جاتاقحانادان ورىن تابا الماعان ستۋدەنتتەر قايدا بارادى

بۇل تۋرالى ۇكىمەت وتىرىسىندا عىلىم جانە جوعارى ءبىلىم ءمينيسترى ساياسات نۇربەك ايتتى.

ءمينيستردىڭ سوزىنشە، 2024-جىلدان باستاپ جاتاقحانا بەرۋ قىزمەتى پرواكتيۆتى فورماتقا كوشىرىلگەن. «Smart Data Ukimet» جۇيەسى مەن جوعارى ءبىلىم بەرۋدىڭ ءبىرىڭعاي پلاتفورماسى ينتەگراتسيالانعان.

ج و و- عا تۇسكەن ستۋدەنتتەردىڭ دەرەكتەرى نەگىزىندە جۇيە جاتاقحاناعا مۇقتاج ازاماتتاردى اۆتوماتتى تۇردە انىقتايدى. ءوتىنىش تە اۆتوماتتى تۇردە قالىپتاستىرىلادى. شەشىم شىققاننان كەيىن ستۋدەنتكە حابارلاما جىبەرىلەدى. بۇل رەتتە الەۋمەتتىك وسال توپتارعا باسىمدىق بەرىلەدى.

2025-جىلى وسى جۇيە ارقىلى 48282 پرواكتيۆتى قىزمەت كورسەتىلگەن.

سيفرلاندىرۋ اكىمشىلىك جۇكتەمەنى ازايتىپ، ادام فاكتورىن جانە سىبايلاس جەمقورلىق تاۋەكەلدەرىن تومەندەتۋگە مۇمكىندىك بەرەدى، - دەيدى ساياسات نۇربەك.

2026-جىلى 18 جاتاقحانا اشىلادى

ەلىمىزدىڭ باسقا وڭىرلەرىندە جاتاقحانا تاپشىلىعى جوق. سوعان قاراماستان جاڭا نىساندار سالۋ جالعاسىپ جاتىر. 2026-جىلى جالپى سىيىمدىلىعى 6857 ورىن بولاتىن 18 جاتاقحانانى پايدالانۋعا بەرۋ جوسپارلانعان.

جاڭا جاتاقحانالاردىڭ ەڭ كوبى استانادا ورنالاسقان. قازاق ۇلتتىق سپورت ۋنيۆەرسيتەتىنىڭ جانىنان ەكى جاتاقحانا اشىلىپ، وندا 1,5 مىڭنان استام ستۋدەنت تۇرا الادى.

الماتىدا بيىل حالىقارالىق ءبىلىم بەرۋ كورپوراتسياسىنىڭ 339 ورىندىق جاتاقحاناسى پايدالانۋعا بەرىلدى. قازىر تاعى جەتى جاتاقحانانى ىسكە قوسۋ جۇمىستارى جۇرگىزىلىپ جاتىر. جىل سوڭىنا دەيىن تاعى 11 جاتاقحانانى اشۋ جوسپارلانعان.

الماتىدا ستۋدەنتتەر قايدا جۇگىنە الادى؟

الماتىدا جاتاقحانادان ورىن تابا الماعان ستۋدەنتتەر ءۇشىن سيتۋاتسيالىق جانە داعدارىس ورتالىقتارى جۇمىس ىستەيدى.

سيتۋاتسيالىق ورتالىق قازاق ۇلتتىق قىزدار پەداگوگيكالىق ۋنيۆەرسيتەتىنىڭ بازاسىندا ورنالاسقان. مۇندا ستۋدەنتتەر مەن ولاردىڭ اتا-انالارى جاتاقحاناعا ورنالاسۋ ءتارتىبى، قاجەتتى قۇجاتتار جانە ءوتىنىش بەرۋ جولدارى تۋرالى اقپارات الا الادى.

ورتالىقتا سەگىز مامان جۇمىس ىستەيدى. بىلتىر ونىڭ كومەگىنە 3 مىڭنان استام ستۋدەنت جۇگىنگەن.

ال تۇرعىن ءۇي ماسەلەسى تۋىنداعان جاعدايدا ستۋدەنتتەر م. تىنىشپايەۆ اتىنداعى ALT University بازاسىنداعى داعدارىس ورتالىعىنا بارا الادى. وندا ۋاقىتشا تۇرۋعا ارنالعان 50 ورىن بار.

بىلتىر داعدارىس ورتالىعىنا 55 ستۋدەنت ۋاقىتشا ورنالاستىرىلىپ، كەيىن تۇراقتى جاتاقحانالارعا كوشىرىلگەن، - دەيدى مينيستر.

سونىمەن قاتار بارلىق وڭىردە ستۋدەنتتىك ومبۋدسمەندەر جۇمىس ىستەيدى. ولار ستۋدەنتتەردىڭ وقۋ پروتسەسى، جاتاقحانادا تۇرۋى جانە الەۋمەتتىك ماسەلەلەرىنە قاتىستى قيىندىقتاردى شەشۋگە كومەكتەسەدى.

ءبىز بۇعان دەيىن ستۋدەنتتەر جولاقى، ۇشاق جانە مۋزەيگە قاتىستى قانداي جەڭىلدىكتەردى پايدالانا الاتىنى تۋرالى جازعان ەدىك.