جاساندى ينتەللەكت ناپولەوننىڭ 217 جىل بۇرىن جازعان قۇپيا حاتىن اشتى
استانا. KAZINFORM - جاساندى ينتەللەكت ناپولەون بوناپارتتىڭ 217 جىل بويى مازمۇنى بەلگىسىز بولىپ كەلگەن قۇپيا حاتىن شيفردان شىعاردى. بۇل تۋرالى The Telegraph گازەتىنە سىلتەمە جاساپ، 24kg جازدى.
باسىلىمنىڭ مالىمەتىنشە، GPT-6 Astra نەيروجەلىسى فرانسيا يمپەراتورى ناپولەون بوناپارتتىڭ 1809 -جىلى جازعان قۇپيا حاتىن وقۋعا مۇمكىندىك بەرگەن.
حات ناپولەوننىڭ وگەي ۇلى ەجەن ارقىلى گەنەرال وگيۋست دە مارمونعا جىبەرىلگەن. وندا فرانسيا مەن گابسبۋرگ مونارحياسى اراسىنداعى اسكەري قاقتىعىس قارساڭىندا فرانسۋز جانە اۆستريالىق اسكەرلەردىڭ ورنالاسۋى مەن سانى تۋرالى مالىمەتتەر بولعان.
حاتتى شيفردان شىعارۋمەن SentinelOne كومپانياسىنىڭ جاساندى ينتەللەكت جونىندەگى ينجەنەرى كارتەر چەرچ اينالىسقان. ونىڭ ايتۋىنشا، نەيروجەلى شامامەن 1300 تاڭبادان تۇراتىن ءماتىندى تالداپ، شيفردىڭ كريپتوگرافتارعا بەلگىلى ەلەمەنتتەرىمەن سالىستىرۋعا التى ساعاتتاي ۋاقىت جۇمساعان.
تالداۋ بارىسىندا «يميتاتسيالىق كۇيدىرۋ» ءادىسى قولدانىلعان. بۇل ءتاسىل ارقىلى جۇيە سوزدەردىڭ ءارتۇرلى نۇسقالارىن قاراستىرىپ، الىنعان ناتيجەلەردى گەنەرال مارموننىڭ ساقتالعان وزگە حاتتارىمەن سالىستىرعان.
شيفرى شەشىلگەن حاتتا گەنەرالعا جورىققا دايىندالۋ جانە «بىرنەشە جاساقتان نەمەسە توبىردان» قورىقپاۋ تاپسىرىلعان. سونداي-اق حاتتا اۆسترياعا «بارلىق باعىتتان دەرەۋ شابۋىل جاسالاتىنى» ايتىلعان.
دەسە دە جاقىندا نوبەل سىيلىعىنىڭ لاۋرەاتى دجەففري حينتون ادامزات جاساندى ينتەللەكتىنى باقىلاۋدان شىعارىپ الۋى مۇمكىن ەكەنىن ايتىپ، دابىل قاققان ەدى.
