جاساندى ينتەللەكت ساياساتكەرلەردىڭ جالعان داۋىسىن جازىپ، جاريالاعان

بريتانيادا دا جىلدىڭ ەكىنشى جارتىسىنا جوسپارلانعان سايلاۋدىڭ ءادىل وتۋىنە جاساندى ينتەللەكت كەرى ىقپال ەتەدى دەگەن قاۋىپ بار. بۇعان دەيىن دە جوعارى لاۋازىمدى ساياساتكەرلەر ديپفەيكتىڭ قۇربانى بولىپ ۇلگەرگەنى بەلگىلى، دەپ حابارلايدى Kazinform.

ماسەلەن، وپپوزيتسيالىق لەيبوريستەر پارتياسىنىڭ كوشباسشىسى كير ستارمەردىڭ ارىپتەستەرىنە داۋىس كوتەرىپ، بەيادەپ سوزدەر ايتىپ جاتقان داۋسى الەۋمەتتىك جەلىلەردە تارادى. كەيىن بۇل - جاساندى ينتەللەكتىڭ كۇشىمەن جاسالعان جالعان اۋديوجازبا ەكەندىگى ءمالىم بولدى.

ودان كەيىن لوندون ءمەرى ساديك حاننىڭ پالەستينانى قولداۋشىلاردىڭ شەرۋىنە بايلانىستى ەكىنشى دۇنيەجۇزىلىك سوعىس قۇرباندارىن ەسكە الۋ شاراسىن كەيىنگە قالدىرۋ تۋرالى داۋىسى جاريالاندى. ول دا قاساقانا تارالعان جالعان اقپارات بولىپ شىقتى.

پوليتسيا اۋديوجازبالاردى زەرتتەپ، «قىلمىستىق قۇقىق بۇزۋشىلىق ەمەس» دەگەن قورىتىندىعا كەلدى. ساراپشىلار ديپفەيكتەرمەن كۇرەس جۇرگىزىلمەسە، دەموكراتياعا قاۋىپ تونەدى دەپ ەسەپتەيدى.

«تەحنولوگيالاردى تەحنولوگيامەن جەڭۋگە بولادى. ديپفەيكتەردى انىقتاۋ مەحانيزمدەرى جەتىلدىرىلۋدە. مىسالى، ينتەل كومپانياسى تەرىنىڭ استىنداعى قان اينالىمىن زەرتتەۋ ارقىلى جالعان ۆيدەولاردى تاباتىن تەحنولوگيا ويلاپ تاپتى. ءبىراق ولار جەتىلدىرىلگەن سايىن جاساندى ينتەللەكت تە تەز دامىپ كەلەدى جانە بۇرىنعىدان دا ساپالى كونتەنت ۇسىنىپ جاتىر. اسىرەسە، اۋديوجازبانىڭ راس-وتىرىگىن اشكەرەلەۋ قيىنعا تۇسۋدە. مەنىڭشە، ورتا مەرزىمدى كەلەشەكتە وسى سالانى رەتتەيتىن ارنايى زاڭ قابىلدانادى»، - دەيدى Century tech كومپانياسىنىڭ باس ديرەكتورى پريا لاكحاني.