جاپونيادا 36 ادامدى ورتەپ جىبەرگەن كۇدىكتى ءولىم جازاسىنا كەسىلەتىن بولدى
استانا. قازاقپارات - 2019 - جىلى Kyoto Animation ستۋدياسىنا ءورت قويىپ، سالدارىنان ادام ولىمىنە كىنالى دەپ ايىپتالعان ەر ادام اپەللياتسيالىق شاعىمىن قايتارىپ الدى، دەپ حابارلايدى Kyodo News.

46 جاستاعى سيندزي اوبا 2024 - جىلدىڭ قاڭتارىندا جاپونياداعى انيمە ستۋدياسىندا 36 ادامنىڭ ءومىرىن قيعان شابۋىل ءۇشىن ءولىم جازاسىنا كەسىلگەن. قورعاۋشى تاراپ، ودان كەيىن ايىپتالۋشىنىڭ ءوزى اپەللياتسيالىق شاعىم ءتۇسىردى. الايدا، اوبا دۇيسەنبى كۇنى ءوز ءوتىنىشىن قايتارىپ الدى. وسىلايشا ءولىم جازاسى راستالدى.
جاپونيادا بۇرىن قورعاۋ تاراپى سوتتالۋشىنىڭ اپەللياتسيالىق شاعىمنان باس تارتۋىنىڭ زاڭدىلىعىن داۋلاعان جاعدايلار بولعان. اوبانىڭ ادۆوكاتتارى ازىرگە سوڭعى وقيعاعا قاتىستى مالىمدەمە جاساعان جوق.
قاۋلىعا سايكەس، ەر ادام 2019 - جىلدىڭ 18- شىلدەسىندە ساعات 10:30 شاماسىندا 70 قىزمەتكەر جۇمىس ىستەپ جاتقان kyoto Animation ستۋدياسىنىڭ عيماراتىنا كىرگەن. ول عيماراتتى بەنزين پايدالانىپ ورتەپ جىبەرىپ، سالدارىنان 36 ادام مەرت بولىپ، تاعى 32 ادام جاراقات العان.
اوبا وقيعاداعى ءوز قىلمىسىن مويىنداعاندىقتان، ونىڭ اقىل- ەسى دۇرىس پا، قىلمىستىق جاۋاپكەرشىلىككە تارتىلۋى مۇمكىن بە دەگەن باستى ماسەلە بولدى.
ايىپتالۋشىنىڭ مالىمدەۋىنشە، ول بۇل شابۋىلدى Kyoto Animation ستۋدياسى ول بايقاۋعا قاتىسقان روماندى كوشىرىپ الدى دەپ ويلاعاندىقتان جاساعان. اوبانىڭ قورعاۋشىسى ونىڭ پسيحيكالىق تۇراقسىز جانە ساندىراقپەن اۋىراتىنىنا سەندىردى.
سۋديا اوبانىڭ شىنىمەن دە ساندىراقتان زارداپ شەككەنىن، ءبىراق بۇل ونىڭ مىنەز- قۇلقىنا از اسەر ەتكەنىن جانە سوتتالۋشىنىڭ سول كەزدە «ەسى دۇرىس ەمەس نەمەسە ويلاۋ قابىلەتىنىڭ تومەندەۋى» بولماعانىن مويىندادى.
Kyoto Animation بۇكىل الەم بويىنشا انيمە اۋەسقويلارى اراسىندا اسىرەسە «K- On!» جانە «حارۋحي سۋزۋميانىڭ مەلانحولياسى» شىعارمالارىمەن ەرەكشە تانىمال.
ەسكە سالساق، بۇدان بۇرىن جاپونيادا سوت 2019 - جىلى كيوتو Animation ستۋدياسىن ورتەپ جىبەرگەن سيندزي اوبانى ءولىم جازاسىنا كەسكەنىن جازعان ەدىك.