جاپونياداعى ورمان ءورتى: مىڭداعان ادام ءۇيىن تاستاپ كەتتى

ءورت يۆاتە پرەفەكتۋراسىنىڭ وتسۋتي قالاسىنىڭ ماڭايىندا تۇتانعان، قازىرگى تاڭدا ءتىلسىز جاۋ شامامەن 730 گەكتار جەردى جويىپ، سوڭعى جىلدارى ەلدە تىركەلگەن ەڭ ءىرى ورمان ورتتەرىنىڭ قاتارىنا ەندى.

قىزىل جالىن ەڭ العاش رەت سارسەنبىدە تاۋلى جەردە تۇتانعان، كەيىننەن وعان جاقىن ماڭنان ەكىنشى ءورت باستالىپ، تۇرعىن ۇيلەرگە قاۋىپ توندىرە باستادى. بيلىك 1541 ءۇيدى ەۆاكۋاتسيالاۋ تۋرالى بۇيرىق شىعاردى، بۇل شامامەن 3200 تۇرعىندى، ياعني قالا حالقىنىڭ ۇشتەن ءبىرىن قامتىدى.

قۇزىرلى ورگانداردىڭ مالىمەتىنشە، جەرگىلىكتى جەردىڭ كۇردەلى رەلەفى، قۇرعاق اۋا رايى مەن قاتتى جەل ءورتتى باقىلاۋعا الۋدى قيىنداتۋدا، سوندىقتان ءورتتى سوندىرۋگە كومەكتەسۋ ءۇشىن بىرنەشە پرەفەكتۋرالاردان جانە جاپونيانىڭ قورعانىس كۇشتەرىنەن تىكۇشاقتار تارتىلدى.

قازىرگى تاڭدا 8 عيمارات، سونىڭ ىشىندە ءبىر تۇرعىن ءۇي قيراعان، ءبىراق قازا تاپقاندار نەمەسە جاراقات العاندار تۋرالى حابار تۇسكەن جوق.

پرەفەكتۋرانىڭ ءمەرى كوزو حيرانونىڭ ايتۋىنشا، بيلىك ەۆاكۋاتسيالانعاندارعا كومەك كورسەتۋ جانە ودان ءارى شىعىنداردىڭ الدىن الۋ ءۇشىن جۇمىس ىستەپ جاتقانىن ايتتى.

- مەن ادامداردىڭ ۇيلەرىن تاعى دا جوعالتۋىنا جول بەرمەيمىن، - دەدى ول.

قازىر ءورت سوندىرۋشىلەر مەن قۇتقارۋشىلار جوعارى دايىندىق دەڭگەيىن ساقتاپ وتىر، ءتىلسىز جاۋدى توقتاتىپ، جاقىن ماڭداعى ەلدى مەكەندەردى قورعاۋ ءۇشىن كۇش سالىپ جاتىر.

بۇعان دەيىن سولتۇستىك قازاقستان وبلىسىندا استىق كەپتىرگىش ورتەنگەنى تۋرالى جازدىق.