جاستارعا جالعا بەرۋ ءۇشىن ءىرى قالالاردا 9 مىڭ پاتەر ساتىپ الىنادى
رەسپۋبليكالىق ماڭىزى بار قالالاردا جاستارعا 3 مىڭ جالدامالى پاتەر ساتىپ الۋ ءۇشىن 32,3 ميلليارد تەڭگە بولىنبەك.
بۇل تۋرالى ءماجىلىس دەپۋتاتتارىنىڭ ساۋالىنا پرەمەر-ءمينيستردى ءبىرىنشى ورىنباسارى رومان سكلياردىڭ جاۋابىندا ايتىلعان، دەپ حابارلايدى Kazinform.
«جاستار جىلىنىڭ اشىلۋ سالتاناتىنداعى مەملەكەت باسشىسىنىڭ تاپسىرماسىنا سايكەس، جاستاردىڭ تۇرعىن ءۇي ماسەلەلەرىن شەشۋ ماقساتىندا 2019-2022-جىلدارى رەسپۋبليكالىق بيۋجەت قاراجاتى ەسەبىنەن استانا، الماتى جانە شىمكەنت قالالارىندا جۇمىس ىستەيتىن جاستارعا ارنالعان 10 مىڭعا جۋىق جالعا بەرۋ پاتەرلەرى سالىندى. 2023-2025-جىلدارى اتالعان قالالاردىڭ ءارقايسىسىندا قوسىمشا 3 مىڭ جالعا بەرۋ پاتەرلەرىن ساتىپ الۋ ءۇشىن جەرگىلىكتى بيۋجەتتەردەن 32,3 ميلليارد تەڭگە ءبولۋ جوسپارلانۋدا»، - دەدى ۇكىمەت باسشىسىنىڭ ءبىرىنشى ورىنباسارى جاۋابىندا.
سونداي-اق، ول باسقا وڭىرلەردىڭ جەرگىلىكتى اتقارۋشى ورگاندارى وزدەرىنىڭ دايىندىعى مەن قارجىلىق مۇمكىندىكتەرىنە قاراي جۇمىس ىستەيتىن جاستار ءۇشىن جەرگىلىكتى بيۋجەت ەسەبىنەن جالعا بەرىلەتىن تۇرعىن ءۇي سالۋ ماسەلەسىن قاراستىراتىندىعىن اتاپ وتەدى.
«ءوز كەزەگىندە، ساتىپ الۋ قۇقىعىنسىز جالعا بەرۋ تەتىگى جاستارعا ءوز تۇرعىن ءۇيىن ساتىپ الۋ ءۇشىن باستاپقى جارناعا قاراجات جيناۋعا باعىتتالعان. مۇنداي جۇيە ازاماتتاردى قاراجاتتى ۇقىپتى جيناقتاۋعا جانە تاۋەلدى كوڭىل-كۇيدى تومەندەتۋگە ىنتالاندىرادى»، - دەدى رومان سكليار.
