جاسىل ەلگە - 20 جىل: 5 مىڭنان اسا استانالىق جاس ەڭبەك ماۋسىمىن باستادى
استانا. KAZINFORM - باعدارلاما اياسىندا ەڭبەك ەتكەن جاستارعا ايىنا 64565 تەڭگە جالاقى بەرىلەدى.
بۇگىن استانانىڭ جاستار ساياساتى ماسەلەلەرى باسقارماسىنىڭ قولداۋىمەن، رەسپۋبليكالىق ستۋدەنتتىك قۇرىلىس جانە جاستار جاساقتارى قوزعالىسى قوعامدىق قورىنىڭ ۇيىمداستىرۋىمەن «ستۋدەنتتىك قۇرىلىس جانە «جاسىل ەل» جاستار ەڭبەك جاساقتارىنىڭ XXI ەڭبەك ماۋسىمى سالتاناتتى تۇردە اشىلدى.
- بيىل «جاسىل ەل» باعدارلاماسىنا 20 جىل، بۇگىن جاڭا ەڭبەك ماۋسىمىنىڭ اشىلۋىنا كەلىپ وتىرمىز. بىلتىر استانا قالاسى بويىنشا «جاسىل ەل» باعدارلاماسى اياسىندا 4 مىڭ بالا ەڭبەك ەتتى، سۇرانىستىڭ ارتۋىنا بايلانىستى قالا باسشىلىعىنا بيۋدجەتتەن قارجى قاراستىرىپ، بيىل 5200 جاس ءوسپىرىم جانە جاستاردىڭ ەڭبەك ەتۋىنە مۇمكىندىك جاسالدى. اتالعان باعدارلاما 14 پەن 35 جاس ارالىعىنداعى ازاماتتارعا ارنالعان، جالاقى تولەنەدى. وسىلايشا، ءار جاس ازامات ءناپاقاسىن تاۋىپ، جاز بويى ەڭبەكتەنەدى. بيىل «جاسىل ەل» باعدارلاماسى «تازا قازاقستان» ەكولوگيالىق اكتسياسى اياسىندا ءوتىپ جاتىر، - دەدى استانا قالاسى اكىمدىگى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا ءتوراعاسىنىڭ ورىنباسارى، قالا اكىمىنىڭ گەندەرلىك ماسەلەلەر بويىنشا كەڭەسشىسى نازگۇل ماعجان.
ونىڭ ايتۋىنشا، «جاسىل ەل» باعدارلاماسى جاستاردى ەڭبەككە باۋليدى، سونىمەن قوسا قىزىعۋشىلىعى ورتاق جاستاردىڭ باسىن بىرىكتىرەدى.
- جاستاردى تازالىققا، ەڭبەكقورلىققا باۋليدى، جاستار وسى جەردەن وزىنە دوس تابادى، كوپشىلىكپەن جۇمىس ىستەۋدى ۇيرەنەدى. جۇمىس جاس ەرەكشەلىگىنە قاراي بولىنەدى، جاسوسپىرىمدەر مەكتەپ جانىنداعى جاسىل-جەلەككە جاۋاپتى بولادى، اعاش سۋارۋ، قوقىس جيناۋ، ارام شوپتەردى جۇلۋ تاعى سول سياقتى جۇمىس ىستەيدى، ياعني جەتكىنشەكتەرگە اۋىر جۇمىس بەرىلمەيدى. جاسوسپىرىمدەر اتا-اناسىنىڭ رۇقساتىمەن عانا جۇمىس ىستەيدى، - دەيدى ول.
«جاسىل ەل» باعدارلاماسى اياسىندا ەڭبەك ەتكەن جاستارعا ايىنا 64565 تەڭگە جالاقى بەرىلەدى. جاسوسپىرىمدەر اپتاسىنا 5 كۇن، ال كۇنىنە 4 ساعات جۇمىس ىستەيدى.
- «جاسىل ەل» باعدارلاماسى ارقىلى وسىمەن ەكىنشى جىل جۇمىس ىستەپ جاتىرمىن، ماعان ۇنايدى. جۇمىستان تىس كوپتەگەن وتە قىزىقتى ءىس- شارالار وتەدى. وزىمىزگە دە پايدالى، قوعامعا دا پايدامىز تيەدى، ايلىق ۋاقتىلى تولەنەدى. جاستاردى جۇمىس ىستەۋگە شاقىرامىن، جۇمىس قيىن ەمەس، قوقىس جينايمىز، اعاش سۋارامىز، ارام شوپتەردى جۇلامىز تاعى سول سياقتى. ارنايى فورما بەرەدى جانە قاجەتتى قۇرال- جابدىقپەن قامتيدى. جۇمىس كەزىندە قاسىمىزدا كوللەدج ۇستازدارى جانە «جاسىل ەل» باعدارلاماسىنىڭ وكىلدەرى ءجۇرىپ، جۇمىس بارىسىن قاداعالايدى، - دەيدى 16 جاسار كوللەدج ستۋدەنتى بەكجان الدابەرگەن.
سونداي-اق ەسىل وزەنى جاعاسىندا ورنالاسقان امفيتەاترعا جينالعان ەڭبەكقور جاستار كونسەرت تاماشالادى.
- قايىرلى كەش، جالىندى جاستار! سىزدەردى «جاسىل ەل» 21 ى ەڭبەك ماۋسىمىنىڭ سالتاناتتى اشىلۋىمەن قۇتتىقتايمىن. استانا قالاسىنىڭ اكىمدىگى جاستاردى ەڭبەككە باۋلۋعا ەرەكشە كوڭىل بولەدى. استانا - تازالىق پەن ءتارتىپتىڭ ۇلگىسى. سىزدەر كوپكە ۇلگىسىزدەر، قورشاعان ورتانى تازا ۇستاۋعا، ادال ەڭبەك ەتەتىندەرىڭىزگە سەنەمىز. ەڭبەك ماۋسىمى ءساتتى ءوتسىن، - دەيدى استانا قالاسىنىڭ جاستار ساياساتى ماسەلەلەرى باسقارماسى باسشىسىنىڭ مىندەتىن اتقارۋشى باعدات اتىمتايەۆ.
ايتا كەتەيىك، اتالعان جوبا جىل سايىن قازاقستان بويىنشا 30000 نان استام جاستى ماۋسىمدىق جۇمىسپەن قامتيدى. بيىل «جاسىل ەل» باعدارلاماسىنا 140 مىڭ ستۋدەنت قاتىسادى.
