جاستاردى كۇشپەن ۇستاۋ: قورعانىس مينيسترلىگى تۇسىنىك بەردى
استانا. KAZINFORM - بۇقارالىق اقپارات قۇرالدارى مەن الەۋمەتتىك جەلىلەردە جاستاردى ەرىكسىز ۇستاپ الىپ، جەرگىلىكتى اسكەري باسقارۋ ورگاندارىنا جەتكىزىپ جاتقان بەينەماتەريالدار تاراتىلۋدا.

وسىعان بايلانىستى قورعانىس مينيسترلىگى جىلىنا ەكى رەت (كوكتەمگى جانە كۇزگى اسكەرگە شاقىرۋ) جۇزەگە اسىرىلاتىن اسكەري قىزمەتكە شاقىرۋدىڭ قولدانىستاعى ءتارتىبىن ءتۇسىندىردى.
"شاقىرۋ ناۋقانى بارىسىندا كەيبىر ازاماتتاردىڭ اسكەري قىزمەتتەن جالتارىپ، جەرگىلىكتى اسكەري باسقارۋ ورگاندارىنا ۋاقتىلى كەلمەۋ فاكتىلەرى بايقالادى.
سونىمەن قاتار، اسكەرگە شاقىرۋ جاسىنداعى ازاماتتاردى ەسەپكە الۋدا دا قيىندىقتار تۋىندايدى. ويتكەنى ولاردىڭ كوپشىلىگى تىركەلگەن جەرىندە تۇرمايدى. ال قونىس اۋدارعان جاعدايدا جاڭا تۇرعىلىقتى مەكەنجايىنا تىركەلمەيدى.
قولدانىستاعى زاڭناماعا سايكەس شاقىرۋ قاعازىن اسكەرگە شاقىرىلۋشىنىڭ جەكە وزىنە تاپسىرۋ مۇمكىن بولماعان كەزدە ونىڭ كەلۋىن قامتاماسىز ەتۋ ىشكى ىستەر ورگاندارىنا جۇكتەلەدى"، - دەيدى ق ر قارۋلى كۇشتەرى باس شتابى ۇيىمداستىرۋ- جۇمىلدىرۋ جۇمىسى دەپارتامەنتى باستىعىنىڭ ورىنباسارى رۋسلان وماروۆ.
ونىڭ سوزىنشە، رەيد كەزىندە كەيبىر ازاماتتار ىشكى ىستەر ورگاندارى قىزمەتكەرلەرىنىڭ زاڭدى تالاپتارىنا باعىنباي، قارسىلىق كورسەتىپ جاتادى. مۇنداي جاعدايدا پوليتسيا قىزمەتكەرلەرى ولاردى ءماجبۇرلى تۇردە ۇستاپ، شاقىرۋ پۋنكتىنە جەتكىزۋدى جۇزەگە اسىرۋعا قۇقىلى.
"شاقىرۋ كوميسسياسى جەتكىزىلگەن ادامداردىڭ مارتەبەسىن سول جەردە انىقتايدى. مەرزىمدى اسكەري قىزمەتكە شاقىرۋعا نەگىز بولماعان جاعدايدا ولاردى ۇيىنە جىبەرەدى. ال شاقىرۋعا نەگىز بولسا، مەديتسينالىق كوميسسيادان وتۋگە جانە شاقىرۋ شەڭبەرىندەگى باسقا دا ءىس- شارالاردى وتكىزۋگە جىبەرەدى"، - دەدى ول.
ەستەرىڭىزگە سالا كەتەيىك، مەرزىمدى اسكەري قىزمەتكە شاقىرۋدان جالتارعانى ءۇشىن زاڭنامادا اكىمشىلىك جانە قىلمىستىق جاۋاپكەرشىلىك قاراستىرىلعان.