جايلى مەكتەپ سالۋدىڭ جاڭا ءتورتىنشى ءتاسىلى ازىرلەندى
استانا. KAZINFORM - جايلى مەكتەپ سالۋدىڭ جاڭا ءتورتىنشى ءتاسىلى ازىرلەندى. بۇل تۋرالى ۇكىمەت وتىرىسىندا «جايلى مەكتەپ» ۇلتتىق جوباسىن ىسكە اسىرۋ بارىسىن بايانداعان وقۋ-اعارتۋ ءمينيسترى عاني بەيسەمبايەۆ ايتتى.
«بىلتىر قازان ايىندا مينيسترلىك ۇلتتىق جوباعا «اتامەكەن» ۇلتتىق پالاتاسىنىڭ جانە سالالىق قاۋىمداستىقتاردىڭ ۇسىنىستارى ەسكەرىلگەن وتاندىق وندىرۋشىلەردى قولداۋ بويىنشا قوسىمشا شارالاردى ەنگىزدى»، - دەدى مينيستر.
ونىڭ اتاپ وتۋىنشە، اتالعان شارالارعا سايكەس:
- جايلى مەكتەپتەرگە قاجەتتى جيھاز «سامۇرىق-قازىنا» جانە «اتامەكەن» تىزىلىمىنە ەنگەن وتاندىق وندىرۋشىلەردەن عانا ساتىپ الىنادى؛
- مەكتەپ قۇرىلىسىندا، ونىڭ ىشىندە سىرتقى قاسبەتتەردە جەرگىلىكتى وندىرۋشىلەردىڭ ونىمدەرى پايدالانىلادى، سونداي- اق ءتيىمدى شارتتارعا نەگىزدەلگەن الدىن-الا كەلىسىمشارت جاساۋ ءتاسىلىن قولدانىلادى.
«ۇلتتىق جوبا ەڭ الدىمەن ءبىلىم بەرۋ ساپاسىن قامتاماسىز ەتۋگە جانە وقۋ پروتسەسىن ۇيىمداستىرۋدىڭ تيىمدىلىگىنە ىقپال ەتۋى ءتيىس. سوندىقتان وقۋ-اعارتۋ مينيسترلىگى «ءبىلىم بەرۋدەگى وزگەرىستەردىڭ 1000 كوشباسشىسى» جوباسى اياسىندا جايلى مەكتەپتەر ءۇشىن جاڭا بۋىن ديرەكتورلارىنىڭ كورپۋسىن ىرىكتەۋدى قولعا الدى. جاڭا مەكتەپتەردى كادرلارمەن قامتاماسىز ەتۋ ءۇشىن جاس كادرلاردىڭ جانە تاجىريبەسى بار مۇعالىمدەردىڭ بىلىكتىلىگىن ارتتىرۋ جولىمەن پەداگوگتەر بازاسى قالىپتاستىرىلىپ جاتىر. ەلىمىزدىڭ جەتەكشى مەكتەپتەرىنىڭ تاجىريبەسى نەگىزىندە وقۋ پروتسەسىنىڭ مازمۇنىن جەتىلدىرۋگە باعىتتالعان ءبىلىم بەرۋدى ۇيىمداستىرۋدىڭ جاڭا مودەلى ازىرلەنۋدە»، - دەدى ول.
عاني بەيسەمبايەۆتىڭ ايتۋىنشا، جايلى مەكتەپتەردىڭ قۇرىلىسى 3 ءتاسىل ارقىلى جۇزەگە اسىرىلادى. بىرىنشىدەن، «سامۇرىق- قازىنا كونستراكشن» ارقىلى مەكتەپتەردىڭ نىسانالى قۇرىلىسى سالىنادى. ەكىنشى، اكىمدىكتەر جەكە ينۆەستورلاردان دايىن عيماراتتاردى تاۋار تۇرىندە ساتىپ الادى. ءۇشىنشى، مەملەكەتتىك- جەكەشەلىك ارىپتەستىك اياسىندا مەكتەپتەر سالىنادى.
«مينيسترلىك ۇلتتىق جوبانى ىسكە اسىرۋعا جەكە ينۆەستيتسيالار تارتۋ ماقساتىندا مەكتەپ سالۋدىڭ جاڭا ءتورتىنشى ءتاسىلىن ازىرلەدى. بۇل ءتاسىل جەكە ينۆەستور جانە جەتەكشى ءبىلىم بەرۋ ۇيىمى قاتىساتىن كونسورتسيۋم قۇرۋ ارقىلى ىسكە اسىرىلادى. ءتورتىنشى ءتاسىلدى ىسكە اسىرۋ كەزىندە مەملەكەتتىك ءبىلىم بەرۋ تاپسىرىسىن ورنالاستىرۋ ارقىلى جانە كەيىنگە قالدىرىلاتىن مىندەتتەمەلەر ەسەبىنەن بيۋجەتكە جۇكتەمە ازايادى جانە قۇرىلىستىڭ قىمباتتاۋ تاۋەكەلدەرى بولمايدى. ينۆەستورلاردى ىرىكتەۋدى اكىمدىكتەر كونكۋرستىق نەگىزدە جۇزەگە اسىراتىن بولادى»، - دەدى مينيستر.
