جاپونيادا تولاسسىز جاۋعان جاڭبىر جەتى ادامنىڭ ءومىرىن قيدى

استانا. KAZINFORM - جاپونيانىڭ يسيكاۆا پرەفەكتۋراسىندا رەكوردتىق كولەمدە جاڭبىر جاۋىپ، جەتى ادام قازا تاپتى. ەكى تۇرعىن ءىز-ءتۇزسىز جوعالىپ كەتكەن، تاعى تورتەۋىمەن بايلانىسۋ مۇمكىن بولماي جاتىر. بۇل تۋرالى NHK تەلەارناسى حابارلادى.

ەلدەگى كوشكىن سالدارىنان 10 جۇمىسشىنىڭ ناكايا تۋننەلىندە قالىپ، ەكەۋىنىڭ قازا تاپقانى اتاپ ءوتىلدى.

سونداي-اق، كوشكىن مەن وزەن تاسقىنىنان كەيىن قيراعان تۇرعىن ءۇيدىڭ استىنان زارداپ شەككەندەر تابىلدى.

تەلەارنانىڭ حابارلاۋىنشا، تابيعي اپاتتان نەگىزىنەن نوتو اۋىلى، ۆادزيما جانە سۋدزۋ قالالارى زارداپ شەككەن.

سونداي-اق ولار اعىمداعى جىلدىڭ 1-قاڭتارىندا بولعان كۇشتى جەر سىلكىنىسىنەن ەڭ كوپ زارداپ شەككەن ەلدى مەكەندەر. 21-22-قىركۇيەكتە يسيكاۆا پرەفەكتۋراسىنىڭ جەتى قالاسى مەن ەلدى مەكەنىندە 131400 ادام ەۆاكۋاتسيالانعان.

ۆادزيما مەن سۋدزۋ قالالارىندا 21-قىركۇيەكتە رەكوردتىق جاۋىن-شاشىن تىركەلدى. اتاپ ايتقاندا، ءبىر تاۋلىكتە ۆادزيمادا 300 م م، سۋدزۋدا 200 م م جاۋىن جاۋعان. بۇل - 1975-جىلدان بەرى بايقالعان ەڭ جوعارى كورسەتكىش.