جاپونيادا ءولىم جازاسىن جارتى عاسىردان كوپ كۇتكەن تۇتقىن اقتالدى
توكيو. KAZINFORM - جاپونيا سوتى 88 جاستاعى يۆاو حاكاماتانى اقتادى. ول 1968-جىلى ءبىر وتباسىنداعى ءتورت ادامدى ءولتىردى دەگەن ايىپپەن ءولىم جازاسىنا كەسىلگەن بولاتىن. ونىڭ قورعاۋشىلارى ونداعان جىلدار بويى اپەللياتسيالىق شاعىم ءتۇسىرىپ كەلدى، دەپ حابارلايدى Kyodo.
حاكاماتا 2014-جىلعا دەيىن ءولىم جازاسىنا كەسىلگەندەر كامەراسىندا جاتقان، سودان كەيىن ول بوساتىلىپ، قايتا سوت پروتسەسى باستالعان. سوت ونىڭ كىناسىن راستايتىن دالەلدەمەلەردىڭ بۇرمالانعانىن انىقتادى.
يۆاو حاكاماتا - بۇرىنعى كاسىپقوي بوكسشى. سپورتتىق مانسابىن اياقتاعاننان كەيىن ول ميسو (ءداستۇرلى جاپون دامدەۋىشتەرى) فابريكاسىنا جۇمىسقا ورنالاسقان. 1966-جىلى 30-ماۋسىمدا ونىڭ باستىعىنىڭ ۇيىندە ءورت شىققان. حاكاماتا ءورتتى سوندىرۋگە كومەكتەسكەن.
ونىڭ ايتۋىنشا، سول كەزدە ول باستىعىنىڭ، ايەلىنىڭ جانە ەكى بالاسىنىڭ پىشاقتالعان مايىتتەرىن تاپقان. سونداي-اق، بىرەۋ ۇيدەن شامامەن 200000 يەن ۇرلاپ كەتكەن.
ەر ادام قاماۋعا الىنىپ، وعان كىسى ءولتىردى دەگەن ايىپ تاعىلدى. 20 كۇندىك جاۋاپ بەرۋ كەزىندە ول ءوز كىناسىن مويىنداعان، ءبىراق سوت مۇنىڭ ازاپتاۋدان بولعانىن ايتتى. ۇستالعاننان كەيىن ءبىر جىلدان كەيىن فابريكاداعى مىس ساقتايتىن ىدىستاردىڭ بىرىنەن قانعا بويالعان كيىمدەر تابىلعان. ىزدەر قۇربانداردىڭ قان توبىنا سايكەس كەلگەن.
سوت ەر ادامدى ءولىم جازاسىنا كەستى، ونى جاپونيانىڭ جوعارعى سوتى 1980-جىلى بەكىتتى. وسىدان كەيىن حاكاماتانىڭ قورعاۋشىلارى 2014-جىلعا دەيىن اپپەلياتسيالىق شاعىم ءتۇسىردى. 2011-جىلى يۆاو حاكاماتا ءولىم جازاسىن ەڭ ۇزاق كۇتكەن ادام رەتىندە گيننەستىڭ رەكوردتار كىتابىنا ەندى.
2014-جىلدىڭ ناۋرىز ايىندا سوت ءىستى قايتا قاراي باستاعاننان كەيىن يۆاو حاكاماتا بوساتىلدى. كەيىنگى ساراپتاما تابىلعان قانعا مالىنعان كيىمدەردە حاكاماتانىڭ د ن ق- سى جوق ەكەنى انىقتالدى.
2024-جىلدىڭ مامىرىنداعى سوڭعى سوت وتىرىسىندا پروكۋرورلار ءولىم جازاسىن تالاپ ەتۋدى جالعاستىرعان. دەگەنمەن، سوت حاكاماتانىڭ كىسى ولتىرگەنىن مويىنداۋى سياقتى ايىپتاۋ ايعاقتارىنىڭ بۇرمالانعانىن انىقتادى.
