جاپون عالىمدارى بىرنەشە ساعات ىشىندە تەڭىز سۋىندا ەرىپ كەتەتىن پلاستيك ويلاپ تاپتى
استانا. KAZINFORM - جاپونيالىق زەرتتەۋشىلەر ەكولوگيا ءۇشىن اسا ماڭىزدى جاڭالىق اشتى، ولار بىرنەشە ساعات ىشىندە تەڭىز سۋىندا ەرىپ كەتەتىن پلاستيك ءتۇرىن ازىرلەدى، دەپ حابارلايدى ازەرتادج.
بۇل جاڭالىق الەمدىك مۇحيتتى لاستاپ، جانۋارلار دۇنيەسىنە قاۋىپ ءتوندىرىپ وتىرعان زاماناۋي ەكولوگيالىق ماسەلەگە ءتيىمدى شەشىم بولا الادى.
RIKEN جاڭا ماتەريالداردى زەرتتەۋ ورتالىعى مەن توكيو ۋنيۆەرسيتەتىنىڭ عالىمدارى جاساعان جاڭا ماتەريال تەڭىز سۋىمەن ارەكەتتەسكەن كەزدە ەشقانداي ءىز قالدىرماي تەز ىدىرايدى. جوبا جەتەكشىسى تاكۋدزو ايدا بۇل جاڭالىقتىڭ قاپتاما ءوندىرىسى سالاسىن قوسا العاندا، كوپتەگەن تاراپتان ۇلكەن قىزىعۋشىلىق تۋدىرعانىن ايتتى. دەگەنمەن، ازىرگە بۇل ماتەريالدى كوممەرتسيالاندىرۋ جوسپارى جاريالانعان جوق.
بۇۇ قورشاعان ورتا جونىندەگى باعدارلاماسىنىڭ بولجاۋىنشا، 2040 -جىلعا قاراي پلاستيك قالدىقتارى ءۇش ەسە ارتىپ، جىل سايىن مۇحيتقا 23- 37 ميلليون توننا قوقىس ءتۇسۋى مۇمكىن.
- بالالار بولاشاقتا قانداي پلانەتادا ءومىر سۇرەتىنىن تاڭداي المايدى. عالىم رەتىندە ءبىز ولارعا مۇمكىندىگىنشە تازا ورتا قالدىرۋعا ءتيىسپىز، - دەدى ايدا.
جاڭا ماتەريال مۇناي نەگىزىندەگى پلاستيكپەن بىردەي بەرىكتىككە يە، الايدا تۇز اسەرىنەن ءوزىنىڭ باستاپقى كومپونەنتتەرىنە ىدىرايدى. بۇل كومپونەنتتەردى تابيعي باكتەريالار وڭاي قايتا وڭدەي الادى، وسىلايشا ميكروپلاستيك ءتۇزىلۋىنىڭ الدىن الادى. سونىمەن قاتار، بۇل پلاستيك ۋلى ەمەس، جانىپ كەتپەيدى جانە كومىرقىشقىل گازىن بولمەيدى.
