جاستارعا جالداپ وتىرعان پاتەرلەرىن ساتىپ الۋ قۇقىعى بەرىلە مە
استانا. KAZINFORM - جۇمىس ىستەيتىن جاستارعا جالعا العان پاتەرلەرىن ساتىپ الۋ قۇقىعى بەرىلە مە؟ ءماجىلىس دەپۋتاتتارى تاراپىنان جولدانعان بۇل ساۋالعا پرەمەر- ءمينيستردىڭ ورىنباسارى قانات بوزىمبايەۆ جاۋاپ بەردى.
«2019 -جىلدان باستاپ استانا، الماتى جانە شىمكەنت قالالارىندا جۇمىس ىستەيتىن جاستارعا ساتىپ الۋ قۇقىعىنسىز جالعا بەرىلەتىن پاتەرلەر بەرۋ تەتىگى جۇمىس ىستەيدى. مەحانيزمنىڭ ماقساتى - جاستارعا تۇرعىن ءۇي ساتىپ الۋعا قاراجات جيناۋعا مۇمكىندىك بەرۋ جانە ولاردى قاراجاتتى ۇقىپتى جيناۋعا ىنتالاندىرۋ. سونداي- اق، جالعا الۋشىلاردىڭ ءجيى اۋىسۋى جانە جاڭا جالعا بەرىلەتىن پاتەرلەر سالۋ ەسەبىنەن بۇل تەتىك تۇرعىن ۇيگە مۇقتاج ازاماتتاردىڭ بارىنشا كوپ سانىن قامتۋعا مۇمكىندىك بەرەتىنىن اتاپ وتكەن ءجون»، - دەدى ۆيتسە- پرەمەر جاۋابىندا.
ونىڭ اتاپ وتۋىنشە، وسى تەتىكتى ودان ءارى ىسكە اسىرۋ ءۇشىن 2023-2025 -جىلدارعا اتالعان قالالاردا قوسىمشا 9 مىڭ جالعا بەرىلەتىن پاتەر (جىل سايىن 3 مىڭ پاتەر) ساتىپ الۋ ءۇشىن جەرگىلىكتى بيۋدجەتتەردەن 96,9 ميلليارد تەڭگە مولشەرىندە قاراجات ءبولۋ جوسپارلانعان.
«جوعارىدا ايتىلعانداردى ەسكەرە وتىرىپ، وسى كەزەڭدە ۇكىمەت جاستارعا جالعا بەرىلەتىن پاتەرلەردى ساتىپ الۋ قۇقىعىن بەرۋ ماسەلەسىن قاراستىرىلمايدى»، - دەدى قانات بوزىمبايەۆ.
