جاساندى ينتەللەكت دەموكراتياعا تونگەن قاۋىپ پە

لوندون. KAZINFORM – ۇلى بريتانيا بيلىگى وسى جىلدىڭ ەكىنشى جارتىسىنا جوسپارلانعان سايلاۋدىڭ ءادىل وتۋىنە جاساندى ينتەللەكت كەرى ىقپال ەتەدى دەپ قاۋىپتەنەدى. ويتكەنى سوڭعى ۋاقىتتا ساياساتكەرلەردىڭ جالعان ۆيدەولارى مەن اۋديو جازبالارى جەلىدە قاپتاپ كەتكەن.

تەحنولوگيالىق كومپانيالار مەن ۇكىمەت بىرلەسىپ شارا قولدانباسا، فەيكتەر ءتۇرلى شيەلەنىستەرگە الىپ كەلۋى مۇمكىن، دەپ حابارلايدى Kazinform-نىڭ وسى ەلدەگى مەنشىكتى ءتىلشىسى عالىمجان قارامان ۇلى.

نيەتى قارا مەملەكەتتەردىڭ اتىنان ارەكەت ەتەتىن قىلمىسكەرلەر جاساندى ينتەللەكت كومەگىمەن سايلاۋ ناتيجەلەرىن بۇرمالاۋى ىقتيمال، دەپ مالىمدەدى ىشكى ىستەر ءمينيسترى.

كرەمني القابىنىڭ باسشىلارىمەن كەزدەسۋ كەزىندە دجەيمس كليەۆەرلي ساياسي ناۋقاننىڭ وتۋىنە جىلدام دامىعان تەحنولوگيالاردىڭ كەسىرى تيۋ ىقتيمال دەدى.

«ارينە، جاساندى ينتەللەكتىڭ ارتىقشىلىقتارىمەن قاتار، كەمشىلىكتەرى دە بار. سوندىقتان ىقتيمالدى قاۋىپ-قاتەردىڭ الدىن الۋ ماڭىزدى. ونىمدىلىكتى ارتتىرۋ ءۇشىن تەحنولوگيالىق كومپانيالار ۇلىبريتانيا ۇكىمەتىمەن ىنتىماقتىقتا جۇمىس ىستەيدى دەگەن ۇمىتتەمىن»، - دەيدى ۇلى بريتانيا ىشكى ىستەر ءمينيسترى دجەيمس كليەۆەرلي.

وسى جىلى ۇلى بريتانيا، ا ق ش جانە ءۇندىستان سياقتى كوپتەگەن ەلدە سايلاۋ ءوتىپ، شامامەن 2 ميلليارد ادام داۋىس بەرەدى دەگەن بولجام بار.

«راس-وتىرىگىن اجىراتۋ قيىن ۆيدەو جانە اۋديو ماتەريالداردىڭ ماقساتى - ەلدەگى دەموكراتيالىق ۇدەرىستىرگە نۇقسان كەلتىرۋ»، - دەيدى ساياساتكەر.

وتكەن جىلى لەيبوريستەر پارتياسىنىڭ كوشباسشىسى كير ستارمەردىڭ ارىپتەستەرىنە ايقايلاپ، بەيادەپ سوزدەر ايتىپ جاتقانى الەۋمەتتىك جەلىلەردە تارادى.

كەيىن بۇل - جاساندى ينتەللەكت جاساعان جالعان اۋديوجازبا ەكەندىگى ءمالىم بولدى. لوندون مەرى ساديك حاننىڭ دا داۋسى قاقتىعىستارعا ۇلاسۋى مۇمكىن داۋ-داماي تۋعىزا جازدادى.

پوليتسيا اۋديوجازبانى زەرتتەپ، «قىلمىستىق قۇقىق بۇزۋشىلىق ەمەس» دەگەن قورىتىندىعا كەلدى. ساراپشىلار ديپفەيكپەن كۇرەس جۇرگىزىلمەسە، دەموكراتياعا قاۋىپ تونەدى دەپ ەسەپتەيدى.

«ديپفەيكتى انىقتاۋ مەحانيزمدەرى دامىپ جاتىر. مىسالى، ينتەل كومپانياسى تەرىنىڭ استىنداعى قان اينالىمىن زەرتتەۋ ارقىلى جالعان ۆيدەولاردى تاباتىن تەحنولوگيا ويلاپ تاپتى. ءبىراق ولار جەتىلدىرىلگەن سايىن جاساندى ينتەللەكت تە تەز دامىپ كەلەدى جانە بۇرىنعىدان دا ساپالى كونتەنت ۇسىنۋدا. اسىرەسە، اۋديوجازبانىڭ راس-وتىرىگىن اشكەرەلەۋ قيىنعا تۇسۋدە»، - دەيدى Century Tech كومپانياسىنىڭ باس ديرەكتورى پريا لاكحاني.

جاقىندا جاھاندىق تەحنولوگيالىق كومپانيالار جاساندى ينتەللەكتەن كەلەتىن قاۋىپتىڭ الدىن الۋ ءۇشىن «اقىلعا قونىمدى قاۋىپسىزدىك شارالارىن» قولدانۋ تۋرالى ەرىكتى كەلىسىمگە قول قويدى.

ولار ءوز ونىمدەرىن زەرتتەۋگە رۇقسات بەرۋگە جانە بۇل سالانى بىرلەسىپ باسقارۋعا كەلىستى. «جاساندى ينتەللەكتىڭ سايلاۋعا ىقپالى ءوزىمىزدى دە قاتتى الاڭداتادى» دەيدى وسى سالاداعى ەڭ تانىمال تۇلعا.

«يندۋستريا مەن ۇكىمەتتەر بىرلەسىپ ءارى جىلدام ارەكەت ەتە الادى دەگەن ۇمىتتەمىز. ءبىز قولداناتىن قۇرال جەتكىلىكتى. بۇل باعىتتا كوپ نارسە ىستەي الامىز جانە ىستەپ جاتىرمىز دا. ماسەلەن، ChatGPT باس تارتاتىن تاپسىرمالار بار. قاداعالاۋ ساياساتىن ۇستانا وتىرىپ، جالعان جاڭالىقتاردى جاساپ جاتقان ادامدى انىقتاي الامىز»، - دەيدى OpenAI كومپانياسىنىڭ باس ديرەكتورى سەميۋەل التمان.

ءبىراق بارلىعىنىڭ ويى ءبىر جەردەن شىعادى: ەشبىر كومپانيا، ۇكىمەت نەمەسە ازاماتتىق قوعام ۇيىمى بۇل تەحنولوگيانىڭ ىقتيمالدى قاۋپىمەن جەكە- دارا جانە تولىققاندى كۇرەسە المايدى. سوندىقتان ادامدار سىني پايىمداي ءبىلۋ قاسيەتىنەن ەشقاشان ارىلماۋىم كەرەك.

«جاساندى ينتەللەكتەن قورقۋعا ەش سەبەپ جوق. ويلاي ءبىلۋ قاسيەتىمىزدەن ادا بولماساق بولدى. ءبىراق ەگەر ءسىز فاكتىلەردى پىكىرلەردەن اجىراتا الماساڭىز جانە ChatGPT نۇسقاۋلارىن شارتسىز ورىنداساڭىز، ءقاۋىپتى ايماققا كىرەسىز»، - دەيدى فرانسياداعى ەكونوميكالىق ارىپتەستىك جانە دامۋ ۇيىمى دەپارتامەنتىنىڭ ديرەكتورى اندرەاس شلەيحەر.

قاۋەسەت پەن وسەك-اياڭنان بولەك جەلىدەگى اقپاراتتى دا سارالاي ءبىلۋ قاجەت.

عالامتورداعى دۇنيەلەردى تالداي بىلۋگە بالالاردى عانا ۇيرەتىپ قويماي، ەرەسەكتەردى دە تارتۋ كەرەك دەيدى، ساراپشىلار.