جاساندى ينتەللەكت ادامنىڭ ورنىن اۋىستىرا الا ما
استانا. KAZINFORM - ەلىمىزدە جاساندى ينتەللەكت تۋرالى زاڭ جوباسى ازىرلەۋ قولعا الىندى.
وسى ورايدا جاساندى ينتەللەكت ادامنىڭ ورنىن اۋىستىرا الا ما، كەيبىر ماماندىقتاردىڭ جويىلۋ قاۋپى بار ما؟ بۇل ساۋالعا سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ وكىلدەرى جاۋاپ بەردى.
«جاساندى ينتەللەكت كەيبىر فۋنكتسيالاردى الماستىرمايدى، ءبىراق تولىقتىرادى. مىسالى، كونسۋلتانتتاردىڭ جۇمىسى تۋرالى ايتاتىن بولساق، ول جەردە جاساندى ينتەللەكت قاجەتتى اقپاراتتى تەزىرەك تابادى. اۋدارماشىلاردىڭ جۇمىسىنا كەلەتىن بولساق، جاساندى ينتەللەكت اۋدارماشىلاردى تولىعىمەن الماستىرا المايدى. جاساندى ينتەللەكت - جاڭا مۇمكىندىكتەردى اشادى، ماسەلەن ءماتىندى تەكسەرۋ جانە باعالاۋ»، - دەدى سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى يننوۆاتسيالار دامىتۋ دەپارتامەنتىنىڭ ديرەكتورى دارحان مىرزابايەۆ و ك ق- دە بريفينگ بارىسىندا قويىلعان ساۋالعا جاۋاپ بەرە تۇرىپ.
ونىڭ ايتۋىنشا، قازىرگى ۋاقىتتا كەز-كەلگەن ماماندىقتى جاساندى ينتەللەكتىمەن الماستىرۋ تۋرالى اقپارات جوق.
ۇلتتىق اقپاراتتىق تەحنولوگيالار اق باسقارما ءتوراعاسى روستيسلاۆ كونياشكين جاساندى ينتەللەكت ارقىلى نەمەسە جاساندى ينتەللەكت مودەلىندە جاسالعان ونىمدەرگە اۆتورلىق قۇقىقتار تۋرالى ماسەلە سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ باقىلاۋىندا بولاتىنىن ايتتى.
«زاڭنامالىق جانە نورماتيۆتىك اكتىلەر شەڭبەرىندە بەينەنى، مۋزىكالىق شىعارمالاردى جانە تاعى باسقا جاڭاشىلدىقتى ازىرلەۋ ءۇشىن جاساندى ينتەللەكتىنى قولدانۋدا اۆتورلىق قۇقىق رەتتەلەتىن بولادى»، - دەپ تولىقتىردى روستيسلاۆ كونياشكين.
ايتا كەتەيىك، قازاقستاندا جاساندى ينتتەلەكت تۋرالى زاڭ جوباسى ازىرلەنىپ جاتىر.
