جايىق دەڭگەيى اتىراۋ وبلىسىنىڭ 2 اۋدانىندا قاۋىپتى بەلگىدەن اسىپ كەتتى

Под угрозой затопления 5 населенных пунктов вблизи Атырау
فوتو: اتىراۋ وبلىسىنىڭ اكىمدىگى

استانا. KAZINFORM - جايىق وزەنىندەگى سۋ دەڭگەيى يندەربور جانە ماحامبەت اۋداندارىنداعى سۋ بەكەتتەرىندە قاۋىپتى بەلگىدەن اسىپ ءتۇسىپ جاتىر. بۇل تۋرالى ۇكىمەت وتىرىسىندا پرەمەر-ءمينيستردىڭ ورىنباسارى قانات بوزىمبايەۆ ايتتى.

«قازىر جايىق وزەنىندەگى سۋ دەڭگەيى يندەربور جانە ماحامبەت اۋداندارىنداعى سۋ بەكەتتەرىندە قاۋىپتى بەلگىدەن اسىپ ءتۇسىپ جاتىر. وڭىردە بوگەتتەردى كۇشەيتۋ جۇمىستارى جالعاسادى. وسى وڭىردە بارلىعى 500 شاقىرىمنان استام بوگەت سالىنعان بولاتىن. ەلىمىزدىڭ وڭىرىندە جەرگىلىكتى اۋقىمداعى توتەنشە جاعداي رەجيمى ساقتالىپ وتىر. اقتوبە وبلىسىندا 2 ەلدى مەكەن ءالى دە كولىك قاتىناسىنسىز. ولار ازىق-تۇلىكپەن جانە ءدارى-دارمەكپەن قامتاماسىز ەتىلگەن. ءۇش وڭىردە 10 كۇيدىرگى كومىلگەن جەردى سۋ باسقان بولاتىن. قازىر ءتيىستى قىزمەتتەر جەرگىلىكتى جەرلەردە جەدەل ديزەنفەكسيالىق ءىس-شارالار جۇرگىزىپ جاتىر»، - دەدى ۇكىمەت باسشىسىنىڭ ورىنباسارى.

ۆيتسە-پرەمەر دەرەگىنشە، سۋ تاسقىنىنا قارسى ءىس-شارالاردى جۇرگىزۋ ءۇشىن 7 مىڭنان استام ادام جانە 1900 بىرلىك تەحنيكا، ونىڭ ىشىندە 6 اۋە كەمەسى جۇمىلدىرىلدى. توتەنشە جاعدايلار مينيسترلىگى، پوليتسيا، ۇلتتىق ۇلان، قورعانىس مينيسترلىگى، جەرگىلىكتى اتقاركشى ورگاندار كۇشتەرىمەن قۇرالدارى تارتىلدى. جەكە ۇيىمدار مەن ەرىكتەلەر قاتىسىپ جاتىر.

«سۋ باسۋ ايماقتارىنان 119 مىڭنان استام ادام ەۆاكۋاتسيالاندى. ونىڭ 44 مىڭى - بالالار. بۇگىنگى تاڭدا 55600 ادام ۇيلەرىنە ورالدى. ەۆاكوپۋنكتتەردە شامامەن 5 مىڭ ادام قالدى، تۋىستارىندا 58 مىڭنان استام ادام ورنالاسقان»، - دەدى قانات بوزىمبايەۆ.

ونىڭ ايتۋىنشا، سۋ تاسقىنى سالدارىنان ەلىمىزدە 12908 تۇرعىن ءۇي سۋ استىندا قالدى. ونىڭ ىشىندە 3 وڭىردە 264 ءۇي ءالى دە سۋ استىندا قالىپ وتىر. سونداي-اق 25921 ساياجاي ۋچاسكەسى سۋدان زارداپ شەكتى. ونىڭ ىشىندە 18025 ساياجاي ءۇيى بار. زارداپ شەككەن ۇيلەردى جانە ساياجايلاردى تالداۋ جۇمىستارى قازىر جالعاسىپ جاتىر. كەلەسى اپتادا ءتيىستى شىعىن سوماسى بەلگىلى بولادى.

اۆتور
مارلان جيەمباي

سوڭعى جاڭالىقتار