جاۋىن-شاشىن مەن داۋىل: الماتىدا كوممۋنالدىق قىزمەت كۇشەيتىلگەن رەجيمگە كوشتى

الماتى اكىمدىگىنىڭ مالىمەتىنشە، جەرگىلىكتى جەرلەردە سۋ جينالىپ، سۋ باسۋ قاۋپىنىڭ الدىن الۋ جانە قاجەت بولعان جاعدايدا ونىڭ سالدارىن جەدەل جويۋ ءۇشىن قۇرامىندا 416 جول جۇمىسشىسى بار 70 جەدەل بريگادا كەزەكشىلىككە شىقتى. 252 ارنايى تەحنيكا، 48 موتوپومپا جانە 18 اسسەنيزاتورلىق ماشينا دايىن تۇر.

اسسەنيزاتورلىق ماشينالار سۋ باسۋى مۇمكىن ۋچاسكەلەرگە الدىن الا ورنالاستىرىلدى. سونىمەن قاتار 2,4 مىڭ قۇم سالىنعان قاپ دايىندالدى.

«قازگيدرومەت» ر م ك بولجامىنا سايكەس، 1-قازاندا ساعات 18:00 دەن كەيىن الماتىدا قارقىنى 1-2 م م بولاتىن ازداعان جاڭبىر جاۋىپ، نايزاعاي ويناۋى مۇمكىن. 2-قازانعا قاراعان ءتۇنى جانە ساعات 09:00 گە دەيىن كەي ۋاقىتتا قارقىنى 2-4 م م جاڭبىر جاۋادى دەپ بولجانىپ وتىر. وڭتۇستىك- باتىستان سوعاتىن جەلدىڭ ەكپىنى سەكۋندىنا 15 مەترگە دەيىن جەتۋى مۇمكىن.

- جاۋىن-شاشىن كەزەڭىندە قالا قىزمەتتەرىنىڭ كەزەكشىلىگى كۇشەيتىلدى. الماتى قالاسىنىڭ قۇتقارۋ قىزمەتى ءبىر اسسەنيزاتورلىق ماشينا مەن 15 موتوپومپا دايىندادى. توتەنشە جاعدايلار دەپارتامەنتى تاراپىنان 240 ادام، 53 ارنايى تەحنيكا جانە 54 موتوپومپا جۇمىلدىرىلادى، - دەپ حابارلادى اكىمدىكتەن.

كەزەكشى بريگادالار سۋ جينالۋى مۇمكىن ۋچاسكەلەردى باقىلاۋدا ۇستاماق. قاجەت بولعان جاعدايدا سۋدى سورىپ شىعارۋ جانە جەرگىلىكتى جەرلەردى سۋ باسۋدىڭ الدىن الۋعا باعىتتالعان باسقا دا جۇمىستار جەدەل جۇرگىزىلەدى.