جاساندى ينتەللەكتتى دۇرىس قولدانباساق، ويلاۋ قابىلەتىمىز السىرەيدى - زەرتتەۋشىلەر پىكىرى

ماماندىردىڭ ايتۋىنشا، نەيروجەلىگە ويلاۋ پروتسەسىن كەزەڭ-كەزەڭىمەن ءتۇسىندىرۋدى سۇراۋ كەرەك. Microsoft زەرتتەۋشىلەرى جاساندى ينتەللەكتتى (ج ي) دۇرىس پايدالانباۋ ادامنىڭ ويلاۋ قابىلەتىنىڭ السىرەۋىنە اكەلۋى مۇمكىن ەكەنىن انىقتادى. ءبىراق بۇعان جول بەرمەۋگە بولادى.

زەرتتەۋ بارىسىندا 319 ماماننىڭ پىكىرى ساراپتالدى. ناتيجەسىندە، جاساندى ينتەللەكت (ج ي) قۇرالدارىنا دەگەن جوعارى سەنىم ادامداردىڭ جۇمىسىنا جۇمسايتىن زياتكەرلىك كۇش- جىگەرىن تومەندەتەتىنى انىقتالدى.

«ج ي-گە دەگەن سەنىمنىڭ جوعارى بولۋى سىني ويلاۋدى ازايتسا، ال وزىنە دەگەن سەنىمنىڭ جوعارى بولۋى، كەرىسىنشە، سىني ويلاۋدى كۇشەيتەدى»، - دەلىنگەن زەرتتەۋدە.

بۇل شامادان تىس سەنىم ادامداردىڭ ج ي قاراپايىم تاپسىرمالاردى ورىنداي الادى دەگەن تۇسىنىگىنە نەگىزدەلگەن.

زەرتتەۋ قاتىسۋشىلارىنىڭ ءبىرى مويىنداعانداي: «بۇل - قاراپايىم تاپسىرما، مەن ChatGPT ونى قيىندىقسىز ورىنداي الاتىنىن ءبىلدىم، سوندىقتان مەن مۇلدەم ويلانعان جوقپىن».

عالىمدار كەز كەلگەن ج ي ۇسىنعان اقپاراتتى قايتا تەكسەرۋدى ۇسىنادى، ءتىپتى جاۋاپ ايقىن كورىنسە دە تاعى ءبىر تەكسەرگەن ءجون.

سونداي-اق، «نەگە ج ي وسىنداي قورىتىندىعا كەلدى؟» دەگەن سۇراقتى وزىڭىزگە دە قويۋ اسا ماڭىزدى.

ماماندىردىڭ ايتۋىنشا، نەيروجەلىگە ويلاۋ پروتسەسىن كەزەڭ-كەزەڭىمەن ءتۇسىندىرۋدى سۇراۋ كەرەك. بۇل ءتاسىل ج ي-مەن جۇمىس ىستەۋدى ءتيىمدى ەتىپ، ويلاۋ قابىلەتىن ساقتاۋعا كومەكتەسەدى.