جاستار باسپانا الۋ ءۇشىن شەتەل اسىپ جۇمىس ىستەۋگە ءماجبۇر - دەپۋتات

 استانا. KAZINFORM - ءماجىلىس دەپۋتاتى داۋلەت مۇقايەۆ جاستاردى قولجەتىمدى باسپانامەن قامتۋ ماسەلەسىن كوتەردى.

«ۇكىمەت تاراپىنان جاستارعا ءتيىستى دەڭگەيدە كوڭىل ءبولىنىپ جاتىر ما؟ ەڭ باستى قاجەتتىلىك باسپانا ماسەلەسى دە شەشىمىن تاپپاي وتىر. جىرى باسىلماعان جاستارعا بەرىلگەن جالدامالى پاتەر جايىندا رومان ۆاسيليەۆيچكە دە دەپۋتاتتىق ساۋال جولداعانمىن. «جاستاردى تۇرعىن ۇيمەن قامتاماسىز ەتۋ ماسەلەسى ۇكىمەتتىڭ باقىلاۋىندا» دەپ قىسقا قايىرعان. جاستاردىڭ تالاپ- تىلەگىن ناقتى شەشىمدەر مەن ارەكەتتەر جاسايدى دەگەن نيەتپەن قايتا جولداپ وتىرمىن»، - دەدى داۋلەت مۇقايەۆ ءماجىلىس وتىرىسىندا دەپۋتاتتىق ساۋال جولداپ.

حالىق قالاۋلىسىنىڭ مالىمەتىنشە، 2019 -جىلدان بەرى استانا، الماتى، شىمكەنت قالالارىندا جالدامالى پاتەردە تۇرىپ جاتقان جاستاردىڭ سانى 10000 عا جۋىقتاعان. 2019 -جىلى باسپانا العان جاستاردىڭ باسپانانى بوساتۋىنا دا از ۋاقىت قالدى.

ونىڭ ايتۋىنشا، مەگاپوليستەردەگى جاستاردىڭ دالادا قالۋ قاۋپى جوعارى. وتكەن جىلى بەرىلۋ كەرەك پاتەرلەر الماتى قالاسىنىڭ جاستارىنا ءالى دەر بەرىلمەدى، ناقتى ءتىزىم، ناتيجە شىقپادى. ودان ءارى د. مۇقايەۆ جالدامالى پاتەر العان جاستاردىڭ قارجى جيناپ، باسپانا الا الماۋ سەبەبىن اتادى.

«2019 -جىلدان بەرى ينفلياتسيا دەڭگەيى دە شارىقتاپ، ءۇي باعاسى جىلدان- جىلعا ءوستى. وسىدان 5 جىل بۇرىن رەسپۋبليكا بويىنشا پاتەردىڭ ورتاشا شارشى مەترى 200 مىڭ بولسا، قازىر 400 مىڭعا جۋىقتادى، 2 ەسە ءوستى. شىندىققا تۋرا قاراساق، باسپاناعا قارجى جيناۋدان، قىمباتشىلىق قىسپاققا الىپ كۇنكورىس ماسەلەلى الدىڭعى ورىنعا شىقتى، بۇل - ءبىر. ەكىنشىدەن، ەلدە جاستارعا ارنالعان ءتيىمدى مەملەكەتتىك باعدارلاما جوق. ەلدە ءتيىمدى باعدارلامانىڭ جوقتىعىنان جاستار باسپانا الۋ ءۇشىن شەتەل اسىپ جۇمىس ىستەۋگە ءماجبۇر. كەلمەي قالىپ قويىپ جاتقانى قانشاما. بۇل ەلىمىزدە دارىندى، تالانتتى جاستاردىڭ ازايۋىنا الىپ كەلۋدە. ۇشىنشىدەن، جالدامالى پاتەر العان جاستار وزگە دە مەملەكەتتىك باعدارلامالار مەن ءۇي كەزەگىندە تۇرۋ مۇمكىندىگىنەن ايىرىلعان. اقشاسىن جيناپ، ءتۇيىپ وتىرعان جاستار، باسقا باعدارلاماعا قاتىسا الماسا قالاي باسپانالى بولماق»، - دەيدى ول.

دەپۋتات جوعارىدى اتالعان فاكتورلاردى ەسكەرە وتىرىپ، جاستاردىڭ ءتيىمدى باسپانا الۋىنا جاعداي جاساۋ جانە كەمى %10 دىق باستاپقى جارنامەن وزدەرى تۇرىپ جاتقان باسپاناسىن ساتىپ الۋعا مۇمكىندىك بەرۋ ماسەلەسىن قاراستىرۋدى قايتا سۇرادى.

«پايىزدىق مولشەرلەمەسى دە %5 دان اسپاۋى ءتيىس نەمەسە جالدامالى پاتەردە تۇرۋ مەرزىمىن ۇزارتۋ كەرەك»، - دەيدى داۋلەت مۇقايەۆ.