جانىبەكتە جوق بەلبەۋ: ديماش قۇدايبەرگەن WBC بوكس ۇيىمىنىڭ بەلبەۋىن الدى

استانا.قازاقپارات - قازاقستاندىق ءانشى ديماش قۇدايبەرگەنگە دۇنيەجۇزىلىك بوكس كەڭەسىنىڭ (WBC) قۇرمەتتى بەلبەۋى تابىستالدى. ماراپاتتاۋ ءراسىمى 19-قاراشادا مەكسيكا استاناسى مەحيكودا ءوتتى.

Димаш
Фото: Dimashnews.com

بوكس الەمىندەگى ەڭ بەدەلدى ۇيىمداردىڭ ءبىرى قازاقستاندىق ءانشىنى حالىقارالىق جەتىستىكتەرى مەن حالىقتار اراسىنداعى مادەني بايلانىستى نىعايتۋعا قوسقان ۇلەسى ءۇشىن ماراپاتتادى.

بەلبەۋدى قازاقستاننىڭ WBC دەگى وكىلى ءاليحان جارىلعاپوۆ جانە ۇيىم وكىلدەرى ەكتور سۋلەيمان، حوسە انتونيو اررەولا سۋلەيمان مەن ۆيكتور سيلۆا تابىستادى.

ديماشقا بەلبەۋ بەرۋ تۋرالى ۇسىنىستى WBC پرەزيدەنتى ماۋريسيو سۋلەيماننىڭ ءوزى ايتقان. الايدا ول دەنساۋلىعىنا بايلانىستى ماراپاتتاۋ راسىمىنە قاتىسا الماعان.

«ءبىز مۇنداي بەلبەۋدى وتە سيرەك تابىستايمىز. ديماش - ەرەكشە ادام، مۋزىكا الەمىنىڭ اڭىزى. ول الەمدىك دەڭگەيدە مويىندالدى. كوپشىلىك ونى مۋزىكاسى مەن ۇستانعان قۇندىلىقتارى ءۇشىن جاقسى كورەدى. سوندىقتان وعان وسى بەلبەۋدى تابىستاۋدى ءجون كوردىك»،-دەدى WBC وكىلدەرى.

كەزدەسۋ بارىسىندا تاراپتار سپورت پەن مۋزىكانىڭ حالىقتاردى بىرىكتىرۋدەگى ءرولىن، سونداي-اق ديماشتىڭ ب ۇ ۇ-نىڭ حالىقارالىق كوشى-قون ۇيىمى اياسىنداعى قىزمەتىن تالقىلادى.

WBC ءدىڭ جاسىل بەلبەۋىن ءار جىلدارى مۇحاممەد ءالي، مايك تايسون، روي دجونس جانە فلويد مەيۆەزەر سەكىلدى ايگىلى بوكسشىلار يەلەنگەن. قازاقستاندىق گەننادي گولوۆكين دە ورتا سالماقتا وسى ۇيىمنىڭ الەم چەمپيونى بولعان.

دۇنيەجۇزىلىك بوكس كەڭەسى سپورتتان تىس سالالاردا جەتىستىككە جەتكەن تۇلعالاردى دا ارنايى ماراپاتتاپ كەلەدى. ولاردىڭ قاتارىندا نەلسون ماندەلا مەن تۇركي ءال اش-شەيح بار.

ايتا كەتەيىك، ديماشقا تابىستالعان بەلبەۋ چەمپيوندىق تيتۋل ەمەس، ارنايى قۇرمەتتى ماراپات. ال قازاقستاندىق بوكسشى جانىبەك ءالىمحان ۇلى WBC نۇسقاسى بويىنشا الەم چەمپيونى اتانىپ كورمەگەن. ءالىمحان ۇلى 2027-جىلعى 23-قاڭتاردا WBO نۇسقاسى بويىنشا الەم چەمپيونى اتاعىنا تالاسادى.