جاي قوسۋلى تۇرعان تەلەديدار بالاعا نەسىمەن قاۋىپتى؟

قازىر 3 جاستاعى بالالاردىڭ كوبى دۇرىس سويلەي المايدى، ءبىراق پلانشەتتەن سۇيىكتى مۋلتفيلىمىن وڭاي تابا الادى. ءبىز گادجەتتەردىڭ اراسىندا ءومىر ءسۇرىپ ۇيرەنىپ قالدىق، الايدا ولاردىڭ بالا ميىنا قالاي اسەر ەتەتىنىن ۇمىتىپ بارامىز.

بالا تاماقتى تاۋىسىپ قويۋى ءۇشىن، ونى كيىندىرىپ جاتقاندا جىلاماس ءۇشىن نەمەسە كەزەكتە تۇرعاندا بالانى تىنىشتاندىرۋ ءۇشىن وعان تەلەفوننان مۋلتفيلم قوسىپ بەرۋىڭىز مۇمكىن. ءبىر كۇندە بولعان بارلىق جاعدايدى ەسكە تۇسىرسەڭىز، كەيدە ەكران الدىنداعى ۋاقىت ءبىر ساعاتتان اسىپ كەتەدى. مىسالى، 1 جاسقا تولماعان بالا ءۇشىن بۇل ۋاقىت وتە قاۋىپتى: ول بالا دامۋىن بۇزادى.

بالا گادجەتپەن ەرتە تانىسسا، ول ونىڭ ءتىلىنىڭ شىعۋىن تەجەۋى مۇمكىن. لوگوپەد شايكەنوۆا نازگۇل سەرىك قىزى Massaget.kz تىلشىسىنە گادجەت بالا ءتىلىنىڭ دامۋىنا قالاي اسەر ەتەتىنىن ايتىپ بەردى.

«گادجەتتەردىڭ بالا ءتىلىنىڭ كەش شىعۋىنا اسەرى بار. اتا-انا 3 جاسقا دەيىن بالانى سمارتفوننان الىس ۇستاعانى ءجون. ويتكەنى بۇل جاستا بالانىڭ ءتىلى قارقىندى دامىپ جاتادى. تەك ءتىلى ەمەس، بۇل جاستا بالا ءارتۇرلى قىلىقتار شىعارىپ، مىنەزى وزگەرە باستايدى. وسى كەزدە گادجەتتى كوپ قولدانعان بالانىڭ نازارى دايىن بەينەگە اۋادى، سويلەۋ قاجەتتىلىگى ازايادى. سونىڭ سالدارىنان بالانىڭ سوزدىك قورى از قالىپتاسادى. سوندىقتان اتا-انا بۇل كەزەڭدى جىبەرىپ الماۋى ءتيىس. بالامەن كوبىرەك ويناۋعا كەڭەس بەرەر ەدىم. تەلەديدار كورسەتكەننىڭ وزىندە اناسى ولەڭ- اندەردى بالاعا ايتىپ وتىرعانى ءجون. سوندا بالا ءجاي تەلەديداردى كورىپ، ونى دىبىستىق قابىلداماي، اناسىنىڭ تازا دىبىستى ءوز ارتيكۋلياتسياسىمەن شىعارۋى ارقىلى ۆيزۋالدى قابىلدايتىن بولادى»، - دەدى نازگۇل سەرىك قىزى.

بالالار ءوز ءومىرىنىڭ العاشقى جىلىندا جوعارى قارقىنمەن داميدى، ءتىپتى، از ەكراندىق ۋاقىتتىڭ ءوزى ونىڭ دامۋىنا قاۋىپ توندىرەدى. كوزگە شامادان تىس كۇش تۇسكەن كەزدە باس ميىنىڭ قانمەن قامتاماسىز ەتىلۋى بۇزىلادى.

ال 2 جاس پەن 4 جاس ارالىعىنداعى بالالاردىڭ ەكراندىق ۋاقىتى كۇنىنە 1 ساعاتتان اسپاۋى كەرەك. بۇل جەردە بالانىڭ ەكراندىق ۋاقىتتى قالاي الىپ جاتقانى ماڭىزدى ەمەس: ول مۋلتفيلم قاراۋى، پلانشەتتە ويىن ويناۋى نەمەسە تەلەديدار جاي فون رەتىندە قوسۋلى تۇرۋى مۇمكىن.

فون رەتىندە قوسۋلى تۇرعان تەلەديدار دا بالا ءۇشىن قاۋىپتى

كوپشىلىك ۇيدە تەلەديداردى ەشكىم قاراماسا دا، ول كۇنى بويى فون رەتىندە قوسۋلى تۇرادى. اتا-انا ول بالاعا ەشقانداي زيانىن كەلتىرمەيدى دەپ ويلايدى. ولار بالانىڭ ءجوندى تەلەديدارعا قاراپ وتىرماعانىن ايتادى. الايدا قاراپايىم فوننىڭ ءوزى دە ەكراندىق ۋاقىت بولىپ سانالادى. دارىگەرلەردىڭ پىكىرىنشە، فوندىق شۋلار - بالالاردا سويلەۋ دامۋىنىڭ كەشىگۋىنىڭ نەگىزگى سەبەپتەرىنىڭ ءبىرى.

ەكرانعا تاۋەلدىلىك

ەكراندار ميعا ەسىرتكى سەكىلدى اسەر ەتەتىنى ەشكىمگە قۇپيا ەمەس. ەكراندارعا قاراۋ كەزىندە ءلاززات گورمونى بولىنەدى، سوندىقتان دا مي ونى قايتا-قايتا سۇراي بەرەدى. اشىق تۇستەر، ءجيى جىلتىلدايتىن سۋرەتتەر، جىلجىمالى ەففەكتتەر، ينتەراكتيۆتى ەلەمەنتتەر جانە ءتۇرلى وتكىر دىبىستار ميعا كۇشتى ىنتالاندىرۋشى اسەر بەرەدى. بالا وعان قاراعان كەزدە «تەلەديدار قوسىلدى - مي ءسوندىرىلدى» ەففەكتىسى ىسكە قوسىلادى.

ەكرانعا تاۋەلدىلىكتىڭ سالدارلارى:

ءجيى اشۋلانشاقتىق؛

ۇيقى پروبلەمالارى؛

جىلاۋىقتىق؛

گيپەربەلسەندىلىك؛

وزدىگىنەن ويناي الماۋ؛

الەۋمەتتىك پروبلەمالار؛

شىعارماشىلىق ويلاۋدىڭ تومەندەۋى؛

قيالدىڭ جەتىسپەۋى.

اتا-انانىڭ بالاعا بەرە الاتىن ەڭ قۇندى نارسەسى - ۋاقىت. بالامەن بىرگە ويناۋ، ونىمەن اڭگىمەلەسۋ، وعان نازار اۋدارۋ، سۇيىسپەنشىلىك پەن قامقورلىق سىيلاۋ - بالانىڭ دۇرىس ءارى تولىققاندى دامۋىنا قاجەتتى نەگىز. ونى ەشبىر مۋلتفيلمدەر مەن گادجەتتەر الماستىرا المايدى.