جاپونيادا مايمىل شەشەگىنەن ءبىرىنشى ادام قايتىس بولدى
جاپونيادا توكيوعا جاقىن ماڭداعى سايتاما پروەفەكتۋراسىندا تۇرعان ەر ادام Mpox دەرتىنەن قازا تاپتى. ول ەلدە وسى اۋرۋدان قايتىس بولعان العاشقى ادام رەتىندە تىركەلدى.
بۇل تۋرالى جاپونيا دەنساۋلىق ساقتاۋ مينيسترلىگى ءمالىم ەتتى، دەپ حابارلايدى Kazinform شينحۋا اگەنتتىگىنە سىلتەمە جاساپ.
مەكەمە دەرەگى بويىنشا، ەر ادامدا ۆيرۋس جۇقتىرۋ سالدارىنان يممۋن تاپشىلىعى بولعان. وعان قىركۇيەكتە جەرگىلىكتى اۋرۋحانادا Mpox دياگنوزى قويىلىپ، ەكى ايدان كەيىن قايتىس بولدى. ناۋقاس شەتەلگە شىقپاعان.
Mpox ۆيرۋسىن جۇقتىرعان العاشقى ادام جاپونيادا 2022 -جىلدىڭ شىلدەسىندە تىركەلگەن بولاتىن. مينيسترلىكتىڭ ايتۋىنشا، 2023 -جىلعى 3-جەلتوقسانداعى جاعداي بويىنشا ەلدە وسى اۋرۋعا شالدىققان 227 ادام انىقتالعان.
سىرقاتتان ادامنىڭ دەنە قىزۋى كوتەرىلىپ، باسى اۋىرىپ، دەنەسى ءبورتىپ كەتەدى، اۋىر بەلگىلەرى ەكى- ءتورت اپتاعا دەيىن سوزىلادى.
بيىل مامىردا «مايمىل شەشەگى» دەگەن اتپەن تانىلعان Mpox اۋرۋىن جۇقتىرعان ادامدار سانى ازايعان بولاتىن. دۇنيەجۇزىلىك دەنساۋلىق ساقتاۋ ۇيىمى سوندىقتان بۇل ۆيرۋستىڭ تارالۋى توتەنشە جاعدايعا جاتپايدى دەپ مالىمدەدى.
