جاساندى ينتەللەكتىدەن قانداي قاۋىپ بار
استانا. KAZINFORM - جاساندى ينتەللەكت تەرىس پيعىلدى ادامنىڭ قولىنا تۇسسە، زور قاۋىپ توندىرەدى. IT- ساراپشىلار ج ي- دەن قانداي قاتەر كەلۋى مۇمكىن ەكەنىن، ودان قالاي قورعانۋ كەرەكتىگىن ايتتى.
— ChatGPT- ءدى ايتار بولساق، كوپ ادام ونى دوسى سەكىلدى كورەدى. جاي اڭگىمە ايتۋ ءۇشىن قولدانادى. ءبىراق ءسىز «ول دوستىڭ» ءبارىن ەسىنە ساقتاپ الاتىنىن ۇمىتپاۋىڭىز كەرەك. بولاشاقتا دا ول ءسىزدىڭ دوسىڭىز بولىپ قالا بەرە مە دەگەندى ويلانا ءجۇرۋ كەرەك. سوندىقتان ونىمەن اڭگىمەلەسكەندە ونشا تانىس ەمەس اداممەن رەستوراندا وتىرىپ سويلەسكەندەي اراقاشىقتىق ساقتاپ سويلەسسەڭىز، ەشقانداي قاۋىپ جوق. ءبىراق ءوزىڭ جايلى تىم جەكە مالىمەتتەردى ايتۋعا بولمايدى. اقشانى قايدا ساقتايسىز، قانداي ءالسىز تۇستارىڭىز بار، وندايدى كوپ ايتا بەرمەگەن دۇرىس، - دەيدى Astana Hub باس ديرەكتورىنىڭ كەڭەسشىسى، ستارتاپتار مەن تەحنولوگيالاردى دامىتۋ سالاسىنداعى ساراپشى دانابەك قالياجداروۆ.
مامان جاساندى ينتەللەكت ءباس تىگۋگە اۋەس ادامداردى ءوزى انىقتاپ الىپ، وعان سونداي جارنامالاردى ۇسىنۋى مۇمكىن ەكەنىن ايتادى. مۇنداي جاعدايدا ج ي «مىنا جەردەن كرەديت الىپ، مىنا ويىنعا ءباس تىك» دەسە، ونسىز دا قۇمار ويىنعا تاۋەلدىلىگى بار ادام ونىڭ ايتقانىن ورىنداپ قويۋى ىقتيمال.
IT- كاسىپكەر، IT- ساراپشى جانە مەنتور ازات ەسەنوۆ ج ي- ءدىڭ ادامعا قاۋىپتى تاعى ءبىر قىرىن ايتتى.
— بيزنەستە جاساندى ينتەللەكت بايلانىس ورتالىقتارىنىڭ قىزمەتىنە ەنگىزىلگەن. بۇرىن ماعان بىرەۋ قوڭىراۋ شالسا، مەن بىرنەشە سەكۋندتا- اق ونىڭ ادام الدە روبوت ەكەنىن تۇسىنە قوياتىنمىن. ءقازىر دە ماعان سپام-قوڭىراۋلار ءتۇسىپ تۇرادى. كەيبىرەۋىنىڭ ارتىندا ءبىر دىبىستارى، كىدىرىسى بولادى، تىپتەن ونىڭ جاساندى ينتەللەكت ەكەنىن اڭعارماي قالاسىڭ. وسى مۇمكىندىكتى الاقتار قولدانا الادى. بۇنى ءبىرىنشى قاۋىپ دەپ ايتار ەدىم، - دەيدى مامان.
سونداي-اق، ول مۇنداي جاعدايدا قولدانىلاتىن ەڭ ءتيىمدى لايفحاكتى دا اتاپ ءوتتى.
— قوڭىراۋدى جاساندى ينتەللەكت شالىپ تۇر دەپ كۇدىكتەنسەڭىز، بىردەن «قازاقشا سويلەڭىز» دەپ ايتىڭىز. سوندا ول بايلانىستى ۇزە قويادى. ءبىراق بۇل ءتاسىل دە ۋاقىتشا عانا جارامدى. الداعى بىرنەشە جىلدا بۇل كەدەرگىنى دە ولار جويا الادى دەپ ويلايمىن، - دەيدى ساراپشى.
ايتا كەتەيىك، ازات ەسەنوۆ — Upwork حالىقارالىق پلاتفورماسىندا ەكى ءتۇرلى كوماندامەن Top Rated ستاتۋسىن العان جالعىز قازاقستاندىق.
وسىعان دەيىن جاساندى ينتەللەكت قولداناتىن كاسىپورىنداردى مەملەكەتتىك قولداۋ شارالارى ازىرلەنگەنى تۋرالى حابارلادىق.
