جانىبەك ءالىمحان ۇلى ا ق ش-قا بارۋعا دايىندالىپ جاتىر
استانا. kazinform - قازاقستاندىق بوكسشى، الەم چەمپيونى جانىبەك ءالىمحان ۇلى جۋىردا ا ق ش-قا بارىپ، الداعى جەكپە-جەكتەرىنە دايىندىقتى جالعاستىرۋدى جوسپارلاپ وتىر. بۇل تۋرالى سپورتشىنىڭ كومانداسى Instagram پاراقشاسىندا حابارلادى.
- ءبارى قايتا باستالادى. باستامامىز ءساتتى بولعان سياقتى. قۇرمەتتى جانكۇيەرلەر، قولداۋلارىڭىزعا كوپ راقمەت! جەرلەستەرىڭىز رەتىندە ماعان ەرەكشە دەمەۋ كورسەتىپ كەلەسىزدەر. قازىر ۆيزانى كۇتىپ وتىرمىز. ەگەر ءبارى ويداعىداي بولسا، جاقىن كۇندەرى امەريكاعا اتتانامىز، - دەلىنگەن حابارلامادا.
بۇعان دەيىن جانىبەك ءالىمحان ۇلى جاڭا سالماق دارەجەسىندە WBO رەيتينگىندە جەكپە-جەكسىز-اق ەكىنشى ورىنعا كوتەرىلگەنى حابارلانعان بولاتىن.
ءالىمحان ۇلى سوڭعى جەكپە-جەگىن 2025 -جىلعى 5-ساۋىردە استانادا وتكىزىپ، فرانسيالىق اناۋەل نگاميسسەنگەنى نوكاۋتپەن جەڭدى. سول كەزدەسۋدە ول ورتا سالماقتاعى WBO جانە IBF چەمپيوندىق بەلبەۋلەرىن ءساتتى قورعاعان ەدى.
كەيىن ورتا سالماقتاعى WBA چەمپيونىمەن وتەتىن بىرىكتىرۋ جەكپە-جەگى قارساڭىندا قارسىلاسىنىڭ دوپينگ سىناماسى وڭ ناتيجە كورسەتىپ، كەزدەسۋ وتپەي قالدى. قارسىلاسى 2026 -جىلدىڭ جەلتوقسانىنا دەيىن سپورتتان شەتتەتىلىپ، IBF تيتۋلىنان ايىرىلدى. ال جانىبەكتىڭ WBO چەمپيوندىق بەلبەۋى وزىندە ساقتالىپ قالدى.
