جايلى مەكتەپتەر ءبىلىم وشاعىنا اسا مۇقتاج وڭىرلەردە سالىنۋى ءتيىس - ولجاس بەكتەنوۆ
استانا. KAZINFORM - جايلى مەكتەپتەر وقۋشىلارعا ىڭعايلى ءارى ءبىلىم بەرۋ دەڭگەيى جوعارى بولۋى ءتيىس. بۇل تۋرالى ۇكىمەت وتىرىسىندا پرەمەر-مينيستر ولجاس بەكتەنوۆ ايتتى.
«جايلى مەكتەپ» ۇلتتىق جوباسىنىڭ ەلىمىزگە كەرەكتى، وتە ماڭىزدى جوبا ەكەنىن ءبارىمىز جاقسى تۇسىنەمىز. بۇل - مەملەكەت باسشىسىنىڭ تىكەلەي باستاماسى. بىرىنشىدەن، جوبا ارقىلى ءۇش اۋىسىمدى جانە اپاتتى جاعدايداعى مەكتەپتەر مەن وقۋشى ورىندارىنىڭ تاپشىلىعى سياقتى كەشەندى پروبلەمالار شەشىمىن تابۋى ءتيىس. ەكىنشىدەن، سالىنىپ جاتقان مەكتەپتەردىڭ سانى ءار ءوڭىردىڭ قاجەتتىلىگىن جانە ونداعى دەموگرافيالىق احۋالدى ەسكەرە وتىرىپ ايقىندالعان»، - دەدى ۇكىمەت باسشىسى.
سوندىقتان پرەمەر-مينيستر ولاردىڭ بارلىعى جاڭا مەكتەپتەرگە اسا مۇقتاج وڭىرلەردە سالىنۋى قاجەتتىگىن باسا ايتتى.
«ونىڭ ۇستىنە، جايلى مەكتەپتەر اتىنا زاتى ساي، وقۋشىلارعا ىڭعايلى ءارى ءبىلىم بەرۋ دەڭگەيى جوعارى بولۋى ءتيىس. بۇل - وقۋ- اعارتۋ مينيسترلىگىنىڭ باستى مىندەتتەرىنىڭ ءبىرى. اتالعان مەكتەپتەرگە جوبالاۋ ساتىنەن باستاپ ەرەكشە ۇلگىدەگى ءادىس-تاسىلدەر قولدانىلىپ وتىر. سوندىقتان ولار قاۋىپسىز جانە ساپالى ءبىلىم بەرۋ ورتاسىنا اينالۋى كەرەك. اتالعان مەكتەپتەر ءاۋ باستان سيفرلىق كامەرالارمەن جابدىقتالىپ، پوليتسيانىڭ جەدەل باسقارۋ ورتالىقتارىنا جالعانۋى ءتيىس»، - دەدى ول.
ۇكىمەت باسمشىسى جاڭا، ينتەراكتيۆتى وقىتۋ ادىستەرىن قولدانۋعا مۇمكىندىك بەرەتىن جوعارى جىلدامدىقتى ينتەرنەت جۇرگىزىلۋى كەرەكتىگىنە دە نازار اۋدارتتى. سونىمەن قاتار وقۋ پروتسەسىنە قاجەتتى زامانعا ساي جابدىقتارمەن جانە جيھازدارمەن قامتاماسىز ەتىلۋى تيىستىگىن باسا ايتتى.
«بۇل مەكتەپتەردى وسكەلەڭ ۇرپاقتى، اسىرەسە شاعىن قالالار مەن اۋىلداردا وقۋشىلاردى باۋراپ الاتىن بىرەگەي ورتالىقتارعا اينالدىرۋ قاجەت. اكىمدىكتەردىڭ نازارىن وسىعان اۋدارعىم كەلەدى. ول ءۇشىن سپورت سەكسيالارى مەن شىعارماشىلىق ۇيىرمەلەر اشىلىپ، بالالارعا قوسىمشا ءبىلىم الۋ ماقساتىندا فيلمدەر كورىپ، ينتەرنەتتەن قاجەتتى اقپارات ىزدەۋ، كىتاپحانادا دايىندالۋ مۇمكىندىگى بەرىلۋى ءتيىس. مۇنىڭ بارلىعى ءبىلىم بەرۋ ساپاسىن، اسىرەسە اۋىلدىق جەرلەردەگى وقىتۋ دەڭگەيىن ارتتىرۋعا ىقپال ەتەدى. بالالار قامقورلىقتى جانە جايلى وقىتۋ پروتسەسىن ناقتى سەزىنۋى كەرەك»، - دەدى ولجاس بەكتەنوۆ.
