جايىقتا سۋ دەڭگەيى كوتەرىلىپ، ەسىلدە تومەندەپ كەلەدى

استانا. KAZINFORM - باتىس قازاقستان وبلىسىندا جايىق وزەنىندە سۋ دەڭگەيىنىڭ كوتەرىلۋى ساقتالۋدا. بۇل تۋرالى ت ج م وكىلى اسقار ءشارىپ ايتتى.

«باتىس قازاقستان وبلىسىندا جايىق وزەنىندە سۋ دەڭگەيىنىڭ كوتەرىلۋى ساقتالۋدا. قاپشىقتار توسەۋ، قورعاۋ بەكەتتەرىن سالۋ جانە سۋ باسقان ايماقتاردا سۋ ايداۋ جۇرگىزىلىپ جاتىر. الدىن الا ەۆاكۋاتسيالانعان تۇرعىندار ەۆاكۋاتسيالىق پۋنكتتەر مەن تۋىستارىنىڭ ۇيىلەرىندە. سونىمەن قاتار جانۋارلار دا قۇتقارىلۋدا. وڭىردە بارلىعى 1,2 ميلليوننان استام قاپشىق 22 مىڭ توننا ينەرتتى ماتەريال توسەلدى»، - دەدى ول ورتالىق كوممۋنيكاتسيالار قىزمەتىندەگى بريفينگتە.

ونىڭ ايتۋىنشا، اتىراۋ وبلىسىندا 1 اپتا ىشىندە جىلوي اۋدانىنىڭ قۇلسارى قالاسىندا جىلجىمالى سورعى ستانسا كومەگىمەن 86 مىڭ تەكشە مەتردەن استام سۋ سورىلدى.

«قازىرگى ۋاقىتتا سولتۇستىك قازاقستان وبلىسىندا ۇيلەردى سۋ باسۋ وقيعاسى تىركەلگەن جوق. ەسىل وزەنى سۋى دەڭگەيىنىڭ تومەندەۋى بايقالادى. وسى ۋاقىتتا 24496 ادام ۇيلەرىنە ورالدى. 8850 ادام، ونىڭ ىشىندە 3840 بالا ەۆاكتساتسيالىق پۋنكتتەرگە جايعاسقان. 4680 تۇرعىن ءۇي جانە 2774 اۋلا اۋماعىندا سۋ باعىتى بۇرىلىپ، سۋ سورىلدى. 11,5 ميلليون تەكشە مەتردەن استام ەرىگەن قار سۋ سورىپ شىعارىلدى. 5,3 ميلليارد قاپشىق جانە 1,5 ميلليون توننادان استام ينەرتتى ماتەريال توسەلدى»، - دەدى اسقار ءشارىپ.