19:13, 23 - مامىر 2024 | GMT +5
جايىق سۋى تاسىدى: اتىراۋ-ورال جولىنىڭ 80-85-شاقىرىم ارالىعى جابىلۋى مۇمكىن
اتىراۋ. KAZINFORM - اتىراۋ-ورال تراسساسىنىڭ 80-85-شاقىرىمىنىڭ ارالىعى جابىلۋى مۇمكىن.
اتىراۋ وبلىسى اكىمىنىڭ ورىنباسارى قايرات نۇرتايەۆتىڭ ايتۋىنشا، جايىق وزەنىنىڭ سۋى ارناسىنان اسقان.
وسىعان بايلانىستى اتىراۋ-ورال تراسساسىنىڭ 80-85 شاقىرىمى ارالىعىندا جەڭىل اۆتوكولىك قوزعالىسى بۇگىننەن باستاپ توقتاتىلۋى مۇمكىن.
كولىك جۇرگىزۋشىلەرىنە بالاما نۇسقا رەتىندە وبلىستىق ماڭىزى بار اتىراۋ-يندەر تراسساسىمەن ءجۇرۋ ۇسىنىلىپ وتىر.
ماحامبەت جانە يندەر اۋدانىنىڭ جايىق وزەنىنىڭ وڭ جاعالاۋىندا ورنالاسقان ەلدى مەكەندەرىنە قاتىناۋ ءۇشىن ماحامبەت-ورتاقشىل اۋىلىنىڭ ماڭىنداعى كوپىردەن وتۋگە بولادى.
ەسكە سالا كەتەلىك، بۇدان بۇرىن اتىراۋ-يندەر تراسساسى سۋ وتكىزەتىن 6 قۇبىر سالۋ ءۇشىن تاعى ۋاقىتشا جابىلاتىنىن جازعان ەدىك.
