جاساندى ينتەللەكت جاپپاي جۇمىسسىزدىققا الىپ كەلمەيدى - سيفرلىق مينيسترلىگى

استانا. KAZINFORM - كۇن سايىن جاساندى ينتەللەكت ومىرىمىزگە كەڭىنەن ەنىپ بارادى، قازىر ادام جاساي المايتىن دۇنيەنى جاساندى ينتەللەكت جاساپ جاتىر. وسى ورايدا ەڭبەك نارىعىنا كەڭ تاراپ، ارتى جۇمىسسىزدىققا الىپ كەلمەي مە؟

بۇل ساۋالعا سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى جاساندى ينتەللەكت جانە يننوۆاتسيالاردى دامىتۋ كوميتەتىنىڭ ءتوراعاسى عيززات بايتۇرسىنوۆ جاۋاپ بەردى.

- ءبىز جاساندى ينتەللەكت ەڭبەك نارىعىن وزگەرتەدى دەگەنمەن كەلىسەمىز، ءبىراق بۇل جاپپاي جۇمىسسىزدىق بولادى دەگەندى بىلدىرمەيدى. ءبىزدىڭ ويىمىزشا، جۇمىس ورىندارى جويىلمايدى، كەرىسىنشە، ماماندىقتار ترانسفورماتسيالانادى، - دەدى عيززات بايتۇرسىنوۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.

ونىڭ ايتۋىنشا، كەز كەلگەن جاڭا تەحنولوگيا سياقتى، جاساندى ينتەللەكتى دە جاڭا جۇمىس ورىندارىنىڭ اشىلۋىنا سەپتىگىن تيگىزەدى.

- ءبىزدىڭ باستى مىندەت - ادامداردى جاساندى ينتەللەكتىنى پايدالانۋ داعدىلارىنا قايتا وقىتۋ. ءدال وسى ماقساتتا ءبىز Astana Hub-پەن بىرلەسىپ ءبىلىم بەرۋ باعدارلامالارىن ىسكە قوسىپ جاتىرمىز. الداعى 5 جىلدا كەمىندە 1 ميلليون ادامدى وقىتۋدى كوزدەپ وتىرمىز، - دەيدى مينيسترلىك وكىلى.

بۇعان دەيىن ەلىمىزدە وقۋشىدان مەملەكەتتىك قىزمەتشىگە دەيىن جاساندى ينتەللەكتىنى مەڭگەرەتىنىن جانە ونىڭ ماڭىزى تۋرالى جازعان ەدىك.

ايتا كەتەيىك، الداعى بەس جىلدا 1 ميلليونعا جۋىق قازاقستاندىق جاساندى ينتەللەكتىنى مەڭگەرەدى.

سونداي-اق قازاقستان Chat GPT سەكىلدى ءوز جاساندى ينتەللەكتىن جاساپ شىعارماق. اقىلدى جۇيە KazLLM دەپ اتالادى.

ەسكە سالساق، پرەزيدەنت جانىنداعى جاساندى ينتەللەكت جونىندە كەڭەستىڭ قۇرامىندا كىمدەر بولاتىنىن حابارلاعان بولاتىنبىز.

ودان بولەك، جاساندى ينتەللەكتىنىڭ كومەگىمەن قيىن جاعدايداعى وتباسىن قولداۋ تەتىگى ەنگىزىلمەك.