جاتىن بولمە نەعۇرلىم جىلى بولسا، ەرتەڭىندە زەيىن قويۋ سوعۇرلىم قيىندايدى - زەرتتەۋ

اۋستريادا جۇرگىزىلگەن زەرتتەۋ جاتىن بولمەدەگى تەمپەراتۋرانىڭ نەبارى 1°C- قا كوتەرىلۋىنىڭ ءوزى ۇيقى ساپاسىنىڭ ناشارلاۋىمەن جانە كەلەسى كۇنى ادامنىڭ ءوزىن ازىراق ءونىمدى سەزىنۋىمەن بايلانىستى ەكەنىن كورسەتتى، دەپ حابارلايدى turkystan.kz.

عالىمدار 82 ادامنىڭ ۇيقىسىن ەكى- ءۇش اپتا بويى باقىلاپ، بارلىعى 1189 ءتۇننىڭ دەرەگىن تالداعان. زەرتتەۋ 2025-جىلدىڭ شىلدە-تامىز ايلارىندا جۇرگىزىلگەن.

قاتىسۋشىلار Oura Ring سمارت ساقيناسىن تاعىپ ۇيىقتاعان. قۇرىلعى ولاردىڭ ۇيقى ساپاسىن، ۇزاقتىعىن جانە تۇنگى تىنىعۋ ەرەكشەلىكتەرىن تىركەگەن. ال جاتىن بولمەلەرگە ورناتىلعان ارنايى داتچيكتەر اۋا تەمپەراتۋراسى، ىلعالدىلىق پەن كومىرقىشقىل گازىنىڭ مولشەرىن ولشەگەن.

ءبىر قىزىعى، زەرتتەۋ كەزىندە بولمەلەردەگى ورتاشا تەمپەراتۋرا 24°C بولعان. ياعني عالىمدار تەك اپتاپ ىستىقتىڭ ەمەس، ادەتتەگى بولمە تەمپەراتۋراسىنىڭ ازداپ وزگەرۋىنىڭ دە اسەرىن بايقاعان.

ناتيجەسىندە ادامنىڭ جاتىن بولمەسى وزىنە ۇيرەنشىكتى تەمپەراتۋرادان 1°C جىلى بولعان تۇندەرى ۇيقى ساپاسىنىڭ كورسەتكىشى ورتا ەسەپپەن 0,5 بالعا تومەندەگەن. بۇل كورسەتكىش 100 بالدىق جۇيەمەن باعالانعان.

ال كەلەسى كۇنى قاتىسۋشىلار وزدەرىنىڭ زەيىنى مەن ونىمدىلىگىن بەس بالدىق شكالا بويىنشا ءسال تومەن باعالاعان. تەمپەراتۋرانىڭ ءار قوسىمشا گرادۋسى شامامەن 0,04 بالدىق تومەندەۋمەن بايلانىستى بولعان.

زەرتتەۋشىلەردىڭ ايتۋىنشا، جىلى بولمەدە ۇيىقتاعان ادامدار تۇندە جيىرەك مازاسىزدانىپ، تاڭەرتەڭ وزدەرىن ۇيقىسى قانباعانداي سەزىنگەن. بۇل ولاردىڭ كۇندىزگى سەرگەكتىگىنە دە اسەر ەتۋى مۇمكىن.

دەگەنمەن عالىمدار بولمە تەمپەراتۋراسىنىڭ كوتەرىلۋى ادامنىڭ ويلاۋ قابىلەتىن تىكەلەي ناشارلاتاتىنىن دالەلدەگەن جوق. ويتكەنى قاتىسۋشىلاردىڭ ناقتى جۇمىس ناتيجەسى ەمەس، وزدەرىن قانشالىقتى ءونىمدى سەزىنەتىنى باعالانعان. بايقالعان ايىرماشىلىق تا سالىستىرمالى تۇردە شاعىن بولعان.

زەرتتەۋ اۆتورلارى اسىرەسە جاز ايلارىندا جاتىن بولمەنى سالقىن ۇستاۋعا نازار اۋدارۋعا كەڭەس بەرەدى. ولاردىڭ پىكىرىنشە، تۇنگى تەمپەراتۋرانى رەتتەۋ ۇيقى ساپاسىن جاقسارتۋدىڭ جانە كۇندىزگى سەرگەكتىكتى ساقتاۋدىڭ قاراپايىم جولدارىنىڭ ءبىرى بولۋى مۇمكىن.