جاپونيادا ەگدە جاستاعى حالىق 30 پايىزعا جاقىندادى

استانا. KAZINFORM - جاپونياداعى 65 جاستان اسقان ەگدە جاستاعى ادامدار جالپى حالىق سانىنىڭ %29,4 ىن قۇرايدى، بۇل باقىلاۋ تاريحىنداعى ەڭ جوعارى كورسەتكىش سانالادى، دەپ جازادى شينحۋا.

بۇل تۋرالى جاپونيا ىشكى ىستەر جانە كوممۋنيكاتسيالار مينيسترلىگى جەكسەنبى كۇنى جاريالاعان رەسمي دەرەكتەردە ايتىلدى.

مينيسترلىكتىڭ باعالاۋىنشا، 15-قىركۇيەك - «قارتتارعا قۇرمەت كورسەتۋ كۇنىنە» - سايكەس ەگدە جاستاعى حالىق سانى 36,19 ميلليون ادامدى قۇرادى. قاريالاردىڭ جالپى حالىق ىشىندەگى ۇلەسى 0,1 پايىزدىق تارماققا ءوسىپ، رەكوردتىق %29,4 عا جەتتى.

جۇمىس كۇشى تۋرالى شولۋعا سايكەس، وتكەن جىلى 9,3 ميلليون قارت ادام ەڭبەكپەن قامتىلعان، بۇل الدىڭعى جىلمەن سالىستىرعاندا 160 مىڭعا كوپ. بۇل كورسەتكىش تە رەكوردتىق مانگە يە.

65 جاستان جوعارى ادامدار اراسىندا ەڭبەكپەن قامتۋ دەڭگەيى %25,7 عا جەتىپ، 0,5 پايىزدىق تارماققا وسكەن. جاس توپتارى بويىنشا بولگەندە، 65-69 جاس ارالىعىنداعى ادامداردىڭ ەڭبەكپەن قامتىلۋ دەڭگەيى - %53,6، 70-74 جاس ارالىعىنداعى - %35,1، ال 75 جاستان اسقانداردىڭ - %12,0 بولدى.

مينيسترلىك بۇل ءۇردىستى ەڭبەك رەسۋرستارىنىڭ جەتىسپەۋشىلىگىمەن تۇسىندىرەدى. سونداي-اق، زەينەتكەرلىك جاسىن ارتتىرۋ دا اسەر ەتەدى. ەگدە جاستاعىلاردىڭ بەلسەندى بولۋ مۇمكىندىكتەرى كەڭىپ جاتىر. سوندىقتان ەڭبەكپەن قامتىلعان قاريالار سانىنىڭ ودان ءارى ءوسۋى كۇتىلىپ وتىر.