جاساندى ينتەللەكت قازاق تىلىندە سويلەۋى مۇمكىن

 قازاق ءتىلى Google, Microsoft كومپانيالارى ازىرلەپ جاتقان جاساندى ينتەللەكتكە ەنۋى مۇمكىن. 

 

مۇنى قازاقستان حالقى اسسامبلەياسى كەڭەسىنىڭ كەڭەيتىلگەن وتىرىسىندا عىلىم جانە جوعارى ءبىلىم ءمينيسترى ايتتى، دەپ حابارلادى turkystan.kz 24.kz-كە سىلتەمە جاساپ.

ساياسات نۇربەك: «كەز كەلگەن ءتىلدىڭ بولاشاعى سيفرلىق جۇيەمەن بايلانىستى»، - دەدى.

جيىن بارىسىندا مەملەكەت باسشىسى قاسىم-جومارت توقايەۆتىڭ اسسامبلەيانىڭ 32-شى سەسسياسىندا جانە قازاقستان حالقىنا ارناعان جولداۋىندا بەرگەن تاپسىرمالارىن ىسكە اسىرۋ جايى پىسىقتالدى.

سونىڭ ءبىرى - ءبىلىم- عىلىم. مينيستر ساياسات نۇربەك 7 جىلعا ارنالعان تۇجىرىمداما ازىرلەنگەنىن ايتتى. 5 باعىتتان تۇراتىن قۇجاتتا سيفرلىق جۇيەگە باسىمدىق بەرىلگەن.

«ءبىزدىڭ ارنايى عىلىمي-زەرتتەۋ ينستيتۋتىمىز بار «ءتىل قازىنا» دەگەن. سول ينستيتۋت ءبىزدىڭ لينگۆيستيكالىق كورپۋستى پىسىقتاپ جاتىر. نازاربايەۆ ۋنيۆەرسيتەتىنىڭ باستاعان ۇلكەن جۇمىسى بار، سول لينگۆيستيكالىق كورپۋستى تولىق سيفرلىق فورماتقا كوشىرىپ جاتىر. Google, Microsoft كومپانيالارىمەن ءبىز قازىر كەلىسىپ جاتىرمىز. قازاق ءتىلى سولاردىڭ ۆيرتۋالدى كومەكشىلەرى، سولاردىڭ قازىرگى جاساپ جاتقان ينتەللەكتەرىنىڭ ىشىندە بولۋى كەرەك»، - دەدى عىلىم جانە جوعارى ءبىلىم ءمينيسترى ساياسات نۇربەك.