جاتاقحانا تاپشىلىعى: الماتىلىق ستۋدەنتتەرگە ماڭىزدى اقپارات

قالادا جاڭا ستۋدەنتتەر ۇيلەرى سالىنىپ، قوسىمشا ورىندار اشىلعانىمەن، بيىل الدىن الا ەسەپ بويىنشا شامامەن 5,7 مىڭ ورىن تاپشى.

ەلىمىزدىڭ ءار وڭىرىنەن جانە شەتەلدەن الماتىعا وقۋعا كەلەتىن جاستار ءۇشىن باسپانا ماسەلەسى اسىرەسە وقۋ جىلىنىڭ العاشقى ايلارىندا كۇردەلەنە تۇسەدى. جاتاقحاناعا ءوتىنىش بەرگەنىمەن، ورىن الا الماعان ستۋدەنتتەر قايدا جۇگىنۋى كەرەك؟ الماتى قالاسى جاستار ساياساتى باسقارماسىنىڭ باسشىسى ازيز قاجدەنبەكتىڭ سوزىنشە، ورىن بۇيىرماعان ستۋدەنت ەڭ الدىمەن سيتۋاتسيالىق ورتالىققا جۇگىنە الادى.

الماتىداعى قالالىق سيتۋاتسيالىق ورتالىق قازاق ۇلتتىق قىزدار پەداگوگيكالىق ۋنيۆەرسيتەتىنىڭ بازاسىندا، بوگەنباي باتىر كوشەسى، 142 مەكەنجايىندا ورنالاسقان. ورتالىق تاۋلىك بويى ءوتىنىش قابىلدايدى. ماماندار ستۋدەنتتەرگە بوس ورىن تابۋعا كومەكتەسىپ، جاتاقحاناعا ورنالاسۋ ءتارتىبى، قاجەتتى قۇجاتتار مەن ءوتىنىش بەرۋ جولدارىن تۇسىندىرەدى.

كول-ورتالىقتىڭ بايلانىس ءنومىرى: 77009509528+.

بۇدان بولەك، ءار جوعارى وقۋ ورنىندا جەكە سيتۋاتسيالىق ورتالىقتار جۇمىس ىستەيدى. ستۋدەنت ءوزىنىڭ ۋنيۆەرسيتەتىنە دە تىكەلەي ءوتىنىش بەرە الادى.

سونداي-اق وقۋ مەن تۇرۋ ماسەلەلەرى بويىنشا ستۋدەنتتىك ومبۋدسمەننىڭ كومەگىنە جۇگىنۋگە بولادى. رەسپۋبليكالىق ستۋدەنتتىك ومبۋدسمەن ايبولاتتىڭ بايلانىس ءنومىرى: 77777618133+.

الماتىدا ستۋدەنتتەرگە قانداي باسپانا ۇسىنىلادى؟

رەسمي دەرەكتەرگە سايكەس، قازاقستاندا 724 مىڭنان استام ستۋدەنت ءبىلىم الادى، ولاردىڭ شامامەن 35 مىڭى - شەتەل ازاماتتارى.

الماتى ەلىمىزدەگى ەڭ ءىرى ستۋدەنتتىك ورتالىق بولىپ سانالادى. وتكەن وقۋ جىلىندا مەگاپوليستە شامامەن 221 مىڭ ستۋدەنت ءبىلىم العان. ولاردىڭ 149 مىڭى ەلىمىزدىڭ وزگە وڭىرلەرىنەن كەلسە، تاعى 19 مىڭعا جۋىعى - شەتەلدىك ستۋدەنتتەر.

جاتاقحانا تاپشىلىعىن ازايتۋ ءۇشىن جوعارى وقۋ ورىندارى جەكە جاتاقحانالارمەن جانە حوستەلدەرمەن كەلىسىمشارت جاسايدى. قازىر قالادا ستۋدەنتتەردى ورنالاستىرۋعا 43 جەكە جاتاقحانا مەن 22 حوستەل تارتىلعان.

ازيز قاجدەنبەكتىڭ سوزىنشە، ۋنيۆەرسيتەتتىڭ ءوز جاتاقحاناسىندا ورىن بولماعان جاعدايدا ستۋدەنتكە حوستەل نەمەسە باسقا ورنالاستىرۋ نىسانى ۇسىنىلۋى مۇمكىن. مۇنداي جاعدايدا تاراپتار اراسىندا رەسمي كەلىسىم جاسالادى.

نەگىزىندە بۇل جاتاقحانامەن جاسالاتىن كەلىسىمشارت سەكىلدى. وندا ورنالاسۋ جانە شىعۋ مەرزىمى، ءتارتىپ ەرەجەلەرى - بارلىعى كورسەتىلەدى، - دەيدى ازيز كاجدەنبەك.

ونىڭ ايتۋىنشا، كەلىسىمشارت كۇشىندە تۇرعان كەزدە ستۋدەنتتى نەگىزسىز شىعارىپ جىبەرۋگە بولمايدى. الايدا مۇنداي ورنالاستىرۋ بەلگىلى ءبىر مەرزىمگە عانا قاراستىرىلاتىندىقتان، كەلەسى وقۋ جىلىندا ءدال سول جەردە تۇرۋعا كەپىلدىك بەرىلمەيدى.

حوستەلدەر مەن وزگە دە نىساندار ستۋدەنتتىك جاتاقحانالار قورى تولىققانعا دەيىنگى ۋاقىتشا شەشىم رەتىندە قاراستىرىلىپ وتىر.

ەشكىم دالادا قالمايدى. قانداي دا ءبىر زاڭبۇزۋشىلىق انىقتالسا، قالا اكىمدىگى مەن مينيسترلىك بىرلەسىپ جۇمىس ىستەيدى، - دەدى باسقارما باسشىسى.

جاتاقحانا الدىمەن ءبىرىنشى كۋرس ستۋدەنتتەرىنە بەرىلە مە؟

ورىن تاپشىلىعى كەزىندە باسىمدىق ءبىرىنشى كۋرس ستۋدەنتتەرىنە بەرىلگەنىمەن، بۇل جوعارى كۋرس ستۋدەنتتەرى جاتاقحانادان مۇلدەم قاعىلادى دەگەن ءسوز ەمەس.

ازيز قاجدەنبەكتىڭ ايتۋىنشا، ءۇشىنشى نەمەسە ءتورتىنشى كۋرس ستۋدەنتى جاتاقحاناعا ءوتىنىش بەرسە، ونىڭ ءوتىنىشى مىندەتتى تۇردە قارالۋى ءتيىس.

ارينە، ورنالاستىرۋ كەزىندە ءبىرىنشى كۋرس ستۋدەنتتەرىنە باسىمدىق بەرىلەدى. ولار قالاعا العاش كەلگەندىكتەن، جاڭا ورتاعا ءالى بەيىمدەلىپ ۇلگەرمەيدى، قالانى دا جاقسى بىلمەيدى، - دەپ ءتۇسىندىردى ول.

سول سەبەپتى ءبىرىنشى كۋرس ستۋدەنتتەرىن مۇمكىندىگىنشە ۋنيۆەرسيتەتكە جاقىن ورنالاسقان جاتاقحانالارعا ورنالاستىرۋعا تىرىسادى. ال جوعارى كۋرس ستۋدەنتتەرىنە وقۋ ورنىنان الىسىراق ورنالاسقان نىساندار ۇسىنىلۋى مۇمكىن.

جاتاقحاناداعى ورىنداردى ءبولۋ قىركۇيەكپەن اياقتالمايدى. وقۋ جىلى باستالعاننان كەيىن العاشقى ەكى-ءۇش ايدا ستۋدەنتتەردىڭ ءبىر بولىگى پاتەر جالداپ كوشەدى، ەندى ءبىرى تۋىستارىنىڭ ۇيىندە تۇرۋدى ءجون كورەدى. سونىڭ ناتيجەسىندە قازان ايىنا قاراي كەيبىر جوعارى وقۋ ورىندارىندا بوس ورىندار پايدا بولۋى مۇمكىن. ولار جاتاقحاناعا مۇقتاج باسقا ستۋدەنتتەرگە قايتا بولىنەدى.

الماتىداعى جاتاقحانا قۇنى قانشا؟

جاتاقحانا قۇنى ونىڭ مەنشىك تۇرىنە، ورنالاسقان جەرىنە جانە ۇسىنىلاتىن جاعدايعا بايلانىستى ءارتۇرلى.

ازيز قاجدەنبەكتىڭ مالىمەتىنشە، مەملەكەتتىك جانە ۇلتتىق جوعارى وقۋ ورىندارىنىڭ جاتاقحانالارىندا تۇرۋ اقىسى شامامەن ايىنا 25 مىڭ تەڭگەدەن باستالادى. ال جەكە جاتاقحانالاردا باعا 30-40 مىڭ تەڭگەدەن 90 مىڭ تەڭگەگە دەيىن جانە ودان دا جوعارى بولۋى مۇمكىن.

جەكە جاتاقحانالارداعى باعانىڭ جوعارى بولۋى ونداعى جاعدايعا بايلانىستى. كەيبىر نىسانداردا جەكە اس ءۇي، سانيتارلىق توراپ، كليمات-باقىلاۋ جۇيەسى قاراستىرىلعان. سونداي-اق تاماقتاندىرۋ جانە ستۋدەنتتەردى وقۋ ورنىنا جەتكىزۋ قىزمەتتەرى ۇسىنىلاتىن جاتاقحانالار بار.

كوممۋنالدىق قىزمەت اقىسى، ادەتتە، جاتاقحانادا تۇرۋ قۇنىنىڭ ىشىنە كىرەدى.

بيىل الماتىدا قانشا جاڭا جاتاقحانا اشىلادى؟

الماتىدا ستۋدەنتتىك جاتاقحانالار تاپشىلىعىن كەزەڭ- كەزەڭىمەن ازايتۋ جوسپارلانىپ وتىر. جول كارتاسىنا سايكەس، 2030-جىلعا دەيىن قالادا 20 مىڭ جاڭا ورىن اشۋ كوزدەلگەن.

بيىل شامامەن 4,7 مىڭ ورىن پايدالانۋعا بەرىلۋى ءتيىس. الماتى قالاسى جاستار ساياساتى باسقارماسى باسشىسىنىڭ ورىنباسارى ميراس نىساناليەۆتىڭ مالىمەتىنشە، جاڭا وقۋ جىلىنا التى نىسان دايىندالعان. ولار جالپى سانى 1,2 مىڭ ستۋدەنتتى قابىلداي الادى. قالعان نىسانداردى كۇزدە جانە جىل سوڭىنا دەيىن ىسكە قوسۋ جوسپارلانعان.

ۇزاقمەرزىمدى جوسپاردا قالادا 34 كە جۋىق جوبانى جۇزەگە اسىرۋ قاراستىرىلىپ وتىر. ونىڭ ىشىندە 11 جوعارى وقۋ ورنىنىڭ جوبالارى ەسەبىنەن 20 مىڭعا دەيىن، ال جەكە ينۆەستورلاردىڭ باستامالارى ارقىلى تاعى 3 مىڭعا جۋىق ورىن اشىلۋى مۇمكىن.

دەگەنمەن جاڭا جاتاقحانالاردىڭ سالىنۋىنا قاراماستان، تاپشىلىقتىڭ ناقتى قاشان تولىق جويىلاتىنىن ازىرگە ايتۋ قيىن. سەبەبى الماتىعا وقۋعا كەلەتىن جاستاردىڭ سانى دا جىل سايىن ارتىپ كەلەدى. ازيز قاجدەنبەكتىڭ ايتۋىنشا، سىرتتان كەلەتىن ستۋدەنتتەر سانى جىل سايىن شامامەن 20 پايىزعا كوبەيىپ وتىر.

سوندىقتان قالاداعى ستۋدەنتتىك باسپانا ماسەلەسىن شەشۋ تەك جاڭا جاتاقحانالار سالۋمەن شەكتەلمەيدى. ۋنيۆەرسيتەتتەردىڭ جەكە سەكتورداعى جاتاقحانالارمەن جۇمىس ىستەۋى، ۋاقىتشا ورنالاستىرۋ ورىندارىن كوبەيتۋ جانە ستۋدەنتتەرگە جەدەل كومەك كورسەتەتىن سيتۋاتسيالىق ورتالىقتاردىڭ جۇمىسى دا ماڭىزدى ءرول اتقارادى.

بۇعان دەيىن عىلىم جانە جوعارى ءبىلىم ءمينيسترى ساياسات نۇربەك وڭىرلەردە جاتاقحانا تاپشىلىعى بولمايتىنىن العا تارتتى.