جاسى 13 تەن اسقان بالالارعا ەلەكتروندى باقىلاۋ ەنگىزۋى مۇمكىن
استانا. KAZINFORM - شۆەتسيا ۇكىمەتى 13 جاستان اسقان جاسوسپىرىمدەرگە، ءتىپتى ولار قىلمىس جاساماعان جاعدايدا دا ەلەكتروندىق باقىلاۋ ەنگىزۋدى ۇسىندى، دەپ جازدى ازەرتادج.
بۇل شارا ولاردىڭ قىلمىستىق توپتارعا تارتىلۋىنىڭ الدىن الۋعا باعىتتالعان جانە جەڭىلدەتىلگەن ادىستەر تاۋسىلعاننان كەيىن عانا قولدانىلادى. نەگىزگى ماقسات - الەۋمەتتىك قىزمەتتەر بەلگىلەگەن ساعاتتاردا بالانىڭ ۇيدە بولۋىن قامتاماسىز ەتۋ.
الەۋمەتتىك قىزمەت ىستەرى جونىندەگى مينيستر كاميللا ۆالتەرسسون گرەنۆاللدىڭ ايتۋىنشا، 100 بالا باقىلاۋعا الىنۋى مۇمكىن. باقىلاۋ اقىلدى ساعات سەكىلدى قۇرىلعىلاردىڭ كومەگىمەن جۇزەگە اسىرىلادى دەپ جوسپارلانعان.
شارانى قولدانۋ تۋرالى شەشىمدى الەۋمەتتىك قىزمەتتەردىڭ ءوتىنىشى نەگىزىندە اكىمشىلىك سوت قابىلدايدى. ونىڭ ورىندالۋىن باقىلاۋ مەملەكەتتىك مەكەمەلەر باسقارماسىنا جۇكتەلەدى. باقىلاۋ مەرزىمى 6 ايعا دەيىن سوزىلۋى مۇمكىن.
زاڭ جوباسى ءقازىردىڭ وزىندە ءبىرقاتار ساراپشىلىق ۇيىمداردىڭ قاتاڭ سىنىنا ۇشىرادى. ولار بۇل باستامانى قىلمىسقا كۇدىكتى ەمەس بالالارعا قاتىستى تىم قاتال دەپ ەسەپتەيدى.
سونىمەن قاتار، ليبەرالداردىڭ قۇقىقتىق ساياسات جونىندەگى وكىلى مارتين مەلين كوپ اتا- انالار قاتاڭ شارالاردى قولدايتىنىن اتاپ ءوتتى.
اتا-انالار «كومەكتەسىڭدەر، مەن بالامدى قورعاي المايمىن» دەيدى. ءبىراق ولاردىڭ ءوتىنىشى تالقىلاۋدا سيرەك قاراستىرىلادى، - دەدى ول.
زاڭ جوباسى زاڭ كەڭەسىنىڭ قاراۋىنا جىبەرىلدى. ونىڭ قاشان كۇشىنە ەنەتىنى ازىرگە بەلگىسىز، سەبەبى قاجەتتى تەحنولوگيالاردى ساتىپ الۋ پروتسەسى جالعاسىپ جاتىر.
ايتا كەتەيىك، شۆەتسيا ازاماتتىق الۋ تالاپتارىن قاتاڭداتتى.
