىن بولجامدار جاساعان ماقالاسىن جاريالادى. «After Tokyo dud, Central Asian countries may struggle again in Paris» اتتى ماقالادا قازاقستاننىڭ پاريجدە التىن مەدال الا المايتىنى تۋرالى بولجام ايتىلدى. سەبەپتەرى رەتىندە كەلەسى جاعدايلار اتالدى:

- 8-10 جىل بۇرىن باستالعان جۇيەلى اقاۋلار؛

- ازيا ويىندارىنداعى ساتسىزدىكتەن كەيىن رەفورمالارعا دايىندالۋعا بەرىلگەن ۋاقىتتىڭ جەتكىلىكسىزدىگى، ياعني بار بولعانى 8-9 اي»، - دەپ جازدى ق ر تۋريزم جانە سپورت مينيسترلىگى.

الايدا، قازاقستاندىق سپورتشىلار بۇل بولجامداردى جوققا شىعارىپ، پاريجدەگى وليمپيا ويىندارىندا ەلەۋلى جەتىستىكتەرگە جەتتى. قازاقستان قۇراماسى 1 التىن، 3 كۇمىس جانە 3 قولا مەدال جەڭىپ الىپ، جالپىكوماندالىق ەسەپتە 43-ورىندى يەلەندى. توكيوداعى وليمپيا ويىندارىمەن سالىستىرعاندا، ايتارلىقتاي العا جىلجۋ بار: توكيودا قازاقستان 8 قولا مەدالمەن 83-ورىندى يەلەنسە، پاريجدە كوماندا 40 ورىنعا كوتەرىلدى.

«اسىرەسە، دزيۋدو مەن سپورتتىق گيمناستيكاداعى جەتىستىكتەردى ەرەكشە اتاپ ءوتۋ كەرەك. ەلدوس سمەتوۆ تاۋەلسىز قازاقستان تاريحىندا دزيۋدودان العاشقى التىن مەدالدى جەڭىپ الدى. ناريمان قۇربانوۆ سپورتتىق گيمناستيكادان تاريحي كۇمىس مەدالدىڭ يەگەرى اتانسا، الەكساندرا لە مەن يسلام ساتپايەۆ ارالاس پنيەۆماتيكالىق اتۋدا قولا مەدال ولجالادى. سپورتتىق ورمەلەۋدەن ءامىر مايمۇراتوۆ ىرىكتەۋ كەزەڭىندە 4,89 سەكۋندتىق ناتيجەمەن وليمپيادا رەكوردىن جاڭارتتى.

وليمپيا ويىندارىنىڭ بارلىق مەدال يەگەرلەرى قازاقستان تۋمالارى سانالادى، بۇل ەلدىڭ ىشكى الەۋەتىن جانە لەگيونەرلەرگە تاۋەلسىزدىگىن كورسەتەدى. تاجىريبەلى سپورتشىلار - دەمەۋ جادىرايەۆ، عۇسمان قىرعىزبايەۆ جانە نازىم قىزايباي جوعارى شەبەرلىك پەن دايىندىق دەڭگەيىن كورسەتتى»، - دەيدى ۆەدومستۆودان.

دەگەنمەن، قول جەتكىزىلگەن جەتىستىكتەرگە قاراماستان، رەفورمالار مەن وزگەرىستەردى قاجەت ەتەتىن سپورت تۇرلەرى دە بار.

«مۇقيات نازار اۋدارۋدى قاجەت ەتەتىن سپورت تۇرلەرى - بوكس، تەننيس، جەڭىل اتلەتيكا جانە ۆەلوسپورت. اتالعان سپورت تۇرلەرىندەگى ناتيجەلەر كۇتكەن دەڭگەيگە سايكەس كەلمەيدى. بۇل سپورت تۇرلەرىندە باسقارۋ جۇيەسىن اۋىستىرۋ، دامۋ ستراتەگياسىن قايتا قاراۋ، سونداي-اق سپورتشىلاردى حالىقارالىق ارەنادا باسەكەگە قابىلەتتىلىكتى قامتاماسىز ەتۋ ءۇشىن كۇشەيتىلگەن دايىندىق قاجەت. دەگەنمەن، وسى سپورت تۇرلەرىندەگى ساتسىزدىكتەرگە قاراماستان، جالپى العاندا، قۇراما تابىستى ونەر كورسەتتى»، - دەلىنگەن مينيسترلىك مالىمەتىندە.

اۆتور

اسحات رايقۇل