جاپونيا جاڭا قارۋلارىن تانىستىردى
جاپونيا DSEI Japan 2025 كورمەسىندە زاماناۋي قارۋ-جاراقتارىن تانىستىردى، دەپ حابارلايدى turkystan.kz باسىلىمى shinmaywa.co.jp-عا سىلتەمە جاساپ.
توكيو قالاسىندا وتكەن DSEI Japan 2025 حالىقارالىق قارۋ-جاراق كورمەسىندە جاپونيا قورعانىس ونەركاسىبىنىڭ سوڭعى جەتىستىكتەرى كوپشىلىك نازارىنا ۇسىنىلدى. ۇيىمداستىرۋشىلاردىڭ مالىمەتىنشە، بۇل كورمە جاپونيا تاريحىنداعى ەڭ اۋقىمدى قارۋ-جاراق كورمەسى بولدى.
2022 -جىلى جاپونيا ۇكىمەتى قورعانىس ونىمدەرىنىڭ ەكسپورتىن ارتتىرۋ جونىندەگى جاڭا باعدارلامانى قابىلداعان بولاتىن. وسى باعدارلامانىڭ اياسىندا قارۋ-جاراق ەكسپورتىنا قاتىستى مەملەكەتتىك رەتتەۋ وزگەرىپ، ءىرى كولەمدەگى كورمەلەردى ۇيىمداستىرۋ شەشىمى قابىلداندى. كورمەدە ۇسىنىلعان قارۋ-جاراق ۇلگىلەرىنىڭ باسىم بولىگى جاپونيا قورعانىس مينيسترلىگى مەن ونىڭ ساتىپ الۋلار، تەحنولوگيالار جانە لوگيستيكا اگەنتتىگىنىڭ قولداۋىمەن جاسالعان.
كورمەنىڭ باستى نازارىن اۋدارتقان جاڭالىقتاردىڭ ءبىرى - تەڭىزگە ارنالعان رەلسوترون ۇلگىسى بولدى. بۇل زاماناۋي قارۋ ەلەكتر قۋاتى ارقىلى وق- ءدارىنى وتە جوعارى جىلدامدىقپەن ۇشىرۋعا مۇمكىندىك بەرەدى. قازىرگى ۋاقىتتا بۇل پروتوتيپ جاپونيانىڭ تەڭىز كۇشتەرىنىڭ سىناق كەمەسىندە سىناقتان ءوتىپ جاتىر.
تاعى ءبىر ماڭىزدى تانىستىرىلىم - Mitsubishi Heavy Industries كومپانياسى جاساعان T- X وقۋ-جاتتىعۋ ۇشاعىنىڭ تۇجىرىمداماسى بولدى. بۇل ۇشاق قازىرگى Kawasaki T-4 مودەلىن الماستىرۋى ءتيىس. T- X ۇشاعى ەكى قوزعالتقىشپەن جابدىقتالعان جانە قارسىلاستىڭ رادارلارى مەن قارۋ جۇيەلەرىن يميتاتسيالاي الاتىن باعدارلامالىق قامتاماسىز ەتۋمەن قامتىلعان. جاڭا وقۋ جۇيەسى بەسىنشى جانە بولاشاق التىنشى بۋىن جويعىش ۇشاقتارعا ۇشقىشتاردى دايارلاۋعا مۇمكىندىك بەرەدى.
ايتا كەتۋ كەرەك، التىنشى بۋىن جويعىش ۇشاعىنىڭ كونسەپتسياسى دا كورمەدە تانىستىرىلدى. بۇل جوبا جاپونيا، ۇلى بريتانيا جانە يتاليا اراسىنداعى عالامدىق اۋە سوعىسى باعدارلاماسى (GCAP) اياسىندا ازىرلەنۋدە.
كورمەدە دروندار دا كەڭىنەن ۇسىنىلدى. ShinMaywa كومپانياسى XU- M امفيبيالىق ۇشاتىن دروندى تانىستىرسا، Mitsubishi Heavy Industries بروندالعان جەرۇستى درون جوبالارىن كورسەتتى. بۇل جوبالار بولاشاقتا امفيبيالىق سيپاتقا يە بولۋى مۇمكىن.
اتاپ ايتقاندا، Mitsubishi Type 89 جاياۋ اسكەرگە ارنالعان ۇرىس ماشيناسىنىڭ درون-نۇسقاسى دەسانت بولىگىندە التى «كاميكادزە» درونىن ۇشىرۋعا ارنالعان قوندىرعىمەن جابدىقتالۋى مۇمكىن.
