جاستارعا «9-20-25» جاڭا باعدارلاماسى ازىرلەنىپ جاتىر
«وتباسى بانكى» جاستارعا ارنالعان «9-20-25» جاڭا باعدارلاماسىن ازىرلەپ جاتىر. بۇل تۋرالى مادەنيەت جانە اقپارات ءمينيسترى ايدا بالايەۆا ايتتى، دەپ حابارلايدى Kazinform.
«دارىندى جاستاردى مەملەكەتتىك تۇرعىدا قولداۋ ماقساتىندا «دارىن» مەملەكەتتىك جاستار سىيلىعى جىل سايىن بەرىلىپ كەلەدى. زاڭعا سايكەس، ۇمىتكەرلەردىڭ جاسى 35 جاسقا دەيىن ۇلعايتىلدى. ماراپاتتاۋ نوميناتسيالارىنا وزگەرىستەر ەنگىزىلدى. وزدەرىنىڭ ناقتى ماقساتتارىنا جانە قوعامنىڭ يگىلىگىنە باعىتتالعان جاستاردى تاربيەلەۋ ماقساتىندا «قوعامدىق قىزمەت» نوميناتسياسى «كرەاتيۆتى باستامالار» نوميناتسياسىمەن اۋىستىرىلدى. بۇل رەتتە مەملەكەت باسشىسى بەلگىلەگەن «تاۋەلسىزدىك ۇرپاقتارى» گرانتى اياسىندا بيزنەس، عىلىم، مادەنيەت، ب ا ق جانە اقپاراتتىق تەحنولوگيالار سالاسىنداعى 30 ۇزدىك جوبا انىقتالدى. قازىرگى ۋاقىتتا «وتباسى بانكىمەن» بىرلەسىپ، «9-20-25» جاڭا باعدارلاماسى ازىرلەنۋدە، ونىڭ نەگىزگى قاتىسۋشىلارى جاستار بولماق»، - دەدى مينيستر ورتالىق كوممۋنيكاتسيالار قىزمەتىندەگى بريفينگتە.
ءمينيستردىڭ ايتۋىنشا، بيىل «مەملەكەتتىك جاستار ساياساتى تۋرالى» زاڭعا تۇجىرىمدامالىق تۇزەتۋلەر ەنگىزىلدى. بۇل زاڭنىڭ باستى جاڭالىقتارىنىڭ ءبىرى - جاستاردىڭ جاسىن 35 جاسقا دەيىن ۇلعايتۋ. وسىلايشا، جاستاردىڭ سانى 3,7 ميلليون ادامنان 5,7 ميلليون ادامعا دەيىن ارتتى.
«2023-جىلى جاستاردىڭ دامۋ يندەكسى ەنگىزىلدى. بۇل كورسەتكىش مەملەكەتتىك ورگانداردىڭ جاستارمەن جۇمىسىنىڭ جانە ولاردىڭ ماسەلەلەرىن شەشۋدىڭ تيىمدىلىگىن باعالاۋعا مۇمكىندىك بەرەدى. سونداي-اق، 2023-2029-جىلدارعا ارنالعان مەملەكەتتىك جاستار ساياساتىنىڭ تۇجىرىمداماسى بەكىتىلدى. وندا اۋىل جاستارىمەن جۇمىستان باستاپ پاتريوتتىق تاربيەگە دەيىنگى 7 باعىتى قامتيدى. ودان باسقا قۇجاتتا 80 ءىس-شارالار جوسپارى قابىلداندى. تۇجىرىمدامانىڭ العاشقى ناتيجەلەرى بار. 943 مىڭ ادام جۇمىسپەن قامتىلسا، ونىڭ 467 مىڭى - جاستار»، - دەدى ايدا بالايەۆا.
