جاپونيادا ءزىلزالادان 78 ادام قازا تاۋىپ، 51 تۇرعىن ءىز-ءتۇزسىز جوعالىپ كەتتى
بەيسەنبى تاڭداعى اقپارات بويىنشا، جاپونيانىڭ يسيكاۆا پرەفەكتۋراسى مەن وعان جاقىن ماڭدا بولعان بىرنەشە ءزىلزالادان قازا تاپقاندار سانى 78 ادامعا جەتتى، ءوڭىر بيلىگى تاعى 51 تۇرعىن ءىز-ءتۇزسىز جوعالىپ كەتكەنىن ءمالىم ەتتى.
Kazinform بۇل تۋرالى شينحۋا اگەنتتىگىنە سىلتەمە جاساپ حابارلايدى.
جاپونيا پرەمەر-ءمينيسترى فۋميو كيسيدا بەيسەنبى جەدەل ارەكەت ەتۋ شتابىنىڭ وتىرىسىندا شەنەۋنىكتەردى جەر سىلكىنىسىنەن كەيىنگى العاشقى 72 ساعات ىشىندە ادامداردىڭ ءومىرىن قۇتقارۋ جانە تىرشىلىك ەتۋگە قاجەتتى جابدىقتارمەن قامتاماسىز ەتۋ بويىنشا كۇش-جىگەردى جۇمىلدىرۋعا شاقىردى. بۇل كەزەڭ قۇتقارۋشىلار ءۇشىن وتە ماڭىزدى، ويتكەنى كەيىنىرەك ءتىرى قالعانداردى تابۋ مۇمكىندىگى ايتارلىقتاي تومەندەيدى.
«اپات باستالعان ساتتەن 72 ساعات ىشىندە كوبىرەك ادامنىڭ ءومىرىن ساقتاپ قالۋ ءۇشىن بار كۇشىمىزدى سالىپ جۇمىس ىستەۋگە شاقىرامىن»، - دەدى پرەمەر-مينيستر.
كوپتەگەن تۇرعىن بۇرىنعىشا جاعالاۋداعى ۆادزيما قالاسىنداعى ءۇيىندى استىندا بولۋى مۇمكىن. ول جەردە 44 ادامنىڭ ءولىمى راستالدى، دەپ حابارلادى كيودو تسۋسين. جاپونيا قورعانىس كۇشتەرى كەمەسى ۆادزيما جاعالاۋىنا تابيعات اپاتىنىڭ سالدارىن جويۋ ءۇشىن اۋىر تەحنيكانى جەتكىزەدى.
بەيسەنبى تاڭداعى جاعداي بويىنشا اۆتەرشوكتار سەرياسى سالدارىنان يسيكاۆانىڭ كەي اۋداندارىندا 95 مىڭعا جۋىق وتباسى سۋسىز وتىر. ۇيىندىلەر مەن قيراعان جولدار ىزدەۋ-قۇتقارۋ جۇمىستارىنا كەدەرگى كەلتىرىپ جاتىر. جاپونيانىڭ جەر، ينفراقۇرىلىم، كولىك جانە تۋريزم مينيسترلىگى يسيكاۆادا 100 گ ا جەردى ءزىلزالادان كەيىنگى تسۋنامي شايىپ كەتكەنىن ءمالىم ەتتى. سۋ باسقان اۋماقتىڭ كولەمى ودان دا ۇلكەن بولۋى مۇمكىن.
جاپونيالىق قۇتقارۋشىلار قيراعان ۇيلەردىڭ استىنان جەر سىلكىنىسىنەن امان قالعانداردى ىزدەپ جاتىر. جەراستى دۇمپۋلەرى ولاردىڭ جۇمىسىنا كەدەرگى كەلتىرىپ تۇر.
ەڭ كۇشتى 7,6 بالدىق ءزىلزالا دۇيسەنبى يسيكاۆا پرەفەكتۋراسىنىڭ نوتا اۋدانىندا تىركەلدى. جەراستى ءدۇمپۋى وشاعى ۆادزيمادان سولتۇستىك- شىعىسقا قاراي 30 شاقىرىم جەردە ورنالاسقان. بۇعان دەيىن جاپونيانىڭ ورتالىق بولىگىندە بىرنەشە كۇشتى جەر سىلكىنىسى تىركەلگەنىن حابارلاعان بولاتىنبىز.
ەلدىڭ ۇلتتىق مەتەورولوگيالىق باسقارماسىنىڭ مالىمەتىنشە، يسيكاۆا جانە نيگاتا پرەفەكتۋرالارى ايماعىندا ماگنيتۋداسى 7,4 كە جەتەتىن جەر سىلكىنىسى بولدى.
جاپونيا پرەمەر-ءمينيسترى فۋميو كيشيدا جەر سىلكىنىسىنەن زارداپ شەككەن اۋداندارعا باراتىن نەگىزگى جولدار قاتتى زاقىمدانعانىن، بۇل اسكەريلەردىڭ قۇتقارۋ جۇمىسىنا كەدەرگى كەلتىرگەنىن ايتتى.
كەشە تابيعي اپات سالدارىنان كەمىندە 55 ادام مەرت بولعانى حابارلانعان. يسيكاۆا، نيگاتا، فۋكۋي، توياما جانە گيفۋ پرەفەكتۋرالارىنا قاتتى زاقىم كەلدى.
