جاپونيادا 2026 -جىلعى ازيا ويىندارى رەسمي تۇردە اياقتالدى

سالتاناتتى شارا 19-قىركۇيەكتە ويىنداردىڭ اشىلۋ ءراسىمى وتكەن Paloma Mizuho Stadium ستاديونىندا ۇيىمداستىرىلدى. جابىلۋ سالتاناتىندا جۇرەك سوعىسى مەن ادامزاتتىڭ ورتاق ىرعاقتى بىرلىگىن بەينەلەيتىن HEART BEAT Aichi-Nagoya تۇجىرىمداماسى كورىنىس تاپتى. بۇل يدەيا ازيا ەلدەرىن ءبىر ارناعا توعىستىرۋدى كوزدەيتىن IMAGINE ONE ASIA ۇرانىمەن ۇندەسەدى. ەكى سالتاناتتى شارانىڭ دا باس رەجيسسەرى جاپونيالىق يۋكيحيكو تسۋتسۋمي بولدى.

نەگىزگى ءراسىم باستالماي تۇرىپ-اق كورەرمەنگە ارنالعان مەرەكەلىك باعدارلاما ۇسىنىلدى. ارنايى ساحنادا INI توبىنىڭ مۇشەسى ماسايا كيمۋرا، MYERA توبى، تەلەجۇرگىزۋشى ءارى ازىلكەش كايەكو وكۋبو، جاپونيانىڭ سپورت عىلىمدارى ۋنيۆەرسيتەتىنىڭ وكىلدەرى، سونداي-اق Tokugawa Ieyasu and Hattori Hanzo Ninja Squad ونەر كورسەتتى. باعدارلامانى YO! YO! YOSUKE پەن ميحو حوريە جۇرگىزدى.

جابىلۋ سالتاناتىنىڭ نەگىزگى بولىگى مادەنيەت پەن سپورتتى ۇشتاستىردى. ستاديون تورىندە بيشىلەر مەن ونەرپازدار ونەر كورسەتىپ، ازيا ەلدەرىنىڭ بىرلىگى مەن سان الۋان مادەنيەتىن پاش ەتتى. سالتاناتتى شارادا 16 كۇنگە سوزىلعان جارىستىڭ اياقتالعانى دا ايرىقشا كورىنىس تاپتى. وسى ۋاقىت ىشىندە ازيانىڭ بارلىق ۇلتتىق وليمپيادالىق كوميتەتتەرىنىڭ وكىلدەرى ءبىر الاڭدا باس قوسىپ، ءوزارا باق سىنادى.

سالتاناتتى شارا اياسىندا سپورتشىلاردىڭ ءداستۇرلى شەرۋى ءوتتى. ازيا ويىندارىنىڭ جابىلۋ راسىمىندە قازاقستاننىڭ تۋىن 16 جاستاعى گيمناست اقمارال ەرەكەشيەۆا الىپ شىقتى. ول قۇرلىقتىق دوداعا العاش رەت قاتىسىپ، جەكەلەي كوپسايىستىڭ فينالىنا ءبىرىنشى ورىنمەن جولداما العان ەدى. الايدا فينالدىق باسەكەدە ءتورتىنشى ورىنعا تۇراقتادى.

قۇرمەتتى قوناقتار قاتارىندا جاپونيانىڭ تاق مۇراگەرى حانزادا اكيسينو مەن حانشايىم كيكو، ازيا وليمپيادالىق كەڭەسىنىڭ پرەزيدەنتى شەيح دجوان بين حاماد ءال تاني جانە قاتار پرەمەر-ءمينيسترى شەيح مۇحاممەد بين ابدۋلراحمان ءال تاني بولدى.

جابىلۋ سالتاناتىندا ازيا وليمپيادالىق كەڭەسى 2026 -جىلعى قۇرلىقتىق دودادا ۇزدىك شىققان سپورتشىلاردى دا جاريالادى. ەڭ ۇزدىك سپورتشى اتاعى قىتايدىڭ 13 جاستاعى جۇزگىشى يۋي جىديگە بۇيىردى. ول ايەلدەر اراسىندا 200 مەترگە باتتەرفلياي ادىسىمەن جۇزۋدە جانە 200، 400 مەترگە كەشەندى جۇزۋدە توپ جارىپ، ءۇش التىن مەدال جەڭىپ الدى. سونىمەن قاتار ازيا ويىندارىنىڭ ءۇش رەكوردىن جانە ازيا رەكوردىن جاڭارتتى. وسىلايشا، يۋي جىدي جارىس تاريحىنداعى ەڭ جاس ۇزدىك سپورتشى اتاندى.

ەرلەر اراسىندا بۇل ماراپات تايلاند وكىلى پۋريپول بۋنسونعا بەرىلدى. 20 جاستاعى جەڭىل اتلەت 100 جانە 200 مەترگە جۇگىرۋدە قارسىلاس شاق كەلتىرمەدى. ول جارىس بارىسىندا ازيا ويىندارىنىڭ رەكوردىن ءتورت رەت جاڭارتتى. ال 200 مەترگە جۇگىرۋدىڭ فينالىندا 19,88 سەكۋند ناتيجەسىن تىركەپ، ازيا رەكوردىن قايتالادى.

سپورتشىلار شەرۋى مەن شىعارماشىلىق باعدارلاما اياقتالعان سوڭ سالتاناتتى جيىننىڭ رەسمي ءبولىمى ءوتتى. ۇيىمداستىرۋ كوميتەتىنىڭ وكىلدەرى جاپونيادا 16 كۇن بويى وتكەن جارىستىڭ قورىتىندىسىن شىعاردى.

كەشتىڭ ماڭىزدى ساتتەرىنىڭ ءبىرى - ازيا ويىندارىنىڭ ەستافەتاسىن كەلەسى قابىلداۋشى ەلگە تاپسىرۋ ءراسىمى بولدى. بۇل جولى ازيا وليمپيادالىق كەڭەسىنىڭ تۋى قاتار وكىلدەرىنە تابىستالىپ، 2030 -جىلى قۇرلىقتىق دودا وتەتىن دوحا قالاسىنا ويىنداردىڭ الاۋى بەرىلدى.

وسىلايشا، كەلەسى ازيا ويىندارىنا دايىندىقتىڭ جاڭا ءتورتجىلدىق كەزەڭى باستالدى. دوحا قۇرلىقتىق دودانى ەكىنشى رەت قابىلداماق. قاتار استاناسىندا ازيا ويىندارى العاش رەت 2006 -جىلى وتكەن بولاتىن. ارادا 24 -جىل وتكەن سوڭ قۇرلىقتاعى ەڭ ءىرى كوپسايىستى جارىس قايتادان قاتاردا ۇيىمداستىرالادى.

سالتانات سوڭىندا Paloma Mizuho Stadium ستاديونىندا XX جازعى ازيا ويىندارىنىڭ الاۋى ءسوندىرىلدى.

ايتا كەتەيىك، XX جازعى ازيا ويىندارى 19-قىركۇيەك پەن 4-قازان ارالىعىندا ءوتتى. جارىس باعدارلاماسىنا 43 سپورت ءتۇرى مەن 71 ديستسيپلينا ەنگىزىلىپ، بارلىعى 469 مەدال جيىنتىعى ساراپقا سالىندى.

قازاقستان قۇراماسى قۇرلىقتىق دودانى 84 مەدالمەن اياقتادى. وتانداستارىمىز 12 التىن، 24 كۇمىس جانە 48 قولا جۇلدە جەڭىپ الدى. جالپىكوماندالىق ەسەپتە ۇلتتىق قۇراما سەگىزىنشى ورىنعا تۇراقتادى. حاڭجوۋدا وتكەن الدىڭعى ازيا ويىندارىمەن سالىستىرعاندا قازاقستان ءۇش ساتىعا جوعارى كوتەرىلىپ، جۇلدەلەر سانىن تورتكە ارتتىردى.

اۆتور

مەيىرمان لەس